ސައުދީ އަރަބިއްޔާގެ ސުޕަޓޭންކަރަކަށް ހޯމަ ދުވަހުގެ ރޭ އީރާނުން ދިން ހަމަލާއެއްގައި ފިލިޕީންސްގެ ދެ ފަޅުވެރިން މަރުވި މައްސަލަ އެ ގައުމުން ހަރުކަށި އިބާރާތުން ކުށްވެރިކޮށްފި އެވެ.
ސައުދީގެ ގައުމީ ޝިޕިން ކުންފުނި، ބަހްރީން ބުދަ ދުވަހު ކަށަވަރުކޮށްދިން ގޮތުގައި، އެ ކުންފުނީގެ "ސިދްރު" ނަމަކަށް ކިޔާ އުޅަނދު ހޯމަ ދުވަހުގެ ރޭ ހޮރްމޫޒް ކަނޑުއޮޅިން ދަތުރުކުރަމުން ދަނިކޮށް ވަނީ "ސަލާމަތީ ނުރައްކަލެއް" ކުރިމަތިވެފަ އެވެ.
ކަނޑުދަތުރުފަތުރުގެ ސަލާމަތީ ކަންކަން ބަލަހައްޓާ ކުންފުނިތަކުން ބުނާ ގޮތުގައި، އޮމާންގެ މުސަންދަމް ޕެނިންސިއުލާގެ އުތުރުން ސިދްރު ޓޭންކަރަށް ހަމަލާދީފައިވަނީ ގޮވާ އެއްޗެހި ބޭނުންކޮށްގެންނެވެ. އަދި ހަމަ އެ ވަގުތު، ދެކުނު ކޮރެއާގެ ކުންފުންޏަކަށް ނިސްބަތްވާ "ސެނެގާލް ޕްރޮސްޕެރިޓީ" ނަމަކަށް ކިޔާ ސުޕަޓޭންކަރަކަށް ވެސް މުސަންދަމްގެ އިރުމަތިން ހަމަލާދީފައިވާ ކަމަށް ރިޕޯޓުތައް ބުނެ އެވެ.
ސައޫދީން ކުރި މި ތުހުމަތުތަކަށް އީރާނުން އަދި ވަކި ޖަވާބެއް ދީފައެއް ނުވެ އެވެ. ނަމަވެސް، ހުއްދަ ނޫން މަގަކުން ކަނޑުއޮޅި ހުރަސްކުރަން އުޅުމުގެ ތެރޭގައި ދެ ޓޭންކަރެއް މައިންތަކެއްގައި ޖެހި އަލިފާން ރޯވެފައިވާ ކަމަށް އީރާނުން މީގެ ކުރިން ބުނެފައިވެ އެވެ.
ފިލިޕީންސްގެ ދެ ފަޅުވެރިން މަރުވި ހަބަރު މި ފެންމަތިވީ، އެމެރިކާގެ އަސްކަރިއްޔާއިން އީރާނަށް އަމާޒުކޮށް ވަރުގަދަ ވައިގެ ހަމަލާތަކެއް ދިނުމާއި، އީރާނުގެ ފައުޖުތަކުން އަވަށްޓެރި އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތައް ދީފައިވާ ދަނޑިވަޅެއްގަ އެވެ. މިއީ މިދިޔަ ޖުލައި މަހަށް ފަހު ދެ ފަރާތުގެ މެދުގައި ހިނގި އެންމެ ވަރުގަދަ ކުރިމަތިލުމެވެ.
އީރާނުގެ ހެލްތު މިނިސްޓަރު ބުދަ ދުވަހު ވިދާޅުވި ގޮތުގައި، އެމެރިކާގެ ހަމަލާތަކުގައި 18 މީހުން މަރުވެ 108 މީހުން ވަނީ ޒަހަމްވެފަ އެވެ. އަދި އީރާނުގެ ދެކުނުގެ ސިޓީއެއް ކަމަށްވާ ސިރިކްގައި އޮތް ކައިވެނި ހަފުލާއަކަށް ދިން ހަމަލާއެއްގައި ދެ ކުޑަކުދިން ހިމެނޭހެން ހަތަރު މީހުން މަރުވި މައްސަލައިގައި، އެމެރިކާގެ މައްޗަށް "ހަނގުރާމައިގެ ކުށުގެ" ތުހުމަތު އީރާނުން ވަނީ ކޮށްފަ އެވެ.
