ދުނިޔޭގެ ސިޔާސީ މަސްރަހަށް އަންނަމުންދާ ނުތަނަވަސްކަމާ ގުޅިގެން، އުތުރު އެމެރިކާގައި ހުރި އެތައް ބިލިއަން ޑޮލަރެއްގެ ރަން، އިނގިރޭސިވިލާތުގެ ލަންޑަނަށް ބަދަލުކޮށްފައިވާ ކަމަށް ނެދަލެންޑްސްގެ މަރުކަޒީ ބޭންކް (ޑީއެންބީ) އިން ކަށަވަރުކޮށްދީފި އެވެ.
މިދިޔަ ބުދަ ދުވަހު ޑީއެންބީން ހާމަކުރި ގޮތުގައި، އެމެރިކާ އާއި ކެނެޑާގައި ހުރި 86 ޓަނުގެ ރަން އެ ގައުމުތަކުން ބޭރުކޮށްފައިވަނީ އެތައް މަހަކަށް ދެމިގެންދިޔަ އުނދަގޫ އޮޕަރޭޝަނަކަށް ފަހުގަ އެވެ. މި ރަން މިހާރު ރައްކާކޮށްފައިވަނީ ބޭންކް އޮފް އިންގްލެންޑްގަ އެވެ. އެއީ ކުއްލި ހާލަތެއް ދިމާވެއްޖެ ނަމަ، އެ ތަނުގައި ހުންނަ ރަނުން މުއާމަލާތްކުރުން ފަސޭހަވާނެތީ ކަމަށް އެ ބޭންކުން ބުނެ އެވެ.
ބޭންކުގެ ރައީސް އޯލާފް ސްލެއިޕެން ވިދާޅުވީ، މި ފިޔަވަޅަކީ ކުރިމަތިވެދާނެ ކަންކަމަށް ތައްޔާރުވުމަށާއި ބޭންކުގެ ގާބިލުކަން އިތުރުކުރުމަށް އެޅި މުހިންމު ފިޔަވަޅެއް ކަމަށެވެ.
މި ނިންމުން ނިންމާފައިވަނީ އެމެރިކާ އާއި ކެނެޑާއާ ދެމެދު ވިޔަފާރީގެ މުއާމަލާތްތަކުގައި ބޮޑެތި ހިޔާލުތަފާތުވުންތަކެއް އުފެދިފައިވާ ދަނޑިވަޅެއްގަ އެވެ. ވިޔަފާރީގެ މަޝްވަރާތައް ނާކާމިޔާބުވުމާ ގުޅިގެން، ދެ ގައުމުން ވެސް ވަނީ އެއް ގައުމު އަނެއް ގައުމުން އެތެރެކުރާ މުދަލުން އާ ޓެރިފްތަކެއް ނަގަން ފަށާނެކަން އިއުލާންކޮށްފަ އެވެ.
ޑީއެންބީން ބުނި ގޮތުގައި، މާޗް މަހުން ފެށިގެން އޮގަސްޓް މަހުގެ ނިޔަލަށް ކުރިއަށްދިޔަ މި ހަރަކާތުގައި، އެމެރިކާގެ ނިއު ޔޯކާއި ކެނެޑާގެ އޮޓާވާގައި ހުރި 27 ޓަނުގެ ރަން ވަނީ ނެދަލެންޑްސްގެ ޒީސްޓަށް ބަދަލުކޮށްފަ އެވެ.
އަދި ހަމަ އެ މިންވަރުގެ ރަން، ލަންޑަނަށް ވަނީ ބަދަލުކޮށްފަ އެވެ.
އެޓްލާންޓިކް ކަނޑު ހުރަސްކޮށް މިހާ ގިނަ އަދަދެއްގެ ރަން އުފުލި ގޮތުގެ ތަފުސީލެއް އެ ބޭންކުން ހާމައެއް ނުކުރެ އެވެ.
