ތަށި ދިފާއުކުރަން ނުކުތް ދިވެހި ސިފައިންގެ ކްލަބް ކައިރިން ބަދަލުހިފައި ކްލަބް އެމްޓީސީސީން ވޮލީބޯލް އެސޯސިއޭޝަން ކަޕް (ވީއޭއެމް ކަޕް) ގެ ފިރިހެން ޑިވިޝަންގެ ޗެމްޕިއަންކަން ހޯދައިފި އެވެ.
މެޗަކުން ބަލިނުވެ، މިދިޔަ އަހަރުގެ ޗެމްޕިއަން، ސިފައިން މި ފަހަރުގެ ވީއޭއެމް ކަޕްގެ ފައިނަލާ ހަމައަށް ދަތުރުކުރިއިރު، ގްރޫޕް ސްޓޭޖުގައި އެމްޓީސީސީ އަތުން ސީދާ ތިން ސެޓުން މޮޅުވި އެވެ. އެކަމަކު، ފައިނަލް މެޗުގައި އެމްޓީސީސީން ސިފައިންގެ މައްޗަށް ކުރިހޯދިއިރު، އެ ޓީމުން މި ފަހަރުގެ މުބާރާތުގެ ތަށި މި އުފުލާލީ އެންމެ ފަހުން ދެ ފަހަރުގެ ޗެމްޕިއަނުން ބަލިކޮށްފަ އެވެ. ސެމީ ފައިނަލުގައި އެމްޓީސީސީން ވަނީ، 2024 ވަނަ އަހަރުގެ ވީއޭއެމް ކަޕްގެ ޗެމްޕިއަން، ކްލަބް އެޗްޑީސީ އަތުން މޮޅުވެފަ އެވެ.
ޒުވާނުންގެ މަަރުކަޒުގައި މިރޭ ކުރިއަށްދިޔަ ފޯރިގަދަ ފައިނަލް މެޗުގެ ފުރަތަމަ ސޓުގައި ވެސް އެމްޓީސީސީން އެ ޓީމުގެ ތަފާތު ހިތްވަރު ދެއްކި އެވެ. އެ ގޮތުން، ސެޓުގެ އެންމެ މުހިންމު ހިސާބުގައި ޓީމު ވޯކުގެ ތަފާތު ދައްކައި، 25-23 އިން ސެޓު ގެންގޮސް އިތުބާރު ހޯދި އެވެ. އެމްޓީސީސީ ޓީމުގައި ހިމެނޭ ބްރެޒިލްގެ ދެ ކުޅުންތެރިން ކަމަށްވާ މުރީލޯ އާއި ޖޮނަސްގެ ބޭނުން އެ ޓީމުގެ ކޯޗު އިބްރާހިމް ނިޒާރު (ބޮޑޭ) މެޗަކަށް ފަހު މެޗެއް ރަނގަޅަށް ހިފަމުންދިޔަ އެވެ. އެމްޓީސީސީގެ ކެޕްޓަނަކީ، ގައުމީ ޓީމުގެ ކުރީގެ ކެޕްޓަން، އިޝާން މުހައްމަދު (ބަޓިސް)، އޭނާ އާއި މުހައްމަދު އަހުސަންގެ ރަނގަޅު މަސައްކަތުން، އެމްޓީސީސީން މުހިންމު ޕޮއިންޓްތަކެއް ހޯދައި، ދެ ވަނަ ސެޓު، 25-20 އިން ގެންގޮސް އިތުބާރު ބޮޑުކުރި އެެވެ.
ފުރަތަމަ ދެ ސެޓު ގެއްލުމާ އެކު، ސިފައިންގެ ޓީމުން ތިން ވަނަ ސެޓުގައި ފަރުވާ ބަހައްޓައިގެން ކުޅުނެވެ. ނަތީޖާ އަކަށްވީ، މި ސެޓުގެ ފަހު ކޮޅުގައި، އެ ޓީމަށް މުހިންމު ވަގުތުުގަައި އިތުބާރާ އެކު ކުޅެވުމެވެ. މި ސެޓުގައި، 23-23 އިން ވެސް އެއްވަރުވެފައި އޮއްވައި، ސިފައިންގެ ކޯޗު، ޖުނައިދު އަބްދުﷲ (މާމަ) ވަނީ ޓައިމް އައުޓެއް ނަގައިފަ އެެވެ. އެ އަށް ފަހު، ސިފައިންގެ އިންޑިއާ ކުޅުންތެރިޔާ، ނަވީދު ހާން އެ ޓީމަށް، ސެޓު ހޯދައިދޭން ޕޮއިންޓަކާ ކައިރިއަށް ގެންގޮސްދިނުމުން، އެމްޓީސީސީން ޓައިމްއައުޓެއް ނެގި އެވެ. އެކަމަކު، އެ ވަގުތަށްފަހު ކުޅެން އަރައި، ސާވިސް އަކުން ނަވީދު ހޯދި ޕޮއިންޓާ އެކު، ސެޓު، 23-25 އިން ގެންގޮސް، ސިފައިން އުންމީދެއް ހޯދި އެވެ.
