ވޮލީބޯލް އެސޯސިއޭޝަން ކަޕް (ވީއޭއެމް ކަޕް) އަންހެން ޑިވިޝަންގެ ސެމީ ފައިނަލުގެ ފުރަތަމަ ޖާގަ އެންމެ ފަހުގެ ޗެމްޕިއަން، ކްލަބް ވެމްކޯ އިން ހޯދައިފި އެވެ.
ވެމްކޯ އިން ސެމީ ފައިނަލަށް ދަތުރުކުރީ ގްރޫޕް ބީގައި އެ ޓީމުން ކުޅުނު ދެ މެޗުން ވެސް މޮޅުވެގެންނެވެ. އެ ގޮތުން، ފުރަތަމަ މެޗުގައި ކްލަބް އެމްޓީސީސީއާ ދެކޮޅަށް ކުޅެ، ވެމްކޯ އިން މޮޅުވީ ސީދާ ތިން ސެޓުންނެވެ. ދެ ވަނަ މެޗުގައި، ވެމްކޯ އިން ވަނީ މިރޭ ގުޑް ގޭމްސް ސްޕޯޓްސް އެކަޑަމީ (ޖީޖީ) އަތުން ސީދާ ތިން ސެޓުން މޮޅުވެފަ އެވެ. މި ގްރޫޕްގެ އަނެއް މެޗުން، މިއަދު ހަވީރު އެމްޓީސީސީން ވަނީ ރާއްޖެ ވޮލީބޯލް ކްލަބް ސީދާ ތިން ސެޓުން ބަލިކޮށްފަ އެވެ.
ކޮންމެ ޓީމެއް ދެ މެޗު ކުޅުނުއިރު، ގްރޫޕް ބީގެ ތާވަލުގެ ކުރީގައި އޮތީ ހަ ޕޮއިންޓާ އެކު ވެމްކޯ އެވެ. ދެ ވަނައިގައި އޮތް އެމްޓީސީސީ އާއި ތިން ވަަނައިގައި އޮތް ޖީޖީ ސްޕޯޓްސް އަށް ވަނީ ތިން ޕޮއިންޓް ލިބިފަ އެވެ. މި ގްރޫޕްގެ ފުލުގައި އޮތް ރާއްޖެ ވޮލީބޯލް ކްލަބުން ވަނީ ފުރަތަމަ ދެ މެޗުން ބަލިވެ ކަޓައިފަ އެވެ.
މި ގްރޫޕްގެ ފަހު މެޗުތައް ހުކުރު ދުވަހު އޮތްއިރު، ހަވީރު ކުޅޭ މެޗުގައި ވެމްކޯ އިން ކުޅޭނީ ރާއްޖެ ވޮލީބޯލް ކްލަބާ އެވެ. އެރޭ ކުޅޭ މެޗުގައި، އެމްޓީސީސީން ބައްދަލުކުރާނީ ޖީޖީ ސްޕޯޓްސްއާ އެެވެ. އެ މެޗުން މޮޅުވާ ޓީމަކަށް މި ގްރޫޕުން ސެމީގެ ދެ ވަނަ ޖާގަ ލިބޭނެ އެވެ.
ވެމްކޯ އިން ޖީޖީ އަތުން މޮޅުވިއިރު، ސެޓުތައް ގެންދިޔައީ، 25-12، 25-06 އަދި 25-20 އިންނެވެ. މުޅި މެޗަށް ބަލާއިރު، ވެމްކޯ އިން ކޮންޓްރޯލް ނަގައިގެން ކުޅެ، މެޗު ޑޮމިނޭޓްކުރި އެވެ. އަދި، ޓީމުގައި ހިމެނޭ ގިނަ ކުޅުންތެރިންނަށް ކުޅުމުގެ ފުރުސަތު ދިނެވެ.
ފުރަަތަމަ މެޗުން ބަލިވެފައި އޮތުމުން، އެމްޓީސީސީން މިއަދުގެ މެޗަށް ނުކުމެ، ވަރަށް ބޮޑަށް ކުޅުން ރަނގަޅުކުރި އެވެ. އެމްޓީސީސީން ރާއްޖެ ވޮލީބޯލް ކްލަބަށް އެއްވެސް ފުރުސަތެއް ނުދީ މެޗުން މޮޅުވިއިރު، ސެޓުތައް ގެންދިޔައީ، 25-08، 25-11 އަދި 25-18 އިންނެވެ.
މުބާރާތުގައި މާދަމާ އޮތީ ގްރޫޕް އޭގެ ފަހު މެޗުތަކެވެ. އެ ގޮތުން، ހަވީރު ކުޅޭ މެޗުގައި އެންމެ ފަހުގެ ރަނަރަޕް، ޕޮލިސް ކްލަބުން ކުޅޭނީ ވޮލީބޯލް ޔޫތު ނިއު ޖެނެރޭޝަންއާ އެވެ. އަދި، މާދަމާރޭ ކުޅޭ މެޗުގައި، ހުރާ ކޮމިއުނިޓީ ކްލަބުން ސިޓީ ފްރެންޑްސް ކްލަބާ ކުޅޭނެ އެވެ.
މި ނަތީޖާތަކަށް ބަލާއިރު، ގްރޫޕް އޭގެ އެއް ވަނައިގައި އޮތީ ދެ މެޗުން ހަ ޕޮއިންޓާ އެކު ހުރާ އެވެ. ދެ ވަނައިގައި އޮތް ޕޮލިހާއި ތިން ވަނައިގައި އޮތް ސިޓީ ފްރެންޑްސް އަށް ވަނީ ތިން ޕޮއިންޓް ލިބިފަ އެވެ. މި ގްރޫޕްގެ ފުލުގައި އޮތް ވޮލީބޯލް ޔޫތު ނިއު ޖެނެރޭޝަން ވަނީ ފުރަތަމަ ދެ މެޗުން ބަލިވެ، މުބާރާތުން ކަޓައިފަ އެވެ.
މި ގްރޫޕުން ސެމީގެ ފުރުސަތު އެންމެ ބޮޑީ ހުރާ އަށެވެ. ސިޓީ ފްރެންޑްސް އަތުން ފަސް ސެޓަށް ގޮސްގެން ބަލިވިޔަސް، ހުރާ އަށް ސެމީގެ ޖާގަ ލިބޭނެ އެވެ.
މިދިޔަ އަހަރުގެ ވީއޭއެމް ކަޕްގެ އަންހެން ޑިވިޝަނުގެ ފައިނަލުގައި ކުޅުނީ ޕޮލިހާއި ވެމްކޯ އެެވެ. ޕޮލިސް އަތުން ސީދާ ތިން ސެޓުން މޮޅުވެ، ވެމްކޯ އިން ވަނީ ފަސް ވަނަ ފަހަރަށް އެސޯސިއޭޝަން ކަޕްގެ ތަށި އުފުލާލައިފަ އެވެ.
