އިއްޔެ ފެށި ވޮލީބޯލް އެސޯސިއޭޝަން ކަޕް (ވީއޭއެމް ކަޕް) އަންހެން ޑިވިޝަންގެ ފުރަތަަމަ މެޗުތަކުން ސިޓީ ފްރެންޑްސް ކްލަބް އާއި ހުރާ ކޮމިއުނިޓީ ކްލަބް މޮޅުވެއްޖެ އެވެ.
ޖުމްލަ އެކު އަށް ޓީމު ވާދަކުރާ ވީއޭއެމް ކަޕް އަންހެން ޑިވިޝަން ކުރިއަށްދަނީ އެންމެ ފުރަތަމަ ދެ ގްރޫޕަކަށް ބަހާލައިގެން ގްރޫޕް ސްޓޭޖެކެވެ. އެ އަށް ފަހު އެންމެ ރަނގަޅު ނަތީޖާ ނެރޭ ކޮންމެ ގްރޫޕެއްގެ ގަދަ ދެ ޓީމު ސެމީ ފައިނަލަށް ދިއުމަށް ފަހު، އޭގެ ފަހުން ތިން ވަނަ ހޮވާ މެޗާއި ފައިނަލް މެޗު ކުޅޭ ގޮތަށެވެ.
ގްރޫޕް އޭގައި ހިމެނެނީ، ޕޮލިސް ކްލަބް، ހުރާ ކޮމިއުނިޓީ ކްލަބް، ވޮލީބޯލް ޔޫތު ނިއު ޖެނެރޭޝަން އަދި ސިޓީ ފްރެންޑްސް ކްލަބް އެވެ. ގްރޫޕް ބީގައި ހިމެނެނީ، ކްލަބް ވެމްކޯ، ކްލަބް އެމްޓީސީސީ، ރާއްޖެ ވޮލީބޯލް ކްލަބް އަދި ގުޑް ގޭމްސް ސްޕޯޓްސް ކްލަބް (ޖީޖީ ސްޕޯޓްސް ކްލަބް) އެވެ.
މުބާރާތުގެ ފުރަތަމަ ދުވަހު ކުޅެފައިވަނީ ގްރޫޕް އޭގެ ދެ މެޗެވެ.
އެ ގޮތުން، ފުރަތަމަ މެޗުން ވޮލީބޯލް ޔޫތު ނިއު ޖެނެރޭޝަން އަތުން ސިޓީ ފްރެންޑްސް ކްލަބް މޮޅުވީ ސީދާ ތިން ސެޓުންނެވެ. ސެޓުތައް ގެންދިޔައީ، 25-21، 25-22 އަދި 25-21 އިންނެވެ. ދެ ވަނަ މެޗުގައި، ޕޮލިސް ކްލަބް އަތުން ހުރާ މޮޅުވީ 3-1 ސެޓުންނެވެ. މެޗުގެ ފުރަތަމަ ދެ ސެޓު، 14-25، 23-25 އިން ގެންގޮސް މެޗުގެ ކޮންޓްރޯލް ހޯދި އެވެ. ތިން ވަނަ ސެޓު ފޯރިގަދަކޮށްދިޔައިރު، ޕޮލިހުން 29-27 އިން މި ސެޓު ގެންދިޔަ އެވެ. އެހެން ނަމަވެސް، އެ ފޯމުގައި ދެން އައި ސެޓުގައި ޕޮލިހުންނަށް ނުކުޅެވުނެވެ. ހުރާ އަލުން ރަނގަޅު ފޯމުގައި ކުޅެ، 23-25 އިން ސެޓު ގެންގޮސް މެޗުން މޮޅުވީ އެވެ.
މުބާރާތުގައި މިއަދާއި މިރޭ އޮތީ ގްރޫޕް ބީގެ މެޗުތަކެވެ. މިއަދު ހަވީރު ކުޅޭ މެޗުގައި ކްލަބް ވެމްކޯ އިން ކުޅެނީ ކްލަބް އެމްޓީސީސީއާ އެވެ. އަދި، މިރޭ ކުޅޭ މެޗުގައި ރާއްޖެ ވޮލީބޯލް ކްލަބުން ނުކުންނާނީ ޖީޖީ ސްޕޯޓްސް އެކަޑަމީއާ ދެކޮޅަށެވެ.
މިދިޔަ އަހަރުގެ ވީއޭއެމް ކަޕްގެ އަންހެން ޑިވިޝަނުގެ ފައިނަލުގައި ކުޅުނީ ޕޮލިހާއި ވެމްކޯ އެެވެ. ޕޮލިސް އަތުން ސީދާ ތިން ސެޓުން މޮޅުވެ، ވެމްކޯ އިން ވަނީ ފަސް ވަނަ ފަހަރަށް އެސޯސިއޭޝަން ކަޕްގެ ތަށި އުފުލާލައިފަ އެވެ.
