ހއ. ފިއްލަދޫގެ އިހްތިސާސުގެ ދަށުގައި އޮންނަ ދައްޕަރުގައި ރިސޯޓު ހަދަން ބޭނުންވާ ބަޔަކު، ކޯޕްރަލް ސޯޝަލް ރެސްޕޮންސިބިލިޓީ (ސީއެސްއާރް) ގެ ގޮތުގައި މަދުވެގެން އެއް މިލިއަން ޑޮލަރު ދޭންޖެހޭނެ ކަމަށް އެ ރަށު ކައުންސިލުން ބުންޏެވެ.
ކައުންސިލުން އާންމުކޮށްފައިވާ މައުލޫމާތުތަކަށް ބަލާއިރު ދައްޕަރު ނަގާ ބަޔަކު އެއް މިލިއަން ޑޮލަރު ސީއެސްއާރުގެ ގޮތުގައި ދިނުމުގެ އިތުރުން އެކުއިޒިޝަން ކޮސްޓުގެ ގޮތުގައި ވެސް މަދުވެގެން ހަތަރު ލައްކަ ޑޮލަރު ދައްކަންޖެހޭނެ އެވެ.
ރަށު ކުލީގެ ގޮތުގައި ކައުންސިލުން ޖަހާފައި ވަނީ އަކަމީޓަރަކަށް އަހަރަކު ތިން ޑޮލަރެވެ. ދައްޕަރަކީ ގާތްގަނޑަކަށް 2.6 މިލިއަން އަކަމީޓަރުގެ ތަންކޮޅެކެވެ. އެހެންކަމުން ރަށު ކުލީގެ ގޮތުގައި އަހަރު ލިބޭނީ ގާތްގަނޑަކަށް 6.7 މިލިއަން ޑޮލަރެވެ.
އޭގެ އިތުރުން، ދައްޕަރުގެ ބިޑު ފޮތް ވިއްކަނީ ދިވެއްސަކަށް 10،000 ރުފިޔާއަށް އަދި ބިދޭސީއަކަށް 12،000 ރުފިޔާއަށެވެ. ބިޑާއެކު ސެކިއުރިޓީގެ ގޮތުގައި 10،000 ޑޮލަރު ބަހައްޓަންޖެހެ އެވެ.
މި މަޝްރޫއަށް ބިން ކުއްޔަށް ދޫކުރުމަށް ހަމަޖެހިފައިވަނީ 50 އަހަރުގެ މުއްދަތަށެވެ. އަދި ކުލީގެ އެއްބަސްވުމުގައި ސޮއިކުރާ ތާރީހުން ފެށިގެން، އެ ތަން ތަރައްގީކުރުމަށް ގިނަވެގެން 36 މަސްދުވަހުގެ މުއްދަތެއް ލިބޭނެ އެވެ.
ދައްޕަރުގައި ފަތުރުވެރިކަން ތަރައްގީ ކުރަން ސަރުކާރުން މީގެ ކުރިން މަސައްކަތްކޮށްފައިވެ އެވެ. ނަމަވެސް އެ މަސައްކަތްތައް ކާމިޔާބުވެފައެއް ނުވެ އެވެ. ދައްޕަރުގައި ފަތުރުވެރިކަން ތަރައްގީ ކުރަން މިދިޔަ ސަރުކާރުން އެ ސަރަހައްދު އަތުލި އެވެ. ނަމަވެސް ކުރިމަތިވި ޕްރެޝަރުތަކާއެކު އަލުން ދައްޕަރު ދިނީ އެވެ.
ފިއްލަދޫގެ މީހުން ދިރިނޫޅޭ ސަރަހައްދު ވަކިކޮށް އެއީ ފަޅު ރަށެއްގެ ގޮތުގައި ކަނޑައެޅީ 2010 ވަނަ އަހަރެވެ. އެއިރު ސަރުކާރުގެ ވިސްނުމުގައި ހުރީ ހއ. އަތޮޅުގެ ފަސް ރަށެއްގައި ހައުސިން ޔުނިޓު އަޅައިދޭ ބަޔަކަށް ދައްޕަރުގައި 50 ލަގްޒަރީ ވިލާ އެޅުމަށް ދިނުމެވެ.
އެ މަސައްކަތް ނުފެށި އުޅެނިކޮށް ސަރުކާރުން ޖުލައި، 2020 ގައި އިއުލާން ކުރީ ދައްޕަރުގައި އަގުބޮޑު ގެތަކެއް އެޅުމަށްފަހު އެ ގަންނަ ބިދޭސީންނަށް ރެސިޑެންސީ ވިސާ ދޫކުރުމުގެ ވިސްނުމެކެވެ.
