އީރާނުގެ ހަނގުރާމަ އަނެއްކާވެސް ވަރުގަދަވެފައިވާއިރު، އެމެރިކާއިން އެންމެ ފަހުން ދިން ހަމަލާތަކުގައި 18 މީހުން މަރުވެފައިވާ ކަމަށް އީރާނުން ރިޕޯޓްކުރުމާ ގުޅިގެން، އާންމުންނަށް ލިބޭ ގެއްލުންތަކާ މެދު ކަންބޮޑުވުން އިތުރުވެއްޖެ އެވެ.
އީރާނުގެ ހެލްތު މިނިސްޓަރު ވިދާޅުވި ގޮތުގައި، އަންގާރަ ދުވަހުގެ ރޭ އެމެރިކާއިން އީރާނުގެ އެކި ސަރަހައްދުތަކަށް ދިން ހަމަލާތަކުގައި 18 މީހުން މަރުވެ، 108 މީހުން ވަނީ ޒަހަމްވެފަ އެވެ. އީރާނުގެ ރެޑް ކްރެސެންޓުން ބުނި ގޮތުގައި ހޯރްމޫޒް ކަނޑުއޮޅީގެ އައްސޭރިފަށުގެ ސަރަހައްދެއްގައި ބޭއްވި ކައިވެނި ހަފުލާއަކަށް ދިން ހަމަލާގައި ހަތަރު މީހަކު މަރުވެ، 67 މީހަކު ވަނީ ޒަހަމްވި އެވެ.
ހަނގުރާމައިގެ އޮޕަރޭޝަންތައް އަލުން ފެށުމާއެކު ސަރަހައްދީ ގައުމުތަކުގެ މެދުގައި ވަނީ ބިރުވެރިކަން އުފެދިފަ އެވެ. އީރާނުން ވަނީ ބަހްރޭން، އުރުދުން، ކުވެއިތު އަދި އިރާގުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް މިސައިލާއި ޑްރޯން ހަމަލާތަކެއް ދީފަ އެވެ. ކުވެއިތުގެ އަސްކަރިއްޔާއިން ބުނި ގޮތުގައި ބުރާސްފަތި ދުވަހުގެ ފަތިހުގެ ވަގުތެއްގައި ވެސް މިސައިލާއި ޑްރޯން ހަމަލާތަކެއް ދީފައިވާ އިރު، އެ ހަމަލާތައް ވަނީ ވައިގެ ދިފާއީ ނިޒާމުތަކުން ހުއްޓުވާފަ އެވެ.
މިދިޔަ ޖުލައި މަހު ދެ ގައުމުގެ މެދުގައި ބަދަލުކުރި ހަމަލާތަކަށް ފަހު، ސުލްހައިގެ ވާހަކަތަކުން ކުރިއެރުމެއް ލިބިފައި ނުވި ނަމަވެސް، ހަމަލާތައް އޮތީ ވަރަށް ބޮޑަށް މަޑުޖެހިފަ އެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ އަސްކަރީ ބާރުގެ ބޭނުން އިތުރަށް ކުރާނެ ކަމުގެ އިންޒާރު ދެއްވާފަ އެވެ. އެހެންނަމަވެސް، މި ހަނގުރާމައަށް އެމެރިކާގެ ރައްޔިތުންގެ މެދުގައި މަގުބޫލު ކަމެއް ނެތްއިރު، ހަނގުރާމައިގެ ސަބަބުން ތެލުގެ އަގު އުފުލިފައިވާކަން ފާހަގަކުރެވެ އެވެ.
އަންނަ ނޮވެމްބަރު މަހު ބާއްވާ މިޑްޓާމް އިންތިހާބުގައި ރިޕަބްލިކަން ޕާޓީއަށް ލިބިދާނެ ނާކާމިޔާބީއަކުން ސަލާމަތްވުމަށްޓަކައި، އިންތިހާބުގެ ކުރިން ހަނގުރާމަ އިތުރަށް ވަރުގަދަ ނުކުރުމަށް ޓްރަމްޕްގެ އިސް މުޝީރުން ދަނީ ބާރުއަޅަމުންނެވެ. މި މަޝްވަރާތަކުގެ މައުލޫމާތު އެނގޭ ހަތަރު މީހަކު ބުނި ގޮތުގައި، ވައިޓް ހައުސްގެ އޮފިޝަލުން ވިސްނަމުން ދަނީ ނޮވެމްބަރު 3 ގައި ބާއްވާ އިންތިހާބަށް ފަހު އަސްކަރީ ހަރަކާތްތައް ވަރުގަދަ ކުރުމަށެވެ.
އީރާނަށް އަސްކަރީ ގޮތުންނާއި އިގްތިސާދީ ގޮތުން ބޮޑެތި ގެއްލުންތަކެއް ލިބެމުންދިޔަ ނަމަވެސް، އެ ގައުމުން ދަނީ ދޫނުދީ ހިފަހައްޓަމުންނެވެ.
ކައިވެނި ހަފުލާއަކަށް އަމާޒުވި ހަމަލާ ހިމެނޭހެން، އީރާނުގައި އާންމުން މަރުވަމުންދާ ކަމުގެ ރިޕޯޓްތަކާ ގުޅިގެން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ "ވަރަށް ބޮޑަށް ކަންބޮޑުވުން" ފާޅުކުރައްވާފަ އެވެ. އަދި އަސްކަރީ ހަމަލާތައް ވަގުތުން ހުއްޓާލުމަށް އޭނާ ގޮވާލެއްވި ކަމަށް ތަރުޖަމާނު ސްޓެފަން ޑުޖަރިކް ވިދާޅުވި އެވެ.
އީރާނުގެ އިންސާނީ ހައްގުތަކަށް މަސައްކަތްކުރާ މިނިވަން ޖަމާއަތެއް ކަމަށްވާ ހިއުމަން ރައިޓްސް އެކްޓިވިސްޓްސް ނިއުސް އެޖެންސީ (އެޗް.އާރު.އޭ.އެން.އޭ) އިން ބުނާ ގޮތުގައި، އޭޕްރިލް 7 އާ ހަމައަށް އީރާނުގައި 3,636 މީހުން މަރުވެފައިވާކަން ވަނީ ކަށަވަރު ކުރެވިފަ އެވެ. އޭގެ ތެރޭގައި 1,701 އާންމުން ހިމެނޭ އިރު، މިހާރު މަރުވި މީހުންނާއެކު އެ އަދަދު އިތުރުވާނެ އެވެ.
އެމެރިކާއިން ރިޕޯޓްކޮށްފައިވާ ގޮތުގައި އެ ގައުމުގެ އަސްކަރިއްޔާގެ 18 މީހަކު މަރުވެ، 750 އަށް ވުރެ ގިނަ މީހުން ވަނީ ޒަހަމްވެފަ އެވެ.
