ވޮލީބޯލް އެސޯސިއޭޝަން ކަޕް (ވީއޭއެމް ކަޕް) އަންހެން ޑިވިޝަންގެ ސެމީ ފައިނަލާ ގާތަށް ހުރާ ކޮމިއުނިޓީ ކްލަބުން ޖެހިލިއިރު، ޕޮލިސް ކްލަބުން މި ފަހަރުގެ މުބާރާތުގައި ފުރަތަމަ މޮޅު ހޯދައިފި އެވެ.
ގްރޫޕް އޭގެ ހަތަރު ޓީމުގެ ދެ ވަނަ މެޗުތައް އިއްޔެ ކުރިއަށްދިޔަ އެވެ. އެ ގޮތުން، އިއްޔެ ހަވީރު ކުޅުނު މެޗުން، ވޮލީބޯލް ޔޫތު ނިއު ޖެނެރޭޝަން އަތުން ހުރާ މޮޅުވީ 3-1 ސެޓުންނެވެ. އަދި، ރޭ ކުުޅުނު މެޗުން ސިޓީ ފްރެންޑްސް ކްލަބް އަތުން ޕޮލިސް މޮޅުވީ 3-0 ސެޓުންނެވެ.
މި ނަތީޖާތަކަށް ބަލާއިރު، ގްރޫޕް އޭގެ އެއް ވަނައިގައި އޮތީ ދެ މެޗުން ހަ ޕޮއިންޓާ އެކު ހުރާ އެވެ. ދެ ވަނައިގައި އޮތް ޕޮލިހާއި ތިން ވަނައިގައި އޮތް ސިޓީ ފްރެންޑްސް އަށް ވަނީ ތިން ޕޮއިންޓް ލިބިފަ އެވެ. މި ގްރޫޕްގެ ފުލުގައި އޮތް ވޮލީބޯލް ޔޫތު ނިއު ޖެނެރޭޝަން ވަނީ ފުރަތަމަ ދެ މެޗުން ބަލިވެ، މުބާރާތުން ކަޓައިފަ އެވެ.
މި ގްރޫޕްގެ ފަހު މެޗުތަކަށް ބަލާއިރު، މާދަމާ ހަވީރު ޕޮލިހުން ކުޅޭނީ ވޮލީބޯލް ޔޫތު ނިއު ޖެނެރޭޝަންއާ އެވެ. އަދި، މާދަމާރޭ ހުރާ އިން ކުޅެނީ ސިޓީ ފްރެންޑްސް ކްލަބާ އެވެ. ސިޓީ ފްރެންޑްސް އަތުން ފަސް ސެޓަށް ގޮސްގެން ބަލިވިޔަސް، ހުރާ އަށް ސެމީގެ ޖާގަ ލިބޭނެ އެވެ.
ޒުވާނުންގެ މަރުކަޒު އެތެރެ ކޯޓުގައި އިއްޔެ ހަވީރު ކުޅުނު މެޗުގައި، ހުރާ އިން މޮޅުވީ ފަހަތުން އަރަ އެވެ. ފުރަތަމަ ސެޓު، ވޮލީބޯލް ޔޫތު ނިއު ޖެނެރޭޝަން އިން 23-25 އިން ގެންދިޔަ އެވެ. އެކަމަކު، ހުރާ އިން ވަނީ ދެން ކުޅުނު ތިން ސެޓު، 25-22، 25-17 އަދި 25-19 އިން ގެންގޮސްފަ މެޗުން މޮޅުވެފަ އެވެ.
ރޭގެ މެޗުގައި ޕޮލިހުން ސިޓީ ފްރެންޑްސް ކްލަބް ބަލިކުރިއިރު، ސެޓުތައް ގެންދިޔައީ، 26-24، 25-16 އަދި 25-23 އެވެ.
މުބާރާތުގައި މިއަދު ހަވީރު ކުޅޭ މެޗުގައި، ކްލަބް އެމްޓީސީސީން ބައްދަލުކުރާނީ ރާއްޖެ ވޮލީބޯލް ކްލަބާ އެވެ. އަދި، މިރޭ ކްލަބް ވެމްކޯ އިން ބައްދަލުކުރާނީ ގުޑް ގޭމް ސްޕޯޓްސް (ޖީޖީ ސްޕޯޓްސް)އާ އެވެ. މި ގްރޫޕްގެ ފުރަތަމަ މެޗުތަކުން މޮޅުވީ، އެންމެ ފަހުގެ ޗެމްޕިއަން، ވެމްކޯ އާއި ޖީޖީ އެވެ.
