ވޮލީބޯލް އެސޯސިއޭޝަން ކަޕް (ވީއޭއެމް ކަޕް)ގެ ފިރިހެން ޑިވިޝަނުގެ ފަައިނަލުގައި އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބުން ކްލަބް އެމްޓީސީސީއާ ދެކޮޅަށް ނުކުންނަން ޖެހިއްޖެ އެވެ.
އެމްޓީސީސީ އާއި ސިފައިން ވާދަކުރީ އެއް ގްރޫޕެއްގަ އެވެ. ގްރޫޕް މެޗުގައި ސިފައިން ވަނީ ސީދާ ތިން ސެޓުން އެމްޓީސީ ބަލިކޮށްފަ އެވެ. އެކަމަކު، ސެމީ ފައިނަލް މެޗުގައި ގްރޫޕް އޭގެ އެއް ވަނަ ހޯދި ކްލަބް އެޗްޑީސީއާ ދެކޮޅަށް ފެނުނީ ވަރުގަދަ ރޫހެއްގައި އޮތް އެމްޓީސީސީ އެކެވެ. ފުރަތަމަ ސެޓު ގެއްލުނު ނަމަވެސް، އެޗްޑީސީ އަތުން ފަހަތުން އަރައި އެމްޓީސީސީން ވަނީ 3-1 ސެޓުން މޮޅުވެފަ އެވެ. ދެ ވަނަ ސެމީ ފައިނަލުގައި، ލަޔަންސް ރެކްރިއޭޝަން ކްލަބް އަތުން ސިފައިން މޮޅުވީ ވެސް ފަހަތުން އަރައި 3-1 ސެޓުންނެވެ.
ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވި އެޗްޑީސީން ސެމީ ފެށީ ރަނގަޅަށެވެ. މުހައްމަދު ސާޖިދު (ބޮޑުކާއްޓެ)ގެ ކޯޗުކަމުގައި ވީއޭއެމް ކަޕްގައި ކުޅޭ އެޗްޑީސީން ވަނީ ފުރަަތަމަ ސެޓު، 25-20 އިން ގެންގޮސްފަ އެވެ. އެކަމަކު، އެމްޓީސީސީ ޓީމުގައި ތިބި ބްރެޒިލްގެ ދެ ކުޅުންތެރިން ކަމަށްވާ މުރީލޯ އާއި ޖޮނަސްގެ ތަފާތާ އެކު، އެ ޓީމުގެ ކޯޗު އިބްރާހިމް ނިޒާރު (ބޮޑޭ) ރަނގަޅު މަސައްކަތްތަކެއްކޮށް، ދިވެހި ކުޅުންތެރިންގެ ހިތްވަރާ އެކު މެޗު އަނބުރާލީ އެވެ. އެމްޓީސީސީގެ ކެޕްޓަނަކީ، ގައުމީ ޓީމުގެ ކުރީގެ ކެޕްޓަން، އިޝާން މުހައްމަދު (ބަޓިސް) އެވެ.
އެމްޓީސީސީން ސެޓުތައް ގެންދިޔައީ، 21-25، 18-25 އަދި 21-25 އިންނެވެ.
ސެމީ ފައިނަލް ދެ ވަަނަ މެޗުގައި، ސިފައިން ވަނީ ފަަހަތުން އަރައި ލަޔަންސް ބަލިކޮށްފަ އެވެ. އަލީ ހުޒާމް (ހުޒަންޓެ)ގެ ކެޕްޓަންކަމުގައި ކުޅޭ ލަޔަންސް އިން ފުރަތަމަ ސެޓު، 19-25 އިން ގެންދިޔަ އެވެ. އެކަމަކު، ފުރަތަމަ ސެޓުގައި ލަޔަންސް އިން އެ ދެއްކި ކުޅުން ދެ ވަނަ ސެޓުަގައި ތަފާތު ނުކުރެވުނީ، ސިފައިން ރަނގަޅު ފޯމެއްގައި ކުޅެލުމުންނެވެ. ސިފައިން ވަނީ ދެން ކުޅުނު ތިން ސެޓު ގެންގޮސް މެޗުން މޮޅުވެފަ އެވެ. ސެޓުތައް ގެންދިޔައީ، 25-23، 25-19 އަދި 25-23 އިންނެވެ.
ސިފައިންގެ ޓީމުގައި ހިމެނޭ ބްރެޒިލްގެ ލުއިސް ފިލީޕޭ އާއި އިންޑިއާގެ ނަވީދު ހާންގެ ބޭނުން އެ ޓީމުގެ ކޯޗު، ޖުނައިދު އަބްދުﷲ (މާމަ) ވަނީ ރަނގަޅަށް ހިފައިފަ އެެވެ. އަދި، ދިވެހި ކުޅުންތެރިންނަށް ބަލާއިރު، ގައުމީ ޓީމުގެ ކުޅުންތެރިން ކަމަށްވާ ސެޓަރު، ހުސެއިން ޝާހިދު (ޝާޑު)، އާދަމް ނަަސީމް (އެޑަމް)، ހުސެއިން ރަޒާން އަދި އާދަމް ފައިރޫޒް ވެސް ވަނީ ރަނގަޅު ކުޅުމެއް ދައްކައި، ކުޅުނު ހުރިހާ މެޗަކުން މޮޅުވެގެން ފައިނަލާ ހަމައަށް ދަތުރުކޮށްފަ އެވެ.
މުބާރާތުގައި މާދަމާ ހަވީރު، 16:00 ގައި ފަށާ ތިން ވަނަ ހޮވާ މެޗުގައި، ލަޔަންސް އިން ކުޅޭނީ އެޗްޑީސީއާ އެެވެ. އަދި، މާދަމާރޭ 20:30 ގައި ފަށާ ފައިނަލުގައި އެމްޓީސީސީ އާއި ސިފައިން ވާދަކުރާނެ އެވެ.
