ހދ. ހިރިމަރަދޫ ރައްޔިތުންނަށް ގާނޫނުއަސާސީން ކަށަވަރުކޮށްދީފައިވާ ހައްގުތައް ނުލިބޭ ކަމަށް ބުނެ އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ހުށަހެޅި މައްސަލަ ހިއުމަން ރައިޓްސް ކޮމިޝަން (އެޗްއާރްސީއެމް) އިން ބަލަން ފަށައިފި އެވެ.
އެމްޑީޕީން އެޗްއާރްސީއެމަށް މި މައްސަލަ ހުށަހެޅީ ރައީސުލްޖުމްހޫރިއްޔާގެ ގަރާރަކުން ހިރިމަރަދޫއަކީ ފަޅު ރަށެއްގެ ގޮތުގައި ކަނޑައަޅައި، ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާ ހިލާފަށް އެ ރަށުގެ ކައުންސިލް އުވާލުމާ ގުޅިގެން ރަށުގެ ރައްޔިތުންގެ ހައްގުތައް ގެއްލިފައިވާ ކަމަށް ބުނެ އެވެ.
"ތިޔަ ޕާޓީއިން މި ކޮމިޝަނަށް ހުށަހަޅުއްވާފައިވާ މައްސަލަ ކޮމިޝަނުން ބަލަމުންދާ ވާހަކަ ދަންނަވައި، މައްސަލަ ބަލައި ނިމުމުން ވީ އެންމެ އަވަސް ފުރުސަތެއްގައި ޖަވާބެއް އަރުވާނެ ވާހަކަ ދަންނަވަން،" އެޗްއާރްސީއެމް އިން ބުންޏެވެ.
ހިރިމަރަދޫ ރައްޔިތުން ހަނިމާދޫ އަށް ބަދަލުކުރަން ރައީސް މުހައްމަދު މުއިއްޒު ނިންމަވައި، ނިމިގެންދިޔަ ލޯކަލް ކައުންސިލްގެ އިންތިހާބާ ދިމާކޮށް ހިރިމަރަދޫ ކައުންސިލް އުވާލައި، އެރަށުގެ ރައްޔިތުން ވޯޓުލާން ޖެހުނީ ހަނިމާދޫ ކައުންސިލަށް މީހުން އިންތިހާބު ކުރުމަށެވެ.
ހއ. ހޯރަފުއްޓަށް ބަދަލުވާން ބޭނުންވާ ހދ. ހިރިމަރަދޫ ރައްޔިތުންގެ ނަން ނޯޓުކުރުމަށް އެ އަތޮޅު ހަނިމާދޫ ކައުންސިލުން މިދިޔަ ޖޫން މަހުގެ ތެރޭގައި ފެށި އެވެ. އެކަމަށް 30 ދުވަހުގެ މުއްދަތެއް ދިންއިރު، މިހާރު އެ މުއްދަތު ވަނީ ހަމަވެފަ އެވެ.
ހިރިމަރަދޫ ކައުންސިލް އުވާލާފައިވާތީ އެ ރަށުގެ އަސާސީ އަދި ރަށްވެހި ހިދުމަތްތައް ދިނުމަށް ހަރަދު ކުރަން ޖެހެނީ ހަނިމާދޫ ކައުންސިލުންނެވެ. ސަރުކާރުން ނިންމީ ހިރިމަރަދޫ މީހުން ހަނިމާދޫއަށް ބަދަލުކުރުމަށެވެ.
ހިރިމަރަދޫގެ ބަޖެޓު ސަރުކާރުން އެ އަތޮޅު ހަނިމާދޫ ކައުންސިލަށް ނުދީ ހިފަހައްޓާފައިވާތީ، ހިރިމަރަދޫން ރައްޔިތުންނަށް ދޭންޖެހޭ އަސާސީ ހިދުމަތްތައް ހުއްޓެމުންދާ ކަމަށް ބުނެ ހަނިމާދޫ ކައުންސިލުން މީގެކުރިން ކަންބޮޑުވުން ފާޅުކުރި އެވެ.
ހަނިމާދޫއަށް ބަދަލުކުރާ ހިރިމަރަދޫ އާއިލާތަކަށް ގެދޮރު ބިނާކުރުމަށް ބޭނުންވާ ބިން ހަމަޖެއްސުމުގައި އެރަށު ކައުންސިލުން ލަސްތަކެއް ކުރިމަތިކުރުވަމުންދާ ކަމަށް ސަރުކާރުން މީގެކުރިން ބުނެފައިވެ އެވެ.
