ވެލެންސިއާ، ސްޕެއިން (އޮގަސްޓް 24) - ސްޕެނިޝް ލީގުގެ އާ ސީޒަނުގައި ބާސެލޯނާ އިން ކުޅުނު ފުރަތަމަ މެޗުން އެލްޗޭ އަތުން 5-0 އިން މޮޅުވެއްޖެ އެވެ.
ރަށުންބޭރުގައި ކުުޅުނު ބާސެލޯނާ އިން ވަނީ 14 ވަަނަ މިނިޓްގައި ލީޑުނަގައިފަަ އެެެވެ. މިއީ، އެލްޗޭގެ ވިކްޓަ ޗުސްޓް އެ ޓީމުގެ އޭރިއާތެރެއިން ބާސެލޯނާގެ ރަފީނިއާ އަށް ކުރި ފައުލަކަަށް ރެފްރީ ދިން ޕެނަލްޓީ އެކެވެ. ރަފީނިއާ ވަނީ އެ ޕެނަލްޓީ ގޯލަށް ވައްދާލައި، ބާސެލޯނާ އަށް ލީޑުނަގައިދީފަ އެވެ.
ނަތީޖާ ހަަމަހަމަ ކުރެވޭތޯ އެލްޗޭ އިން އެޓޭކްތަކެއް ކުރި ނަމަވެސް އެކަން ކާމިޔާބެއްނުވި އެވެ. އަނެއްކޮޅުން، ބާސެލޯނާ އިން ވަނީ ފުރަތަމަ ހާފުގެ އިތުރު ވަގުތުގައި ދެ ވަނަ ލަނޑެއް ޖަހައި ލީޑުފުޅާކޮށްފަ އެެވެ. މި ލަނޑު ކާމިޔާބުކުރީ މި ފަަހަރުގެ ޓްރާންސްފާގައި ބޮރޫޝިއާ ޑޯޓްމަންޑުން ބާސެލޯނާއާ ގުޅުނު ފޯވާޑް، ކަރީމް އަޑެޔޭމީ އެވެ.
ދެ ވަނަ ހާފުގައި ބާސެލޯނާ އަށް ދެ ގޯލުގެ ލީޑެއް ލިބިފައި އޮތުމުން ހަމަޖެހިލައިގެން ކުޅެމުންދިޔައިރު، ހަތަރު މިނިޓްގެ ތެރޭގައި އިތުރު ދެ ގޯލު ޖެހި އެވެ. އެ ގޮތުން، 67 ވަނަ މިނިޓްގައި ރަފީނިއާ ޖެހި ގޯލާއި 71 ވަނަ މިނިޓްގައި ފާމިން ލޮޕޭޒް ކާމިޔާބުކުރި ލަނޑަށް ފުރުސަތު ތަނަވަސްކޮށްދިނީ މި ފަހަރުގެ ޓްރާންސްފާގައި ނިއުކާސަލް ޔުނައިޓެޑް ދޫކޮށް ބާސެލޯނާ އަށް ދިޔަ އެންތަނީ ގޯޑަން އެވެ.
މެޗުގައި ބާސެލޯނާ އިން ޖެހި ފަހު ގޯލު ކާމިޔާބުކުރީ ވެސް ފާމިން އެވެ. މިއީ، 79 ވަނަ މިނިޓްގައި ޒަވީ އެސްޕާޓް ދިން ބޯޅައަކުން ފާމިން ޖެހި ގޯލެކެވެ. މިދިޔަ ސީޒަނުގެ ފަހުކޮޅުގައި އަނިޔާގެ މައްސަލައެއް ދިމާވި ފާމިން އަލުން ރިކަވާވެގެން އެނބުރި އައިސް އަންނަނީ ރަނގަޅު ކުޅުމެއް ދައްކަމުންނެވެ.
ސްޕެނިޝް ލީގުގައި ރޭ އެތުލެޓިކޯ މެޑްރިޑް ކުޅުނު މެޗު ވަނީ 2-2 އިން ވިޔަރެއާލްއާ އެއްވަރުވެފަ އެވެ. މާކް ޕިއުބިލްގެ ލަނޑުން އެތުލެޓިކޯ ލީޑުނެގި މި މެޗުގައި ވިޔަރެއާލުން އެއްވަރުކުރީ ޖެރާޑް މޮރޭނޯ ޖެހި ޕެނަލްޓީންނެވެ. އަދި، ޖިއޯޖެސް މިކައުޓަޑްޒޭގެ ޕެނަލްޓީން ވިޔަަރެއާލުން ލީޑުނެގިއިރު، އެއް ކުޅުންތެރިއަކު މަދުކޮށް މެޗު ނިންމާލަން ޖެހުނު އެތުލެޓިކޯ އަށް 86 ވަނަ މިނިޓްގައި އެއްވަރުކޮށްދިނީ ޖޫލިއާނޯ ސިމިއޯނީ އެވެ. އެތުލެޓިކޯގެ ޑިފެންޑަރު، ރޮބިން ލެ ނޯމަން އަށް 76 ވަނަ މިނިޓްގައި ރަތް ކާޑެއް ދެއްކި އެވެ.
