އެމެރިކާގައި ވޭތުވެދިޔަ ގަރުނެއްހާ ދުވަހުގެ ތެރޭގައި ފުރަތަމަ ފަހަރަށް، ދުނިޔޭގައި ހުންނެވި ރައީސެއްގެ ތަސްވީރު ހިމަނައިގެން ފައިސާ ފޮއްޗެއް ނެރެފި އެވެ.
އެމެރިކާގެ މިނިވަންކަމަށް 250 އަހަރު ފުރުން ފާހަގަކުރުމުގެ ގޮތުން، "ލިބަޓީ" އާއި "އިން ގޯޑް ވީ ޓްރަސްޓް" މި އިބާރާތްތަކާއެކު ޓްރަމްޕްގެ ތަސްވީރު ހިމެނޭ އެއް ޑޮލަރުގެ ފައިސާ ފޮތި، އެމެރިކާގެ ފައިސާ އުފައްދާ އިދާރާ ކަމަށްވާ ޔޫއެސް މިންޓުން ބުދަ ދުވަހު ވަނީ ނެރެފަ އެވެ.
ޔޫއެސް މިންޓުން ބުނި ގޮތުގައި، މި ފައިސާ ފޮއްޗަކީ އެމެރިކާގެ ފާހަގަކޮށްލެވޭ މުނާސަބަތަކާ ގުޅިގެން، ގައުމުގެ ރޫހާއި ފަހުރުވެރިކަން އަދި ތަރިކަ ރަމްޒުކޮށްދޭ ފައިސާ ފޮއްޗެކެވެ.
މި ފައިސާ ފޮތިތައް ވިއްކަން ފެށިތާ މަދު ގަޑިއިރުތަކެއްގެ ތެރޭގައި، ޔޫއެސް މިންޓްގެ ވެބްސައިޓުން ވަނީ ހުސްވެފަ އެވެ. މި ފައިސާ ފޮތިތައް ވިއްކާފައިވަނީ 25 ފޮތީގެ ރޯލެއް 61 ޑޮލަރަށް އަދި 100 ފޮތީގެ ކޮތަޅެއް 154.50 ޑޮލަރަށެވެ.
ޔޫއެސް މިންޓުން ހާމަކުރި ގޮތުގައި މިއީ ޖީލަކުން އެއްފަހަރު ފެންނަ ފަދަ ފަރުމާއެއް ކަމަށާއި، މިއީ ފައިސާ އެއްކުރާ ފަރާތްތަކުގެ މެދުގައި ވަރަށް މަގުބޫލު އެއްޗަކަށް ވާނެ ކަމަށެވެ.
މީގެ އިތުރުން، ވޮޝިންޓަން ޑީސީގައި ހުންނަ ޔޫއެސް މިންޓްގެ ފިހާރައިގައި ހުރި ވެންޑިން މެޝިންތަކުން ވެސް މި ފައިސާ ފޮތިތައް މިހާރު ލިބެން ހުންނާނެ އެވެ.
މި ފައިސާ ފޮތިތަކުގެ ކުލަ ރަންކުލައިގައި ހުރި ނަމަވެސް، މީގައި އެއްވެސް ވަރަކަށް ރަން ހިމެނިފައެއް ނުވެ އެވެ. ޔޫއެސް މިންޓުން ބުނި ގޮތުގައި މި ފައިސާ ފޮތީގެ 88.5 އިންސައްތައަކީ ކޮޕަރެވެ. އަދި ބާކީ ބައިގައި ހިމެނެނީ ޒިންކާއި، މެންގަނީޒްގެ އިތުރުން ނިކަލް އެވެ.
މީގެ ކުރިން މެއި މަހުގެ ތެރޭގައި، ޓްރެޜަރީ ސެކްރެޓަރީ ސްކޮޓް ބެސެންޓް ވަނީ ރައީސް ޓްރަމްޕްގެ ތަސްވީރު ހިމެނޭ 250 ޑޮލަރުގެ ނޫޓެއް ނެރުމަށް އެ މިނިސްޓްރީން ރާވަމުންދާ ކަމަށް ވިދާޅުވެފަ އެވެ.
އެމެރިކާގެ ފެޑަރަލް ގާނޫނުތައް ބުނާގޮތުން، ދުނިޔޭގައި ހުރި މީހެއްގެ ތަސްވީރު އެ ގައުމުގެ ފައިސާގައި ޖެހުމަކީ މަނާކަމެކެވެ. ކޮންގްރެސްގައި ތިއްބެވި ޓްރަމްޕްގެ އެކުވެރި މެންބަރުން ވަނީ މިކަމަށް އިސްތިސްނާއެއް ހޯދުމަށް ބިލެއް ހުށަހަޅާ ފައެވެ. ނަމަވެސް އެ ބިލުގެ މަސައްކަތް މިހާރު އޮތީ މަޑުޖެހިފަ އެވެ.
އެ ދުވަސްވަރު ބެސެންޓް ފާހަގަކުރެއްވި ގޮތުގައި، މީގެ ކުރިން ވެސް ދުނިޔޭގައި ހުންނެވި އެމެރިކާގެ ރައީސެއްގެ ތަސްވީރު އެ ގައުމުގެ ފައިސާގައި ހިމަނާފައިވެ އެވެ.
އެގޮތުން 1926 ވަނަ އަހަރު، އެމެރިކާގެ މިނިވަންކަމަށް 150 އަހަރު ފުރުން ފާހަގަކުރުމަށް ނެރުނު ބައި ޑޮލަރުގެ ފައިސާ ފޮއްޗެއްގައި އޭރުގެ ރައީސް ކެލްވިން ކޫލިޖްގެ ތަސްވީރު ހިމަނާފައިވެ އެވެ.
