މެޑްރިޑް (އޮގަސްޓް 30) - ސްޕެނިޝް ލީގުގައި މިރޭ ރެއާލް މެޑްރިޑުން އަމިއްލަ ދަނޑުގައި 4-0 އިން މަލާގާ ބަލިކޮށް މި ފަހަރުގެ ލީގު ސީޒަނުގައި ސައްތަ އިން ސައްތަ ރެކޯޑާ އެކު ކުރިއަށް އިތުރު ފިޔަވަޅެއް އަޅައިފި އެވެ.
ރެއާލްގެ ކޯޗަކަށް ދެ ވަނަ ފަހަރަށް ހަވާލުވި ހޯސޭ މޮރީނިއޯގެ އިރުޝާދުގެ ދަށުން މި ސީޒަނުގައި ނުކުމެ، މިހާތަނަށް ލީގުގައި ކުޅުނު ތިން މެޗުން ވެސް ރެއާލް ވަނީ މޮޅުވެފަ އެވެ. މެޗުން މެޗަށް ބަލާއިރު، ރެއާލުން އަންނަނީ ރަނގަޅު ކުރިއެރުންތަކެއް ވެސް ހޯދަމުންނެވެ. އެ ގޮތުން، ލީގުގައި ރެއާލުން ފުރަތަމަ މެޗުގައި ފަހު ވަގުތު ލަނޑު ޖަހައި، 2-1 އިން އެސްޕަންޔޯލް އަތުން މޮޅުވިއިރު، ދެ ވަނަ މެޗުގައި ރެއާލް ސޮސިއެޑާޑް އަތުން މޮޅުވީ 4-1 އިންނެވެ.
ސަންޓިއާގޯ ބާނަބެއުގައި ކުޅުނު މެޗުގައި ރެއާލުން ވަނީ މަލާގާ ކައިިރިން ފުރަތަމަ 30 މިނިޓް ތެރޭ ތިން ގޯލު ޖަހައި ރަނގަޅު ލީޑަކާ އެކު މެޗުގެ ފުރިހަމަ ކޮންޓްރޯލް ނަގައިފަ އެވެ. އެ ގޮތުން، މެޗުގެ 19 ވަނަ މިނިޓްގައި ރެއާލަށް ލީޑު ހޯދައިދިނީ މި ސީޒަނުގައި ރަނގަޅު ފޯމެއްގައި ކުޅެމުން އަންނަ އިނގިރޭސި މިޑްފީލްޑަރު، ޖޫޑް ބެލިންހަމް އެވެ. މިއީ، ބެލިންހަމް ޖެހި އިންޑިވިޖުއަލީ މޮޅު ގޯލެކެވެ. އޭނާ ވަނީ ލީގުގެ ފުރަތަމަ މެޗުގައި އެސްޕަންޔޯލް ކޮޅަށް ވެސް ލަނޑު ޖަހައިފަ އެވެ.
މެޗުގެ 26 ވަނަ މިނިޓްގައި ރެއާލުން ލީޑުފުޅާކުރި ގޯލަކީ މަލާގާގެ އަލްފަންސޯ ހެރޭރޯ އަތުން ބައިކޮޅަށް ވަން ގޯލެކެވެ. މިއީ ވެސް ބެލިންހަމްގެ ދައުރު އޮވެގެން ރެއާލުން ޖެހި ގޯލެކެވެ. ރެއާލުން ތިން ވަނަ ލަނޑު ޖެހީ ޓްރެންޓް އަލެކްސަންޑަ އާނޯލްޑް ދިން ބޯޅައަކުން، ކީލިއަން އެމްބާޕޭ އެވެ. އާނޯލްޑް ނެގި ހުރަހުން އެމްބާޕޭ މި ލަނޑު ޖެހީ ވޮލީއަކުން ގޯލަށް ބޯޅަ ވައްދާލައިގެންނެވެ.
ތިން ގޯލުގެ ލީޑެއް ލިބުމުން ރެއާލުން ހަމަޖެހިލައިގެން ކުޅެ، ދެ ވަނަ ހާފުގައި އެ ޓީމުން ބޭނުންވާ ކޮންޓްރޯލްގައި އޮވެގެން މެޗުގައި ބޭނުންވި ކްލީންޝީޓް ވެސް ފުރިހަމަ ކުރި އެވެ. އަދި، ދެ ވަނަ ހާފުގައި އެ ޓީމުން ވަނީ އިތުރު ވަގުތުގެ ތެރޭގައި ހަތަރު ވަނަ ގޯލު ވެސް ޖަހައިފަ އެވެ. މި ލަނޑަކީ ވިނީޝިއުސް ޖޫނިއާގެ މޮޅު ކުޅުމަކަށް ފަހު، ހުސްކޮށް ލިބުނު ފުުރުސަތަކުން ތުރުކީގެ މިޑްފީލްޑަރު، އާޑާ ގުލާ ޖެހި ގޯލެކެވެ.
މޮރީނިއޯ ވަނީ ރެއާލްގެ ކުރިއަށް ކުޅޭ ބެލިންހަމް، އެމްބާޕޭ އަދި ވިނީޝިއުސްގެ ކޮމްބިނޭޝަން މެޗަކަށް ފަހު މެޗެއް ރަނގަޅުވަމުންދާ ކަމަށާއި މިއީ ސީޒަނުގައި ކުރިއަށްދާއިރު، ރެއާލުގައި ފެންނާނެ އެންމެ ބޮޑު ތަފާތަށްވާނެ ކަމަށެވެ.
