ލިމިޓް ބޮޑުކުރި ކަމަށް ރައީސް މުހައްމަދު މުއިއްޒު ވިދާޅުވިޔަސް ވިޔަފާރިތަކަށް ޓީޓީ ނުހެދޭ ކަމަށާއި އަމިއްލަ ފަރުދުންނަށް ކާޑުންވެސް ނުކެނޑޭ ކަމަށް އިދިކޮޅު އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ރޭ ވިދާޅުވެއްޖެ އެވެ.
އެމްޑީޕީގެ ގައުމީ މަޖިލީހުގައި ފައްޔާޒް ވިދާޅުވީ ވިޔަފާރިތަކަށް 50 ޕަސަންޓާ ހަމައަށް ޓީޓީ ދޭ ކަމަށް މުއިއްޒު ވިދާޅުވިޔަސް، ވިޔަފާރިތަކަށް 10 ޕަސަންޓާ ހަމައަށްވެސް ޓީޓީ ހެދުމަށް ފައިސާ ކަމަށެވެ. އޭނާ ވިދާޅުވީ އަމިއްލައަށް 100 ޕަސަންޓު ޑޮލަރު ލައިގެން ޓީޓީ ކުރުމުންވެސް އެ ފައިސާ ސަޕްލަޔަރާ ހިސާބަށް ދަނީ ތިން ހަފްތާ ފަހުން ކަމަށެވެ.
"މިއަދު ރައީސް މުއިއްޒު ހަމަ އެސްފިޔަވެސް ޖަހާ ނުލައި ވިދާޅުވީ 50 ޕަސަންޓު ޓީޓީ ބޭނުންވާ ކޮންމެ މީހަކަށް ދެމޭ. ރޯ ބުހުތާނު ދޮގު. އެންމެ ވިޔަފާރިވެރިއެއްވެސް، އެންމެ ވިޔަފާރިވެރިއެއްވެސް ދައްކަވާ 10 ޕަސަންޓުވެސް ޓީޓީއަކަށް ލިބިގެން އުޅޭތަން. ނުލިބޭ. އަދި އަމިއްލައަށް 100 ޕަސަންޓު ޓީޓީއަށްލީމަ ތިން ހަފްތާ އެބަދޭ ޓީޓީ ދާން. ކޮންތާކުތޯ ލާރި ބަހައްޓައިގެން މިއުޅެނީ،" ފައްޔާޒް ވިދާޅުވި އެވެ.
ފައްޔާޒް ވިދާޅުވީ ސަރުކާރުން ޑޮލަރު ދެނީ ބޭނުންވާ މީހުންނަށް ކަމަށެވެ. އެގޮތުން އެމްއެމްއޭއިން ބޭސްފަރުވާއަށޭ ކިޔާފައި އައިޑީ ކާޑު ލިސްޓެއް ލިބުމުން އެއަށް ބިނާކޮށް 1،000 ޑޮލަރު ދޫކުރަމުންދާ ކަމަށް އޭނާ ތުހުމަތު ކުރެއްވި އެވެ.
މީގެއިތުރުން ރާއްޖެއިން ބޭރުގައި ފިހާރަތަކަށާއި ހޮސްޕިޓަލުތަކުން ޑެބިޓް ކާޑާއި ކްރެޑިޓް ކާޑުން ބިލުތައް ދައްކަން މަސައްކަތް ކުރުމުން ނުކެނޑިގެން ލަދުން އެތަނަކުން ނުކުމެގެން އެތައް ބަޔަކު ދާން ޖެހިފައިވާ ކަމަށްވެސް ފައްޔާޒް ވިދާޅުވި އެވެ.