ހަަތަރު ވަނަ ސެޓު ފަށައިގެން، ސިފައިން ލީޑެއް ނެގި ނަމަވެސް، އެމްޓީސީސީން ރަނގަޅަށް ފަހަތުގައި ވިއްދައިގެން ކުޅުނެވެ. ސެޓުގެ ފަހު ޕޮއިންޓާ ހަމައަށް ދިޔައީ ވަރަށް ވާންކޮށެވެ. ދެ ޓީމަށް ވެސް މި ސެޓު ހޯދަން ފުރުސަތު ލިބިގެންދިޔަ ނަމަވެސް ބޭނުންކުރެވޭ ގޮތެއްނުވި އެވެ. މި ސެޓު، 30-30 އިން އެއްވަރުވެފައިވަނިކޮށް، އެމްޓީސީސީގެ ރަނގަޅު ޑިފެންސިވް މަސައްކަތަކަށް ފަހު، ސިފައިންގެ ނަވީދު ފޮނުވާލި ބޯޅައެއް ބޭރަށް ދިއުމާ އެކު، އެމްޓީސީސީ އަށް ޕޮއިންޓް ލިބި ލީޑެއް ލިބުނެވެ. މި ފަހަރު ސެޓު ނިންމަން ލިބިފައި އޮތް ފުރުސަތުގައި، ބޭނުންނުހިފުނީ، ނަވީދު ޕޮއިންޓެއް ހޯދައިދީ، 31-31 އިން އެއްވަރުކޮށްދިނުމުންނެވެ. އެކަމަކު، އޭގެ ފަހުން، އެމްޓީސީސީން ގާތްގާތުގައި ދެ ޕޮއިންޓް ހޯދައި، 33-31 އިން ސެޓު ގެންގޮސް މެޗުން މޮޅުވީ އެވެ. މި ދެ ޕޮއިންޓް ވެސް ހޯދައިދިނީ، މެޗުގެ މޮޅު ކުޅުންތެރިޔާ، މުރީލޯ އެވެ. ފަހު ބޯޅަ ނިންމާލީ ޖަމްޕް ސާވިސް އަކުން ހޯދި ޕޮއިންޓަކުންނެވެ.
މުބާރާތުގެ ޑްރީމް ޓީމުގައި ހިމެނެނީ، އެމްޓީސީސީގެ އަހުސަން، ހުސެއިން ޔޫސުފް (ޓޯއި)، ބަޓިސް، ސިފައިންގެ ހުސެއިން ރައްޒާން އާއި މުހައްމަދު މިމްރާހް ހަސަން (މިންމި) ، ލަޔަންސްގެ އަލީ ހުޒާމް (ހުޒަންޓެ) އަދި ކްލަބް އެޗްޑީސީގެ އިސްމާއިލް ސާޖިދު (ކުޑަކާއްޓެ) އެވެ.
އެންމެ އުންމީދީ ކުޅުންތެރިއަކަށް، އެމްޓީސީސީގެ ނަވީން ފައިސަލް އެވެ. އެންމެ މޮޅު ބިދޭސީ ކުޅުންތެރިއަކަށް އެމްޓީސީސީގެ ޖޮނަސް ހޮވުނުއިރު، އެންމެ މޮޅު ކޯޗަކީ އެ ޓީމުގެ ބޮޑޭ އެވެ. އަދި، އެންމެ މޮޅު ކުޅުންތެރިއަކީ އެމްޓީސީސީގެ އަހުސަން އެެެވެ.
މުބާރާތުގެ ތިން ވަނަ ހޮވަން ކުޅުނު މެޗުގައި، ފަސް ސެޓަށް ކުޅެގެން އެޗްޑީސީ 3-2 އިން ބަލިކޮށް ލަޔަންސް ރެކްރިއޭޝަން ކްލަބުން ކާމިޔާބު ހޯދި އެވެ. މެޗުގެ ސެޓުތައް ދިޔައީ، 22-25، 17-25، 25-18، 25-16 އަދި 12-15 އިންނެވެ. ގްރޫޕް ސްޓޭޖުގައި މި ދެ ޓީމު ކުޅުނު މެޗުގައި ފަސް ސެޓަށް ގޮސްގެން ކުރިހޯދީ އެޗްޑީސީންނެވެ. އެކަމަކު، ތިން ވަނަ ހޮވި މެޗުގައި ލަޔަންސް އިން ވަނީ އެ ޓީމު ކޮޅަށް ނަތީޖާ އަނބުރާލައިފަ އެވެ.
