ފުރަވެރި އައިލެންޑް ރިސޯޓު ހިންގާ ނައިޑް އިންވެސްޓްމެންޓްސް ގެ އޮފީސްތައް ބަލައި ފާސްކޮށް، އެތަނުގެ ހިއްސާދާރެއްގެ ފޯނު ފުލުހުން މިއަދު ހިފަހައްޓައިފި އެވެ.
އަދަދު އަށް އެނގިފައިވާ ގޮތުގައި ފުލުހުން ރެއިޑްކުރީ ނައިޑް އިންވެސްޓްމެންޓްގެ އޮފީހާއި އެތަނާ ގުޅޭ އެހެން އޮފީސްތަކެވެ. އޭގެއިތުރުން ފިހާރައެއްވެސް ބަލައި ފާސްކޮށްފައިވެ އެވެ.
ފުލުހުން ބުނީ އެ އޮފީސް ބަލައި ފާސްކުރަމުން ދަނީ މޯލްޑިވްސް މަނިޓަރީ އޮތޯރިޓީން ދޫކުރާ މަނީ އެކްސްޗޭންޖު ވިޔަފާރި ހިންގުމުގެ ލައިސަންސް ނެތި ބޭރު ފައިސާ ވިއްކުމުގެ ވިޔަފާރި ފުޅާ ދާއިރާއެއްގައި ގާނޫނާ ހިލާފަށް ހިންގާ ކަމަށް ތުހުމަތު ކުރެވޭ މައްސަލައިގައި ކަމަށެވެ.
"ނައިޑް އިންވެސްޓްމެންޓް ޕްރައިވެޓް ލިމިޓެޑުން ބޭރު ފައިސާގެ ވިޔަފާރި ހިންގުމަށް ބޭނުންކުރާ ބޭންކު އެކައުންޓްތައް ފްރީޒްކުރުމަށްފަހު ތަހުގީގަށް ބޭނުންވާ އިތުރު ހެއްކާއި ގަރީނާ ހޯދުމަށްޓަކައި މ. ދަނބުގޯޅީގައި ހުންނަ އެ ކުންފުނީގެ އޮފީސް ބަލައިފާސްކުރުމުގެ އޮޕަރޭޝަނެއް ކުރިއަށް އެބަދޭ،" ފުލުހުން ފޮނުވި މެސެޖުގައި ބުންޏެވެ.
ފުރަވެރި އައިލެންޑް ރިސޯޓުގެ އިތުރުން، މަޝްހޫރު ޕޭޖް ހާޑުވެއާއަކީ ވެސް ނައިޑް ކުންފުނީގެ ވިޔަފާރިއެކެވެ. އަދި އޭގެ އިތުރުން އެ ކުންފުނިން 2022 ވަނަ އަހަރު ވަނީ ފ. އެނބުލުފުށި 3.6 މިލިއަން ރުފިޔާއަށް ގަނެފަ އެވެ.
ޑޮލަރު ވިޔަފާރި ކުރާ ފަރާތްތަކަށް ފިޔަވަޅު އަޅަން ސަރުކާރުން ފަށާފައި މި ވަނީ ދިވެހި ރުފިޔާގެ އަގު ވެއްޓި ޑޮލަރެއްގެ އަގު 23 ރުފިޔާއަށް އަރައިގެން ދިޔުމުންނެވެ. އޭގެ ފަހުން ރައީސް މުހައްމަދު މުއިއްޒު ވަނީ ޑޮލަރުގެ އަގު ހަބަރުތަކުގައި ގެނެސްދިނުން މަނާކޮށްފަ އެވެ.
ޑޮލަރު މާރުކުރަން މަޖުބޫރުވާ މިންވަރު އިތުރު ކުރަން މަޖުބޫރުވާ ބިލު ތަސްދީގު ކުރެއްވުމަށްފަހު މުހައްމަދު މުއިއްޒު ވިދާޅުވީ، ރިސޯޓުތަކަކީ ދައުލަތުގެ އެއްޗެހި ކަމަށާއި ރިސޯޓު އޯނަރު މުއްސަނދިވެފައި، އެހެން އެންމެން ދަތިހާލުގައި އުޅެން ދޫކޮށްނުލެވޭނެ ކަމަށެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރަންޖެހޭ ގޮތަށް ހަމަޖެއްސިއިރު، ރިސޯޓުތަކުން މުވައްޒަފުންގެ މުސާރަ އާއި ސާވިސް ޗާޖާއި ރިސޯޓު ސަޕްލައި އާއި ތެޔޮ ބިލާއި ޓީޖީއެސްޓީ އާއި އިންކަމް ޓެކްސް އާއި ވިތުހޯލްޑިން ޓެކްސް އާއި އާއި ރަށު ކުއްޔާއި ލޯނުތައް މިހާރު ވެސް ދައްކަނީ ޑޮލަރުންނެވެ.
