ޓްރެފިކް ފުލުހުން ހިފަހައްޓާ އުޅަނދުތައް، އެ އުޅަނދުތަކުގެ ވެރިފަރާތުން ހަވާލުނުވެ އެއް މަސް ދުވަސްވުމުން ނީލަން ކިޔުމުގެ ބާރު ޓްރާންސްޕޯޓް މިނިސްޓްރީއަށް ދީފި އެވެ.
ރައްޔިތުންގެ މަޖިލީހުން އެއްގަމު ދަތުރުފަތުރުގެ ގާނޫނު މިދިޔަ ހަފްތާގައި ފާސްކުރީ ޓްރެފިކް ފުލުހުން ހިފަހައްޓާ އުޅަނދުތަކުގެ ވެރިފަރާތުން ހަވާލުނުވެ އެއް މަސް ދުވަސްވުމުން އެ އުޅަނދަކާމެދު އަމަލުކުރާނެ ގޮތެއް ޓްރާންސްޕޯޓް މިނިސްޓްރީން 14 ދުވަސް ތެރޭގައި ކަނޑައަޅަން ޖެހޭނެ ކަމަށެވެ.
ގާނޫނުގައި މިހާރު އޮތްގޮތުން ޓޯކުރާ އުޅަނދާ ކަނޑައެޅިފައިވާ މުއްދަތުގެ ތެރޭގައި ހަވާލު ނުވެއްޖެނަމަ، އެ އުޅަނދު އާންމުކޮށް ހުޅުވާލެވޭ ނީލަމެއްގައި ވިއްކާލެވިދާނެ އެވެ. މީގެ ކުރިން އެފަދަ އުޅަނދުތައް ނައްތާލާއިރު، ގާނޫނުގައި މިހާރުވެސް ނައްތާލުމުގެ ބާރުވެސް ދީފައިވެ އެވެ.
އާންމުކޮށް ހުޅުވާލައިގެން ނީލަމުގައި އުޅަނދުތައް ވިއްކާލެވޭނީ ދައުލަތުގެ މާލިއްޔަޮތުގެ ގާނޫނާއި ގަވާއިދުގެ އިތުރުން އެއްގަމު ދަތުރުފަތުރާ ބެހޭ ގާނޫނުގެ ދަށުން ހަދާ ގަވާއިދުގައި ބަޔާންކޮށްފައިވާ ގޮތުން މަތިން ބީލަމުގެ އުސޫލުންނެވެ.
މީގެއިތުރުން ނީލަންކިޔުމާ ގުޅޭގޮތުން ބަޔާންކޮށްފައިވާ އުސޫލުތަކާއި އިޖުރާއަތުގެ އިތުރުން، އުޅަނދު ނީލަންކިޔުމުގައި އަމަލުކުރަންވާނެ ގޮތާއި އަދި ނީލަމުގައި ބައިވެރިވާ ފަރާތްތަކުން އަމަލުކުރަންޖެހޭ އުސޫލުތަކާއި އިޖުރާއަތު، ގާނޫނުގެ ދަށުން ހަދާ ގަވާއިދެއްގައި ބަޔާންކުރަން ޖެހެ އެވެ.
އުޅަނދެއް ނީލަން ކިޔައިގެންވެސް ނުވިއްކޭނަމަ އެ އުޅަނދެއް ނައްތާލުމުގެ ކަންކަން މިނިސްޓްރީން ކުރިއަށް ގެންދަން ޖެހެ އެވެ. އުޅަނދުތައް ނައްތާލަން ޖެހެނީ އޭގެ ސަބަބުން ތިމާވެއްޓަށްކުރާ އަސަރު އެންމެ ކުޑަވާނެ ގޮތަކަށް އަދި ކަމާ ގުޅޭގޮތުން ހަދާ ގަވާއިދުގައި ބަޔާންކޮށްފައިވާ އުސޫލާ އެއްގޮތަށެވެ.
އުޅަނދެއް ނައްތާލުމުގެ ހަތް ދުވަސް ކުރިން އެ އުޅަނދެއްގެ މައުލޫމާތު ސަރުކާރުގެ ގެޒެޓުގައި ޝާއިއުކުރުމުގެ އިތުރުން މިނިސްޓްރީގެ ވެބްސައިޓުގައި އަދި އެނޫންވެސް ޕްލެޓްފޯމުތަކުގައި މިނިސްޓްރީން އާންމުކުރަންވާނެ އެވެ.
ޓޯކުރާ އުޅަނދާ ހަވާލުނުވެ އެއް މަސް ދުވަސްވުމުން އެ އުޅަނދާބެހޭ މައުލޫމާތު ސަރުކާރުގެ ގެޒެޓުގައި އާންމުކުރުމުގެ އިތުރުން، ފުލުހުންވެސް އެ މައުލޫމާތު އާންމުކުރަންޖެހެ އެވެ.
ފުލުހުންނަށް އުޅަނދުތައް ޓޯކުރެވޭނީ އެ އުޅަނދެއް ގަވާއިދާ ހިލާފަށް ޕާކުކޮށްގެންނާއި އެ ނޫންވެސް ގޮތަށް ގާނޫނަށް ހިލާފަށް އަމަލުކޮށްގެންނެވެ.
