އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަންގެ ނައިބު މާލީގެ މަގާމަށް 30 މެންބަރުންގެ ވޯޓާއެކު އެ ޕާޓީގެ ކުރީގެ ނައިބުރައީސްކަން ކުރެއްވި މުހައްމަދު ޝިފާޒު އައްޔަނުކުރަން މިރޭ ފާސްކޮށްފި އެވެ.
އެ މަގާމަށް ޝިއްޕެ އައްޔަނުކުރަން ފާސްކުރީ މިރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ބައިވެރިވެވަޑައިގެންނެވި 34 މެންބަރުންގެ ތެރެއިން 30 މެންބަރުންގެ ވޯޓާއެކު އެވެ.
ޝިއްޕެއަކީ އެމްޑީޕީގައި ކުރިން ވަރަށް އިސް ދައުރެއް އަދާކުރެއްވި ބޭފުޅެކެވެ. ނަމަވެސް، 2023 ވަނަ އަހަރު އެ ޕާޓީގެ އެތެރޭގައި އުފެދުނު ހިޔާލުތަފާތުވުންތަކާއެކު އޭނާ ވަނީ އެ ޕާޓީން ވަކިވެވަޑައިގެން، ކުރީގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސްއާ ގުޅިވަޑައިގެންފަ އެވެ.
ދަ ޑިމޮކްރެޓްސްގައި ވެސް ނައިބުރައީސްކަން ކުރެއްވުމަށްފަހު، ޝިއްޕެ އެނބުރި އެމްޑީޕީއާ ގުޅިވަޑައިގެންނެވީ ޖެނުއަރީ 11، 2025، ގަ އެވެ. އޭނާއާ އެކު އެމްޑީޕީން ވަކިކުރި މެދު ހެންވޭރު ދާއިރާގެ ކުރީގެ މެންބަރު، އަލީ އާޒިމް ވެސް އެ ދުވަހު އެމްޑީޕީއާ ގުޅިވަޑައިގެންނެވި އެވެ.
އެމްޑީޕީގެ ޗެއާޕާސަންގެ ނައިބު މާލީގެ މަގާމު ހުސްވީ އެ މަގާމުގައި ކުރިން ހުންނެވި އަހުމަދު އަބްދުﷲ އެ މަގާމުން އިސްތިއުފާ ދެއްވުމުންނެވެ. އޭނާ އެ މަގާމުން އިސްތިއުފާދެއްވީ އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާނު ކުރައްވާފައިވާ އެ ޕާޓީގެ ކުރީގެ ރައިސް އަބްދުﷲ ޝާހިދުގެ ކެމްޕޭނުގައި ހަރަކާތްތެރިވުމަށެވެ.
