މިހާރު ކުރިއަށްދާ ވޮލީބޯލް އެސޯސިއޭޝަން ކަޕް (ވީއޭއެމް ކަޕް)، ފިރިހެން ޑިވިޝަނުގައި ދިވެހި ސިފައިންގެ ކްލަބާއި ކްލަބް އެމްޓީސީސީން ކުޅުުނު ދެ ވަނަ މެޗުތަކުން ވެސް މޮޅުވެ، ބާކީ މެޗެއް އޮއްވައި ސެމީ ފައިނަލުގެ ޖާގައެއް ޔަގީންކޮށްފި އެވެ.
ޖުމްލަ އަށް ޓީމު ވާދަކުރާ ވީއޭއެމް ކަޕް ފިރިހެން ޑިވިޝަނުގެ ގްރޫޕް ބީގެ އެއް ވަނައިގައި އޮތް އެމްޓީސީސީ އަށް ހަ ޕޮއިންޓް ލިބިފައިވާއިރު، ދެ ވަނައިގައި އޮތް އެންމެ ފަހުގެ ޗެމްޕިއަން، ސިފައިންގެ އޮތީ ފަސް ޕޮއިންޓެވެ. ގްރޫޕްގެ ތިން ވަނައިގައި އޮތް ދަޑިމަގު ސްޕޯޓްސް އެންޑް ރެކްރިއޭޝަން އަށް ޕޮއިންޓެއް ލިބިފައިވާއިރު، ފުލުގައި އޮތް ސަން ސްޕޯޓްސް ކްލަބަށް އަދި ޕޮއިންޓެއް ނުލިބެ އެވެ.
ޒުވާނުންގެ މަރުކަޒު އެތެރެ ކޯޓުގައި ކުރިއަށްދާ މި މުބާރާތުގައި އިއްޔެ ހަވީރު އެމްޓީސީސީން ވަނީ ސީދާ ތިން ސެޓުން ދަޑިމަގު ސްޕޯޓްސް އެންޑް ރެކްރިއޭޝަން ބަލިކޮށްފަ އެވެ. އެމްޓީސީސީން މެޗުގެ ސެޓުތައް ގެންދިޔައީ، 25-17، 25-21 އަދި 25-22 އިންނެވެ.
މުބާރާތުގައި ރޭ ކުޅުނު މެޗުން ސަން ސްޕޯޓްސް ކްލަބް އަތުން ސިފައިން މޮޅުވީ ސީދާ ތިން ސެޓުންނެވެ. ފުރަތަމަ މެޗުގައި، ދަޑިމަގު ކައިރިން ފަސް ސެޓު ކުޅެގެން މޮޅުވި ސިފައިން ރޭ ސަން ސްޕޯޓްސް ބަލިކުރިއިރު، ސެޓުތައް ގެންދިޔައީ، 25-14، 25-08 އަދި 25-20 އިންނެވެ.
މުބާރާތުގައި މިއަދު ހަވީރު ކުޅޭނީ ގްރޫޕް އޭގެ މެޗެކެވެ. ބައްދަލުކުރާނީ، ޕޮލިސް ކްލަބާއި ލަޔަންސް ސްޕޯޓްސް ކްލަބް އެވެ. މި މެޗުން ލަޔަންސް މޮޅުވެއްޖެނަަމަ، އެ ޓީމާއި ކްލަބް އެޗްޑީސީ އަށް މި ގްރޫޕުން ސެމީ ފައިނަލް ޖާގަ ލިބިގެންދާނެ އެވެ.
މިރޭ ކުޅޭ މެޗުގައި، ގްރޫޕް ބީން ދަޑިމަގުން ވާދަކުރާނީ ސަން ސްޕޯޓްސް ކްލަބާ އެވެ. އެ މެޗުން މޮޅުވާ ޓީމަކަށް ގްރޫޕް ބީން ތިން ވަނަ ލިބޭނެ އެވެ.
މުބާރާތުގައި މާދަމާ އޮތީ ދެ ގްރޫޕްގެ ވެސް ފަހު މެޗެވެ. ހަވީރު ކުޅޭ މެޗުގައި ގްރޫޕް އޭ އިން ކްލަބް އެޗްޑީސީ ވާދަކުރާނީ ފުރަތަމަ ދެ މެޗުގައި ބަލިވެފައި އޮތް ޔުނައިޓެޑް ހެންވޭރިއަންސްއާ އެވެ. އަދި، މާދަމާރޭ ކުޅޭ މެޗު ވެގެންދާނީ ގްރޫޕް ބީގެ އެއް ވަނަ ކަނޑައަޅާ މެޗަށެވެ. އެ މެޗުގައި ބައްދަލުކުރާނީ، އެމްޓީސީސީ އާއި ސިފައިން އެވެ.
މުބާރާތުގެ ސެމީ ފައިނަލް މެޗުތައް ކުޅެން ހަމަޖެހިފައިވަނީ، އަންނަ ބުދަ ދުވަހުގެ ހަވީރާއި ރޭގަނޑެވެ. އަދި، ތިން ވަނަ ހޮވާ މެޗު ބުރާސްފަތި ދުވަހު ހަވީރު ކުޅޭއިރު، ފައިނަލް މެޗު އެ ރޭ ކުޅޭނެ އެވެ. ސޯޝަލް ސެންޓަރުގައި ކުރިއަށްދާ މި ފަހަރުގެ މުބާރާތުގެ މެޗުތައް ބަލަން ސަޕޯޓަރުން ޓިކެޓް ގަންނަން ޖެހެ އެވެ. ވޮލީބޯލް އެސޯސިއޭޝަނުން ހަަމަަޖައްސާފައިވާ ޓިކެޓްގެ އަގަކީ، 30 ރުފިޔާ އެވެ.