"މި ބޭފުޅުން ކުރާ ކަމަކީ 20 ޕަސަންޓު ނެގިއިރުގައިވެސް 40 ޕަސަންޓު ނެގީމަވެސް ކުރާނެ ކަމަކީ އެބޭފުޅުން ބޭނުންވާ މީހުންނަށް ވިޔަފާރިތަކަށް ލާރި މިދެނީ. އެމްއެމްއޭއިން ބޭސްފަރުވާއަށޭ ކިޔާފައި އައިޑީ ކާޑު ލިސްޓެއް އައިމަ އެއަށް 1،000 ޑޮލަރު ދެނީ. ޑެބިޓު ކާޑަކުން ލާރި ދެއްކޭ ވާހަކަ ދައްކައިފި، ކްރެޑިޓް ކާޑުން ލާރި ދެއްކޭ ވާހަކަ ދައްކައިފި. ކޮންތާކު. ރޯ ދޮގެއް. ނުކެނޑެއޭ،" ފައްޔާޒް ވިދާޅުވި އެވެ.
"އަޅުގަނޑުމެން ބޭރަށް ގޮސްފައި ކިތައް ފިހާރައަށް ވަދެފައި، ކިތައް ހޮސްޕިޓަލަށް ވަދެފައިތޯ ލަދުން ނުކުންނަން ޖެހެނީ ކްރެޑިޓް ކާޑުން، ޑެބިޓް ކާޑުން ނުކެނޑިގެން، ބިލު ނުދެއްކިގެން. ޖެހިލުމެއް ނެތި އެތާ އިނދެގެން ހަމަ ދޮގު ހަދަމުން އެދަނީ. މި ގައުމު ފުނޑުފުނޑު ކޮށްލަމުން އެދަނީ."
ފައްޔާޒް ވިދާޅުވީ މުއިއްޒުގެ ދޯހަޅި ސިޔާސަތުތަކުގެ ސަބަބުން ރާއްޖެ އެތައް އަހަރަށް ފަހަތަށް ގޮސްފައިވާ ކަމަށެވެ. އެގޮތުން ރާއްޖޭގެ އެތައް ވިޔަފާރިތަކެއް ފުނޑުފުނޑުވެފައިވާ ކަމަށްވެސް އޭނާ ވިދާޅުވި އެވެ.
ރާއްޖޭގައި ޑޮލަރުގެ ތާށިކަން އިންތިހާއަށް ބޮޑުވެ، ކަޅު ބާޒާރުގައި ޑޮލަރުގެ އަގު ވަނީ މީގެކުރިން ދުވަހަކު ނުއުފުލޭ މިންވަރަށް ބޮޑުވެފަ އެވެ. ނަމަވެސް ބީއެމްއެލްގެ އިތުރުން ސަރުކާރުން ދަނީ ޑޮލަރުގެ ތާށިކަން ރާއްޖެއަށް ދިމާނުވާ ކަމަށް ދެއްކުމަށް މަސައްކަތް ކުރަމުންނެވެ.
މިގޮތުން ކާޑު ލިމިޓްތަކާއި ޓީޓީ ލިމިޓްތައް ބޮޑުކޮށްފައިވާ ކަމަށް ސަރުކާރުން ދަނީ ބުނަމުންނެވެ. ނަމަވެސް އެއާއެކު ބީއެމްއެލް މެދުވެރިކޮށް ވިޔަފާރިތަކަށް ޓީޓީ ނުހެދޭ މައްސަލަ ވަނީ ބޮޑުވެފަ އެވެ.
ބޭންކް އޮފް މޯލްޑިވްސް އިން ދޫކުރާ ކާޑުތައް ބޭނުންކޮށްގެން ބޭރުގެ ސައިޓުތަކުން ވިޔަފާރި ނުކުރެވޭކަމުގެ ޝަކުވާތައް ބޮޑެވެ. އޭގެއިތުރުން ރާއްޖެއިން ބޭރުގައި ދިރިއުޅޭ ކިޔަވާ ކުދިންނާއި ބޭސްފަރުވާއަށްދާ މީހުންނާއި އަމިއްލަ އެހެން ފަރުދުންނަށްވެސް ކާޑުތައް ބޭނުންކޮށްގެން ވިޔަފާރި ނުކުރެވޭ ކަމުގެ ޝަކުވާތައް ބޮޑެވެ.
