ބާސެލޯނާ (އޮގަސްޓް 30) - އެތުލެޓިކޯ މެޑްރިޑުން މި ފަހަރުގެ ޓްރާންސްފާ މާކެޓްގައި އާޖެންޓީނާގެ ފޯވާޑް، ހޫލިއަން އަލްވަރޭޒް އެއްވެސް ގޮތަކަށް ނުވިއްކާނެ ކަމަށް ތަކުރާރުކޮށް ބުނަމުންދިއުމާ އެކު، އޭނާ ހޯދަން މަސައްކަތްކުރަމުން އަންނަ ބާސެލޯނާ އިން އާސެނަލްގެ ބްރެޒިލް ފޯވާޑް، ގަބްރިއެލް ޖީސޫސް ގަންނަން މަަސައްކަތް ފަށައިފި އެވެ.
އެތުލެޓިކޯ މެޑްރިޑުން އަންނަނީ ބާސެލޯނާ އަށް މި ފަހަރުގެ ޓްރާންސްފާގައި އަދި ކުރިއަށް އޮތްތަނުގައި ވެސް އަލްވަރޭޒް ނުވިއްކާނެ ކަމަށް ބުނަމުންނެވެ. ރޮބަޓް ލެވަންޑޯސްކ ީ އާއި ފެރާން ޓޮރޭޒް، ބާސެލޯނާ އިން ދިއުމާ އެކު، އާ ފޯވާޑެއް ގެންނަން ބާސެލޯނާ އިން ކުރާ މަސައްކަތުގައި އެންމެ ގެންނަން ބޭނުންވީ އަލްވަރޭޒް އެވެ. އޭނާ ނުލިބޭތީ، އިންޓަގެ ފޯވާޑް، ލައުޓާރޯ މާޓީނޭޒް ގެންނަން ކުރި މަސައްކަތް ވެސް ކުރިއަށްނުދިޔަ އެެވެ.
ކުރިން މެންޗެސްޓާ ސިޓީ އަށް ކުޅުނު ޖީސޫސް، 29، ގަންނަން ބާސެލޯނާ އިން 12 މިލިއަން ޑޮލަރުގެ ފީއެއް ދައްކާނެ ކަމަށް ރިޕޯޓްތައް ބުނެ އެވެ. އަދި، އެ އަގަށް އާސެނަލުން ވެސް އެއްބަސްވެފައިވާތީވެ، އަންގާރަ ދުވަހުގެ ނިޔަލަށް އޮތް ޓްރާންސްފާ މާކެޓް ނިމުމުގެ ކުރިން ޖީސޫސްގެ ޑީލުގެ ކޮންޓްރެކްޓް ވެސް ނިމެނޭނެ ކަމަށް ބެލެވެ އެވެ.
ޖީސޫސް ވެގެންދާނީ މި ފަހަރުގެ ޓްރާންސްފާގައި ބާސެލޯނާ އިން އިނގިރޭސި ޕްރިމިއާ ލީގުގެ ކްލަބަކުން ގެންދާނެ ތިން ވަނަ ކުޅުންތެރިޔާ އަށެވެ. އެ ގޮތުން، ބާސެލޯނާ އިން ވަނީ ނިއުކާސަލްގެ ވިންގް، އެންތަނީ ގޯޑަން އާއި މެންޗެސްޓާ ސިޓީގެ ރޮޑްރީގޯ (ރޮޑްރީ)ގެ ޑީލް ވެސް ނިންމައިފަ އެވެ.
މީގެ ހަތަރު އަހަރު ކުރިން، ސިޓީން 55 މިލިއަން ޑޮލަރު (45 މިލިއަން ޕައުންޑް) އަށް އާސެނަލަށް ޖީސޫސް ވިއްކާލިއިރު، އޭނާ ވަނީ އެ ޓީމަށް ކުޅެދިން 123 މެޗުން 32 ލަނޑު ޖަހައި، 22 ލަނޑު ޖަަހަން ފުރުސަތު ހޯދައިދީފަ އެވެ. މިދިޔަ ސީޒަނުގައި އާސެނަލުން އިނގިރޭސި ޕްރިމިއާ ލީގުގެ ޗެމްޕިއަންކަން ހޯދި ޓީމުގައި ލިބުނު ފުރުސަތުތަކުގައި ޖީސޫސް ވަނީ ތަޖުރިބާގެ ބޭނުންކޮށް ރަނގަޅު ކުޅުމެއް ދައްކައިފަ އެވެ.
ބްރެޒިލްގެ ޕަލްމެއިރާސް އިން ކެރިއަރު ފަށައި މޮޅު ކުޅުމެއް ދެއްކި، ޖީސޫސް، 2016 ވަނަ އަހަރު އެ ޓީމު ދޫކޮށްލައި ޔޫރަޕަށް މިސްރާބު ޖެހި އެވެ. ޕަލްމެއިރާސް ދޫކޮށް އޭނާ ސިޓީ އަށް ސޮއިކުރީ 40 މިލިއަން ޑޮލަރުގެ ޑީލެއްގަ އެވެ.