ބޭންކުން ބުނި ގޮތުގައި، ބާކީ ހުރި ރަން ބަދަލުކޮށްފައިވަނީ ނިއު ޔޯކުގައި ހުރި ރަން ވިއްކާލުމަށް ފަހު، ލަންޑަނުން އަލުން ރަން ގަނެގެންނެވެ.
"ސިޔާސީ ނުތަނަވަސްކަން" ކަމަށް ބުނެ ޑީއެންބީން އިޝާރާތްކުރީ ސީދާ ކޮން ކަމަކަށް ކަން ސާފުކޮށްދީފައި ނުވި ނަމަވެސް، އީރާނާއެކު ކުރަމުންދާ ހަނގުރާމައިގެ ސަބަބުން އެމެރިކާގެ އިގްތިސާދަށް ވަނީ ނުތަނަވަސްކަން ކުރިމަތިވެފަ އެވެ. މީގެ ސަބަބުން ދުނިޔޭގެ ވިޔަފާރިއަށް ވެސް ދަނީ އަސަރުކުރަމުންނެވެ.
މީގެ އިތުރުން، ކެނެޑާގެ މުހިންމު ސިނާއަތްތައް ކަމަށްވާ ދަގަނޑާއި، އެލުމިނިއަމާއި، ލަކުޑި އަދި އުޅަނދުފަހަރު އުފައްދާ ދާއިރާތަކުން އެމެރިކާ އިން ނަގާ ޓެރިފްތަކުގެ ސަބަބުން ކެނެޑާއަށް ވަނީ ބޮޑެތި ގެއްލުންތަކެއް ލިބިފަ އެވެ. އަދި އޮގަސްޓް މަހު އެމެރިކާ އިން ވަނީ ކެނެޑާގެ 20 ބިލިއަން އެމެރިކާ ޑޮލަރުގެ މުދަލުން 50 އިންސައްތައިގެ އިތުރު ޓެކްސެއް ނަގާނެކަން ވެސް އިއުލާންކޮށްފަ އެވެ.
ޑީއެންބީން ބުނި ގޮތުގައި ބޭންކް އޮފް އިންގްލެންޑްގައި ހުންނަ ރަނަކީ ދުނިޔޭގައި އެންމެ ފަސޭހައިން މުއާމަލާތް ކުރެވޭ ރަން ކަމަށް ބެލެވޭތީ، އެމެރިކާ ނުވަތަ ކެނެޑާގައި ރަން ހުރުމަށް ވުރެ، ކުއްލި ހާލަތެއްގައި އެ ރަން ބޭނުންކުރުން މާ ފަސޭހަވާނެ އެވެ.
މީގެ ކުރިން، ނެދަލެންޑްސްގެ ރަނުގެ ރިޒާވްގެ 31.3 އިންސައްތަ ހުރީ ނިއު ޔޯކުގަ އެވެ. އަދި 19.7 އިންސައްތަ ހުރީ އޮޓާވާގަ އެވެ. ނަމަވެސް މި ބަދަލާއެކު، މިހާރު އެ ދެ ގައުމުން ކޮންމެ ގައުމެއްގައި ހުރީ ރަނުގެ 18.5 އިންސައްތަ އެވެ.
2025 ވަނަ އަހަރުގެ ނިޔަލަށް ނެދަލެންޑްސްގެ އަތުގައި ޖުމްލަ 612.4 ޓަނުގެ ރަން ހުރި އިރު، އޭގެ އަގު 72.2 ބިލިއަން ޔޫރޯއަށް އަރާ ކަމަށް ޑީއެންބީން ބުނެ އެވެ.
މި ބަދަލަށް ފަހު، ލަންޑަނުގައި ހުރި އެ ބޭންކުގެ ރަނުގެ މިންވަރު 18.1 އިންސައްތައިން 32.1 އިންސައްތައަށް ވަނީ އިތުރުވެފަ އެވެ. އަދި ރަނުގެ ރިޒާވްގެ 30.8 އިންސައްތަ އަދިވެސް ހުރީ ނެދަލެންޑްސްގަ އެވެ.
