ހުޅުމާލޭގައި މި އޮގަސްޓު މަހުގެ 29 ވީ ބުރާސްފަތި ދުވަހުގެ ރޭ ހިނގި ނުރައްކާތެރި އެކްސިޑެންޓެއްގައި އަނިޔާވެ، އައިޖީއެމްއެޗްގެ ވެންޓިލޭޓަރުގައި ފަރުވާ ދެމުންދިޔަ ނުވަ އަހަރުގެ އަންހެން ކުއްޖާ ނިޔާވެއްޖެ އެވެ.
އެ ކުއްޖާ ނިޔާވިކަން އެ ކުއްޖާގެ ބައްޕަ ވަނީ މިއަދު ހެނދުނު ފޭސްބުކްގައި ކުރި ޕޯސްޓެއްގައި ކަށަވަރުކޮށްދީފަ އެވެ.
މި އެކްސިޑެންޓު ހިނގާފައި ވަނީ ހުޅުމާލެ ފޭސް 2، ވިނަރެސް 7 ފްލެޓް ކައިރީގަ އެވެ.
ފުލުހުން ބުނެފައިވާ ގޮތުގައި، އެކްސިޑެންޓް ހިނގަން މެދުވެރިވީ ހިތިގަސްމަގުން ދުއްވާފައި ދިޔަ ސައިކަލެއް، މަގުގެ އެއްފަރާތުގައި މަޑުކޮށްފައި އޮތް ކާރަކަށް އަރަން މަގާވީ ފަޅިން ހިނގާފައި ދިޔަ މީހާގެ ގައިގައި، ސައިކަލުން ޖެހިގެންނެވެ.
އުމުރުން 19 އަހަރުގެ އަންހެން ކުއްޖަކު ދުއްވަން އިން އެ ސައިކަލް އެކްސިޑެންޓުވެ، އޭނާގެ ފަހަތުގައި އިން ނުވަ އަހަރުގެ ކުއްޖާ ވެއްޓި، ބޯ ފަޅައިގެން ގޮސް، ގިނަ އަދަދެއްގެ ލޭ މަގުމައްޗަށް އޮހޮރިގެން ދިޔަ އެވެ.
އެ ކުއްޖާ އެންމެ ފުރަތަމަ ގެންދިޔައީ ހުޅުމާލޭ ހޮސްޕިޓަލަށެވެ. އެއަށް ފަހު ހާލު ސީރިއަސްވުމުގެ ސަބަބުން އިތުރު ފަރުވާއަށް އައިޖީއެމްއެޗަށް ބަދަލުކޮށް، ފަރުވާ ދެމުންދިޔައީ ވެންޓިލޭޓަރުގައެވެ.
ފުލުހުން އާންމުކޮށްފައިވާ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ހަ މަސްދުވަހު (ޖަނަވަރީ އިން ޖޫން އަށް) މާލެ އާއި ބްރިޖު ހައިވޭގައި އެކަނިވެސް 1،355 އެކްސިޑެންޓް ވަނީ ރެކޯޑުކުރެވިފަ އެވެ. މިއީ ދުވާލެއްގެ މައްޗަށް އެވްރެޖްކޮށް 7.49 އެކްސިޑެންޓެވެ.
