އެމެރިކާގެ ވައިޓް ހައުސްއިން އާންމުކުރި ވެބްސައިޓެއްގައި "މޭކް އެމެރިކާ ގްރޭޓް އެގެއިން" (މާގާ) ސިޔާސަތަށް ބައްޓަންކޮށްފައިވާ ކުރީގެ މަޝްހޫރު އާކޭޑް ގޭމްތަކެއް ހިމަނައިފި އެވެ.
ޓްރަމްޕްގެ ސަރުކާރުން އެހެން ގައުމުތަކުގެ މީހުން ހައްޔަރުކޮށް، ޑީޕޯޓްކުރުމުގެ މަޝްރޫއު ވަރުގަދަކޮށްފައިވާ ދަނޑިވަޅެއްގައި މިފަދަ ގޭމްތަކެއް އާންމުކުރުމުން، އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ވަނީ އެކަމަށް ވަރަށް ބޮޑަށް ފާޑުކިޔައިފަ އެވެ.
މީގެ ތެރެއިން "ރިއޯ ރަން" ގެ ނަމުން ނަންދީފައިވާ ގޭމަކީ ކުރީގެ މަޝްހޫރު "ސްނޭކް" ގޭމްގެ އާ ފަރުމާއެކެވެ. މި ގޭމްގައި ފެންނަނީ އެމެރިކާގެ ބޯޑަރުގެ ކަންކަމާ ބެހޭ އިސްވެރިޔާ، މެކްސިކޯ ބޯޑަރުގައި އޮންނަ ރިއޯ ގްރާންޑޭ ކޯރު ކައިރިން މީހުންގެ ފަހަތުން ދުވާ މަންޒަރެވެ.
މީގެ އިތުރުން، "ޓެޓްރިސް" ގޭމަށް ބިނާކޮށް "ބިލްޑް ދަ ވޯލް" ނުވަތަ ފާރު ބިނާކުރުމުގެ ނަމުގައި ވެސް ގޭމެއް ވަނީ ހިމަނައިފަ އެވެ.
ތިންވަނަ ގޭމެއްގައި އޮންނަނީ "ޓްރަމްޕް އެކައުންޓްސް" އަށް ދާ ޖަހައިގެން އެއްޗެހި އެއްކުރުމެވެ. މިއީ 2025 އިން ފެށިގެން 2028 އާ ދެމެދު އުފަންވާ ކުދިންނަށް 1،000 އެމެރިކާ ޑޮލަރުގެ ޑިޕޮސިޓަކާއެކު ހުޅުވައިދޭ އިންވެސްޓްމަންޓް އެކައުންޓްތަކުގެ މައްޗަށް ހެދި ގޭމެކެވެ.
ވައިޓް ހައުސްގެ އެކްސް އެކައުންޓުން ވަނީ ވީޑިއޯ ގޭމް އުފައްދާ މަޝްހޫރު ކުންފުނި "ސޭގާ"ގެ ލޯގޯއާ އެއްގޮތަށް ފަރުމާކޮށްފައިވާ "މާގާ" ލޯގޯ ޖަހާފައިވާ ވީޑިއޯއެއް ވެސް އާންމުކޮށްފަ އެވެ.
ލިޔެކިޔުން ނެތް އެހެން ގައުމުތަކުގެ މީހުން އެމެރިކާއިން ބޭރުކުރުމަކީ ޓްރަމްޕްގެ ރިޔާސީ ކެމްޕޭނުގެ މުހިންމު ވައުދެކެވެ. އަދި ވެރިކަމަށް ވަޑައިގަތުމަށްފަހު، މީހުން ބޭރުކުރުން އަވަސްކުރުމަށާއި ބޯޑަރު ހުރަސްކުރާ މީހުންގެ އަދަދު މަދުކުރުމަށް އޭނާ ގިނަ ފިޔަވަޅުތަކެއް އަޅުއްވަން ފައްޓަވައިފަ އެވެ.
