ޕޮލިސް ކްލަބް ބަލިކޮށް ލަޔަންސް ރެކްރިއޭޝަން ކްލަބުން މިހާރު ކުރިއަށްދާ ވޮލީބޯލް އެސޯސިއޭޝަން ކަޕް (ވީއޭއެމް ކަޕް)ގެ ސެމީ ފައިނަލުން ޖާގަ ހޯދައިފި އެވެ.
ސީދާ ތިން ސެޓުން ޕޮލިސް އަތުން ލަޔަންސް މޮޅުވި ނަތީޖާއާ އެކު، މި ގްރޫޕުން ކްލަބް އެޗްޑީސީން ވެސް ވަނީ ސެމީގެ ޖާގަ ހޯދައިފަ އެވެ.
އަށް ޓީމު ވާދަކުރާ އެސޯސިއޭޝަން ކަޕްގެ ގްރޫޕް އޭގެ ތާވަލަށް ބަލާއިރު، ތިން މެޗުން ލިބުނު ހަތް ޕޮއިންޓާ އެކު ލަޔަންސް މި ވަގުތު އޮތީ އެއް ވަނައިގަ އެވެ. ގްރޫޕްގެ ދެ ވަނައިގައި އޮތީ ދެ މެޗުން ފަސް ޕޮއިންޓް ހޯދި ކްލަބް އެޗްޑީސީ އެވެ. ތިން ވަނައިގައި އޮތް ޕޮލިސް ކްލަބަށް ތިން މެޗުން ލިބުނީ ތިން ޕޮއިންޓެވެ. ހަތަރެއްގައި އޮތް ޔުނައިޓެޑް ހެންވޭރިއަންސް ވަނީ ކުޅުނު ދެ މެޗުން ވެސް ބަލިވެފަ އެވެ.
މިއަދު ހަވީރު އެޗްޑީސީން ޔުނައިޓެޑް ހެންވޭރިއަންސް ބަލިކޮށްފިނަމަ، ގްރޫޕްގެ އެއް ވަނަ ޓީމުގެ ގޮތުގައި، ސެމީގައި ކުޅެން ޖެހޭނެ އެވެ.
އިއްޔެ ހަވީރު ކުޅުނު މެޗުގައި ލަޔަންސް އިން ވަނީ ފަސޭހަ ކަމާ އެކު ޕޮލިހުގެ މައްޗަށް ކުރިހޯދައިފަ އެވެ. މެޗުން މޮޅުވެގެން، ސެމީގެ ޖާގައެއް ހޯދުމުގެ ފުރުސަތު އޮތް ޕޮލިހަށް ލަޔަންސް ކައިރީގައި އެކަށީގެންވާ މަސައްކަތެއް ވެސް ނުކުރެވި ބަލިވީ އެވެ. ލަޔަންސް އިން މި މެޗުގެ ސެޓުތައް ގެންގޮސްފައިވަނީ، 25-15، 25-22 އަދި 25-20 އިންނެވެ.
ރޭ ކުރިއަށްދިޔައީ ގްރޫޕް ބީގެ މެޗެކެވެ. މި ގްރޫޕުން ސެމީގެ ދެ ޖާގަ، އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބާއި ކްލަބް އެމްޓީސީސީން ވަނީ ހޯދައިފަ އެވެ. ރޭ ކުޅުނީ މި ގްރޫޕްގެ ފުރަަތަމަ ދެ މެޗުން ބަލިވެފައި އޮތް ދަޑިމަގު ސްޕޯޓްސް އެންޑް ރެކްރިއޭޝަނާއި ސަން ސްޕޯޓްސް ކްލަބް އެވެ. މި މެޗުން، ދަޑިމަގު ވަނީ ސީދާ ތިން ސެޓުން މޮޅުވެފަ އެވެ. ދަޑިމަގުން މި މެޗުގެ ސެޓުތައް ގެންގޮސްފައިވަނީ، 25-17، 25-20 އަދި 25-23 އިންނެވެ.
މުބާރާތުގައި މިއަދާއި މިރޭ ކުޅެން ހަމަޖެހިފައިވަނީ ގްރޫޕް ސްޓޭޖުގެ ފަހު މެޗުތަކެވެ. އެއީ، ގްރޫޕް އޭގައި، މިއަދު ހަވީރު އެޗްޑީސީ އާއި ޔުނައިޓެޑް ހެންވޭރިއަންސް ކުޅޭ މެޗުގެ އިތުރުން، މިރޭ، ގްރޫޕް ބީގައި އެމްޓީސީސީ އާއި ސިފައިން ކުރިމަތިލުމަށް ހަމަޖެހިފައިވާ މެޗެވެ. މި މެޗުތަކަށް ފަހު، ގްރޫޕް އޭ އާއި ގްރޫޕް ބީން ސެމީ އަށް ދާ ޓީމުތަކުގެ ރޭންކްތައް އެނގިގެންދާނެ އެވެ.
މުބާރާތުގެ ސެމީ ފައިނަލް މެޗުތައް ކުޅެން ހަމަޖެހިފައިވަނީ، އަންނަ ބުދަ ދުވަހުގެ ހަވީރާއި ރޭގަނޑެވެ. އަދި، ތިން ވަނަ ހޮވާ މެޗު ބުރާސްފަތި ދުވަހު ހަވީރު ކުޅޭއިރު، ފައިނަލް މެޗު އެ ރޭ ކުޅޭނެ އެވެ. ސޯޝަލް ސެންޓަރުގައި ކުރިއަށްދާ މި ފަހަރުގެ މުބާރާތުގެ މެޗުތައް ބަލަން ސަޕޯޓަރުން ޓިކެޓް ގަންނަން ޖެހެ އެވެ. ވޮލީބޯލް އެސޯސިއޭޝަނުން ހަަމަަޖައްސާފައިވާ ޓިކެޓްގެ އަގަކީ، 30 ރުފިޔާ އެވެ.
