ފުރަވެރި އައިލެންޑް ރިސޯޓު ހިންގާ ނައިޑް އިންވެސްޓްމެންޓްސްގެ އެކައުންޓުތައް ފްރީޒްކޮށް އެ ކުންފުނީގެ މައި އޮފީސް ބަލައި ފާސްކުރަން ފަށައިފި އެވެ.
ފުލުހުން ބުނީ އެ އޮފީސް ބަލައި ފާސްކުރަމުން ދަނީ މޯލްޑިވްސް މަނިޓަރީ އޮތޯރިޓީން ދޫކުރާ މަނީ އެކްސްޗޭންޖު ވިޔަފާރި ހިންގުމުގެ ލައިސަންސް ނެތި ބޭރު ފައިސާ ވިއްކުމުގެ ވިޔަފާރި ފުޅާ ދާއިރާއެއްގައި ގާނޫނާ ހިލާފަށް ހިންގާކަމަށް ތުހުމަތު ކުރެވޭ މައްސަލައިގައި ކަމަށެވެ.
"ނައިޑް އިންވެސްޓްމެންޓް ޕްރައިވެޓް ލިމިޓެޑުން ބޭރު ފައިސާގެ ވިޔަފާރި ހިންގުމަށް ބޭނުންކުރާ ބޭންކު އެކައުންޓްތައް ފްރީޒްކުރުމަށްފަހު ތަހުގީގަށް ބޭނުންވާ އިތުރު ހެއްކާއި ގަރީނާ ހޯދުމަށްޓަކައި މ.ދަނބުގޯޅީގައި ހުންނަ އެ ކުންފުނީގެ އޮފީސް ބަލައިފާސްކުރުމުގެ އޮޕަރޭޝަނެއް ކުރިއަށް އެބަދެއެވެ،" ފުލުހުން ފޮނުވި މެސެޖުގައި ބުންޏެވެ.
ދަނބުމަގުގައި ހުންނަ ނިއުޓަން ގޭގެ ތިންވަނަ ފިލާގައި ފުލުހުން މިވަގުތު ދަނީ ހަރަކާތްތެރިވަމުންނެވެ.
ފުރަވެރި އައިލެންޑް ރިސޯޓުގެ އިތުރުން، މަޝްހޫރު ޕޭޖް ހާޑުވެއާއަކީ ވެސް ނައިޑް ކުންފުނީގެ ވިޔަފާރިއެކެވެ. އެ ކުންފުނިން 2022 ވަނަ އަހަރު ވަނީ ފ. އެނބުލުފުށި 3.6 މިލިއަން ރުފިޔާއަށް ގަނެފަ އެވެ.
