މިހާރު ކުރިއަށްދާ ވޮލީބޯލް އެސޯސިއޭޝަން ކަޕް (ވީއޭއެމް ކަޕް)ގެ ފިރިހެން ޑިވިޝަނުގެ ގްރޫޕް ސްޓޭޖުގެ މެޗުތައް ރޭ ނިމުނުއިރު، އެންމެ ފަހުގެ ޗެމްޕިއަން ދިވެހި ސިފައިންގެ ކްލަބާއި ކްލަބް އެޗްޑީސީން، ގްރޫޕް އެއް ވަނައިގެ ގޮތުގައި ސެމީ ފައިނަލުގައި ކުޅެން ތައްޔާރުވެއްޖެ އެވެ.
އެ ގޮތުން، މާދަމާ ހަވީރު ކުޅޭ ސެމީ ފައިނަލް ފުރަތަމަ މެޗުގައި ގްރޫޕް އޭގެ އެއް ވަނަ އެޗްޑީސީން ވާދަކުރާނީ ގްރޫޕް ބީގެ ދެ ވަނަ ކްލަބް އެމްޓީސީސީއާ އެވެ. އަދި، ގްރޫޕް ބީގެ އެއް ވަނަ ސިފައިން ނުކުންނާނީ ގްރޫޕް އޭގެ ދެ ވަަނަ ޓީމު ލަޔަންސް ރެކްރިއޭޝަން ކްލަބާ ދެކޮޅަށެވެ.
މުބާރާތުގައި އިއްޔެ ހަވީރު ކުޅެފައިވަނީ، ގްރޫޕް އޭގެ ފަހު މެޗެވެ. ޔުނައިޓެޑް ހެންވޭރިއަންސް އަތުން އެޗްޑީސީ ވަނީ ސީދާ ތިން ސެޓުން މޮޅުވެފަ އެވެ. މެޗުގެ ސެޓުތައް އެޗްޑީސީން ގެންދިޔައީ، 25-19، 25-11 އަދި 25-18 އިންނެވެ.
މުބާރާތުގައި ރޭ ކުޅެފައިވަނީ، ގްރޫޕް ބީގެ ފަހު މެޗެވެ. މި މެޗުން ކޮންމެ ޓީމެއް މޮޅުވި ކަމުގައި ވިޔަސް ގްރޫޕް ބީގެ އެއް ވަނަ ލިބޭ ގޮތަށް އޮތްއިރު، ސިފައިން ވަނީ އެމްޓީސީސީ އަށް އެއްވެސް ފުރުސަތެއް ނުދީ މެޗުން މޮޅުވެފަ އެެވެ. ސިފައިންގެ ޓީމުން މެޗުގެ ސެޓުތައް ގެންގޮސްފައިވަނީ، 25-21، 25-16 އަދި 25-21 އިންނެވެ.
މުބާރާތުގެ ސެމީ ފައިނަލް މެޗުތަކަށް ފަހު، ތިން ވަނަ ހޮވާ މެޗާއި ފައިނަލް މެޗު ކުޅުމަށް ހަމަޖެހިފައިވަނީ ބުރާސްފަތި ދުވަހު ހަވީރާއި ރޭގަނޑެވެ.
މިދިޔަ އަހަރުގެ އެސޯސިއޭޝަން ކަޕް ފައިނަލުގައި ތަށި ދިފާއުކުރަން ނުކުތް، ކްލަބް އެޗްޑީސީ ބަލިކޮށް، ޗެމްޕިއަންކަން ދިވެހި ސިފައިންގެ ކްލަބުން ހޯދީ 3-2 ސެޓުން މެޗު ކާމިޔާބުކޮށްގެންނެވެ. މި މެޗުގެ ސެޓުތައް ދިޔައީ، 26-24، 23-25، 22-25، 25-20، 15-10 އިންނެވެ.
ސޯޝަލް ސެންޓަރުގައި ކުރިއަށްދާ މި ފަހަރުގެ މުބާރާތުގެ މެޗުތައް ބަލަން ސަޕޯޓަރުން ޓިކެޓް ގަންނަން ޖެހެ އެވެ. ވޮލީބޯލް އެސޯސިއޭޝަނުން ހަަމަަޖައްސާފައިވާ ޓިކެޓްގެ އަގަކީ، 30 ރުފިޔާ އެވެ.
