ބާސެލޯނާ (ސެޕްޓެމްބަރު 1) - ސްޕެނިޝް ލީގުގެ އެންމެ ފަހުގެ ޗެމްޕިއަން، ބާސެލޯނާ އިން ރޭ ކުޅުނު މެޗުގައި ރަޔޯ ވަޔެކާނޯ އަތުން ފަހަތުން އަރައި 5-2 އިން މޮޅުވެއްޖެ އެވެ.
ބާސެލޯނާ ދަނޑުގައި ރޭ ކުޅުނު މެޗުގައި އަލްވާރޯ ގާސިއާ މެޗުގެ 12 ވަނަ މިނިޓްގައި ނަގައިދިން ހުރަހަކަށް އަރައި ސާޖިއޯ ކަމެލޯ ވަނީ ގޯލު ޖަހައި ރަޔޯ ވަޔެކާނޯ އަށް ލީޑުނަގައިދީފަ އެވެ. ބާސެލޯނާ އިން ވަނީ ފުރަތަމަ ހާފު ނިމުމުގެ ކުރިން ނަތީޖާ އަނބުރާލައިފަ އެވެ.
އެ ގޮތުން، މެޗުގެ 19 ވަނަ މިނިޓްގައި ރަޔޯގެ ކުޅުންތެރިއަކު ކައިރިން ނައްޓާފައި ތިރިތިރިން ގޯލަށް ބޯޅަ ފޮނުވާލައިގެން ރަފީނިއާ ވަނީ ބާސެލޯނާ އަށް އެއްވަރުކޮށްދީފަ އެވެ. އޭގެ ތިން މިނިޓް ފަހުން، ރަޔޯ ވަޔެކާނޯ އޭރިއާ ރޮނގުކައިރިން ގޯލުގެ މަތީ ދާގަނޑަށް ބޯޅަ އަމާޒުކޮށްލައިގެން ލަމީން ޔަމާލް ވަނީ ބާސެލޯނާ އަށް ލީޑުނަގައިދީފަ އެވެ.
ދެ ވަނަ ހާފުގެ ކުޅުން ފަށައިގެން، ހަ މިނިޓް ތެރޭ ބާސެލޯނާ އިން އިތުރު ލަނޑެއް ޖަހައި، ލީޑުފުޅާކުރި އެވެ. މިއީ، މެޗުގެ 51 ވަނަ މިނިޓްގައި ބާސެލޯނާގެ އެންތަނީ ގޯޑަން ނަގައިދިން ހުރަހެއް ދިފާއުކުރަން އުޅުމުގެ ތެރޭގައި ރަޔޯ ވަޔެކާނޯގެ ފްލޯރިއަން ލެޖުއިން އަތުން ބައިކޮޅަށް ވަން ގޯލެކެވެ. ލެޖުއިން އާއި ގޯޑަން ވަނީ އެކުގައި މީގެ ކުރިން ނިއުކާސަލް ޔުނައިޓެޑަށް ކުޅެފަ އެވެ.
ބާސެލޯނާ އިން ދެ ގޯލުގެ ލީޑެއް ނެގިތާ އަށް މިނިޓް ފަހުން، މެޗުގެ 59 ވަނަ މިނިޓްގައި ކަމެލޯ ވަނީ ބޮލުން ގޯލެއް ޖަހައި، ރަޔޯ ވަޔެކާނޯ އަށް ފަރަގުކުޑަކޮށްދީފަ އެވެ.
މެޗުގެ 71 ވަނަ މިނިޓްގައި ބާސެލޯނާގެ ހަތަރު ވަނަ ލަނޑު ޖެހީ ރަފީނިއާ އެވެ. މިއީ، ބެކްހީލް އަކުން ގޯޑަން ދިން ބޯޅައަކުން ރަފީނިއާ ޖެހި ގޯލެކެވެ. ބާސެލޯނާގެ ފަހު ލަނޑު ޖެހީ ޔަމާލް އެވެ. މިއީ، ދެ ވަނަ ހާފުގައި. ބަދަލު ކުޅުންތެރިއެއްގެ ގޮތުގައި ކުޅެން އެރި ޖަރުމަނުގެ ކަރީމް އަޑެޔޭމީ ތަނަވަސްކޮށްދިން ފުރުސަތަކުން ޔަމާލް ޖެހި ގޯލެކެވެ. މިއީ، ބާސެލޯނާ އަށް ޔަމާލް ޖަހައިދިން 51 ވަނަ ލަނޑެވެ. އޭނާ އަކީ ޔޫރަޕްގެ ވަރުގަދަ ފަސް ލީގުގެ ލީގެއްގައި އެއް ޓީމަކަށް އެ އަދަދަށް ގޯލު ޖެހި އެންމެ ހަގު ކުޅުންތެރިޔާ އެވެ.
މި މޮޅާ އެކު، ބާސެލޯނާ އިން ސްޕެނިޝް ލީގުގެ އެއް ވަނައިގައި އޮތީ ދެ ވަނައިގައި އޮތް ރެއާލް މެޑްރިޑާ އެއްވަރަށް ތިން މެޗުން ނުވަ ޕޮއިންޓް ލިބުނުއިރު، ލަނޑުގެ ތަފާތުންނެވެ. ރެއާލަށް ވުރެ ފައިދާ ގޯލަށް ބަލާއިރު، ބާސެލޯނާގެ ދެ ލަނޑު އިތުރެވެ.
