ރޭގައި މާލޭގައި ކުރިއަށް ގެންދިޔަ މުޒާހަރާ ނިންމާލިފަހުން، އިދިކޮޅު މޯލްޑިވިއަން ޑިމްކްރެޓިކް ޕާޓީ (އެމްޑީޕީ) ޔޫތު ވިންގުގެ ނައިބުރައީސް ހައްޔަރުކޮށްފި އެވެ.
އަދަދު އަށް އެނގިފައިވާ ގޮތުގައި މައިމޫން ހައްޔަރުކޮށްފައި ވަނީ ރޭގެ މުޒާހަރާ ނިންމާލުމަށްފަހު، ގެއަށް ދަނިކޮށް މަގުމަތިންނެވެ. އޭނާ ހައްޔަރުކުރީ ކޯޓު އަމުރެއްގެ ދަށުންނެވެ.
މައިމޫން ހައްޔަރުކުރި ކޯޓު އަމުރުގައި ބުނީ އޭނާ ހައްޔަރުކޮށްފައި ވަނީ ހުކުރު ދުވަހުގެރޭ ޗާންދަނީ މަގުގައި އެމްޑީޕީން ކުރި މުޒާހަރާގައި މަގު ބަންދުކޮށްފައި ވަނިކޮށް އެ ތަނުގައި ފުލުހުން ޖަހާފައި ހުރި ބެރިކޭޑުތައް ދުރަށް ޖެއްސި މައްސަލައިގައި ކަމަށެވެ.
މީގެ ކުރިން އޭޕްރިލް މަހުގެ ތެރޭގައި މާލޭގައި އެމްޑީޕީން ކުރިއަށް ގެންދިޔަ މުޒާހަރާތަކާ ގުޅިގެން ވެސް ފުލުހުން މައިމޫން ހައްޔަރުކުރި އެވެ. އެފަހަރު އޭނާ ދޫކޮށްލީ ކޯޓުން ޝަރުތުތަކެއް ކުރުމަށްފަހު އެވެ.
މައިމޫންއަށް ކޯޓުން ކުރީ ހަތަރު ޝަރުތެކެވެ. އެއީ ތަހުގީގަށް އެއްބާރުލުން ދިނުމާއި ފޯނު ނަންބަރު ބަދަލުވެއްޖެ ނަމަ، އެކަން އެންގުމާއި މާލެއިން ބޭރަށް ދާނަމަ، އެކަން ކޯޓަން އެންގުމުގެ އިތުރުން، އެރޭގެ މުޒާހަރާ ތެރެއިން އަނިޔާވި ފުލުސް މީހާއާ މުއާމަލާތް ނުކުރުމެވެ.
ރައީސުލްޖުމްހޫރިއްޔާގެ މަގާމުން މުހައްމަދު މުއިއްޒު އިސްތިއުފާ ދެއްވުމާ ހަމައަށް ސިލްސިލާ ސީދާ ހަރަކާތް ހިންގުމަށް ރޭގައި ބޭއްވި އެމްޑީޕީގެ ގައުމީ މަޖިލީހުން ވަނީ ފާސްކޮށްފަ އެވެ.
އެ ނިންމުމާ އެއްގޮތަށް ރޭގެ ގައުމީ މަޖިލީހުގެ ބައްދަލުވުން ނިންމާލުމަށްފަހު، އެމްޑީޕީ މެންބަރުން ވަނީ މާލޭގައި މުޒާހަރާކޮށްފަ އެވެ.
