ވޮލީބޯލް އެސޯސިއޭޝަން ކަޕް (ވީއޭއެމް ކަޕް) އަންހެން ޑިވިޝަންގެ އެންމެ ފަހުގެ ޗެމްޕިއަން، ކްލަބް ވެމްކޯ އިން މި ފަހަރުގެ މުބާރާތުގައި ކުޅުނު ފުރަަތަމަ މެޗުން ފުރިހަމަ މޮޅެއް ހޯދައިފި އެވެ.
އަށް ޓީމު ވާދަކުރާ ވޮލީބޯލް އެސޯސިއޭޝަން ކަޕް (ވީއޭއެމް ކަޕް)ގެ އަންހެން ޑިވިޝަނުގައި އިއްޔެ ހަވީރާއި ރޭ ކުޅުނީ ގްރޫޕް ބީގެ މެޗުތަކެވެ. އެ ގޮތުން، ވެމްކޯ އިން އިއްޔެ ހަވީރު ކުޅުނު މެޗުގައި ސީދާ ތިން ސެޓުން ކްލަބް އެމްޓީސީސީ އަތުން މޮޅުވިއިރު، ރާއްޖެ ވޮލީބޯލް ކްލަބް އަތުން ރޭ ކުޅުނު މެޗުގައި ގުޑް ގޭމްސް ސްޕޯޓްސް ކްލަބް (ޖީޖީ ސްޕޯޓްސް ކްލަބް) ވަނީ ކުރިހޯދައިފަ އެވެ. ޖީޖީ ސްޕޯޓްސް ކްލަބުން މި މެޗުން ކުރިހޯދީ ސީދާ ތިން ސެޓުންނެވެ.
ކްލަބް އެމްޓީސީސީ އަށް އެއްވެސް ފުރުސަތެއް ނުދީ ކްލަބް ވެމްކޯ އިން އިއްޔެގެ މެޗުގައި މޮޅުވިއިރު، މެޗުގެ ސެޓުތައް ވެމްކޯ އިން ގެންދިޔައީ ވެސް ނިސްބަތުން ބަލާއިރު ރަނގަޅު ލީޑަކާ އެކު އެވެ. އެ ގޮތުން، ވެމްކޯ އިން ފުރަތަމަ ދެ ސެޓު، 25-14، 25-14 އިން ގެންގޮސް މެޗުގެ ކޮންޓްރޯލް ނެގި އެވެ. ކްލަބް އެމްޓީސީސީން މުޅި މެޗަށް ބަލާއިރު، ތިން ވަނަ ސެޓުގައި ރަނގަޅު ފައިޓެއް ދިނެވެ. އެ ގޮތުން، މި ސެޓުން އެމްޓީސީސީގެ މައްޗަށް ވެމްކޯ އަށް ކުރިހޯދުނީ 28-26 އިންނެވެ. ވެމްކޯ ޓީމުގައި އިއްޔެގެ މެޗުގައި ޓީމުގެ ސެޓަރު، ޖޫޒާން ޒަރީރުގެ އިތުރުން، ދެން ހިމެނޭ ގައުމީ ޓީމުގެ ކުޅުންތެރިން ކަމަށްވާ ނަރީމާ އިދުރީސް (ނަންނި) އާއި އައިޝަތު މާޖިދާ ވަނީ ރަނގަޅު ކުޅުމެއް ދައްކައިފަ އެވެ.
މި ގްރޫޕްގެ އަނެއް މެޗުން، ޖީޖީ ސްޕޯޓްސް އިން ވަނީ 25-14، 25-20 އަދި 25-10 އިން ސެޓުތައް ގެންގޮސް، ރާއްޖެ ވޮލީބޯލް ކްލަބް ބަލިކޮށްފަ އެވެ.
މުބާރާތުގައި މިއަދު ކުރިއަށްދާނީ ގްރޫޕް އޭގެ ދެ މެޗެވެ. ހަވީރު ކުޅޭ މެޗުގައި ހުރާ ކޮމިއުނިޓީ ކްލަބުން ކުޅޭނީ ވޮލީބޯލް ޔޫތު ނިއު ޖެނެރޭޝަންއާ އެވެ. އަދި، މިރޭ ކުޅޭ މެޗުގައި، ޕޮލިސް ކްލަބުން ވާދަކުރާނީ ސިޓީ ފްރެންޑްސް ކްލަބާ އެވެ. ހުރާ އާއި ސިޓީ ފްރެންޑްސް އިން ވަނީ މި ގްރޫޕްގައި ފުރަތަމަ ކުޅުނު މެޗުތަކުން މޮޅުވެފަ އެވެ.
މިދިޔަ އަހަރުގެ ވީއޭއެމް ކަޕްގެ އަންހެން ޑިވިޝަނުގެ ފައިނަލުގައި ކުޅުނީ ޕޮލިހާއި ވެމްކޯ އެެވެ. ޕޮލިސް އަތުން ސީދާ ތިން ސެޓުން މޮޅުވެ، ވެމްކޯ އިން ވަނީ ފަސް ވަނަ ފަހަރަށް އެސޯސިއޭޝަން ކަޕްގެ ތަށި އުފުލާލައިފަ އެވެ. ޕޮލުހުން މުބާރާތުގައި ކުރިއަށްދިއުމަށްޓަކައި، ސިޓީ ފްރެންޑްސް އަތުން ނަތީޖާ ނެރެންޖެހޭނެ އެވެ.
