ލަންޑަން (ސެޕްޓެމްބަރު 1) - އިނގިރޭސި ޕްރިމިއާ ލީގުގައި ރޭ ބުކާޔޯ ސަކާ ޖެހި ހަމައެކަނި ގޯލުން 1-0 އިން އެސްޓަން ވިލާ ބަލިކޮށް ޗެމްޕިއަން، އާސެނަލުން އެ ޓީމުގެ މޮޅުވުމުގެ ފޯމު ދަމަހައްޓައިފި އެވެ.
މިދިޔަ ސީޒަނުގައި ފަހު ވަގުތު އެސްޓަން ވިލާ ދަނޑުގައި އާސެނަލް ބަލިވިއިރު، ރޭގެ މެޗުގައި އެ ޓީމުން ވަނީ ޖުމްލަ ގޮތެއްގައި ރަނގަޅު ކުޅުމެއް ދައްކައިފަ އެވެ. އާސެނަލުން ވަނީ މި ފަހަރު ލީގުގެ ފުރަތަމަ މެޗުގައި ކަވެންޓްރީ ސިޓީ އަތުން 3-0 އިން މޮޅުވެފަ އެވެ. ރޭގެ މެޗުގައި އާސެނަލުން ރަނގަޅަށް ފަށައި ފުރުސަތުތައް ހޯދަން ވެސް ފެށި އެވެ.
ވިލާ ޕާކުގައި ރޭ ކުުޅުނު މެޗުގެ ފުރަތަމަ ހާފުގައި އެސްޓަން ވިލާގެ އެމީ ބުއެންޑީއާ އޭރިއާބޭރުން ޖެހި ބޯޅައެއް ވަނީ ގޯލުގެ ހުރަސްދަނޑި އަށް އަމާޒުވެފަ އެވެ. އެކަމަކު، އެ ބޯޅަ ގޯލަށް ވަން ކަމުގައި ވިޔަސް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި އެ ގޯލު ބަލައިނުގަތުމުގެ ފުރުސަތު އެބައޮތެވެ. އެއީ، އެ ޓޭކުގައި ފައުލެއް ހިނގާފައިވާތީ އެވެ.
ރޭގެ މެޗުގައި ފެނިގެންދިޔަ ހަމައެކަނި ލަނޑު އާސެނަލުން ޖެހީ 59 ވަނަ މިނިޓްގަ އެވެ. މިއީ، އޭރިއާތެރެއިން އާސެނަލްގެ އިޓަލީ ޑިފެންޑަރު، ރިކާޑޯ ކަލަފިއޯރީ އަރައި ނަގައިދިން ހުރަހަކުން ސަކާ ޖެހި ގޯލެކެވެ. މިއީ، ކެރިއަރުގައި ސަކާ، ވިލާ ޕާކުގައި ޖެހި ތިން ވަނަ ގޯލެވެ.
އާސެނަލުން މި ގޯލު ޖެހުމުގެ އިރުކޮޅެއް ކުރިން، އާސެނަލަށް ޕެނަލްޓީއެއް ދިނުމަށް ފަހު، ފަހުން ވީއޭއާރް އިން ބަލާފައި ފައުލު ހިނގީ އޭރިއާބޭރުން ކަމަށްވާތީވެ، ހިލޭ ޖެހުމަކަށް ބަދަލުކުރި އެވެ. މިއީ، ސަކާ އަށް ވިލާގެ އިއަން މާޓްސެން ކުރި ފައުލެކެވެ.
އާސެނަލަށް ދެ ވަނަ ލަނޑެއް ޖަހައިދޭން، ކައި ހަވާޓްޒް އަށް ލިބުނު ބޯޅައަކުން ފޮނުވާލި ޝޮޓް، އެސްޓަން ވިލާގެ ގޯލުގައި ފުރަތަމަ ފަހަރަށް ކުޅުނު ޖަޕާންގެ ކީޕަރު، ޒިއޯން ސުޒޫކީ ވަނީ މަތަކޮށްފަ އެވެ.
މި މެޗުގައި އެސްޓަން ވިލާ އަށް އާސެނަލްގެ ގޯލާ އަމާޒުކޮށް އެންމެ ހަމަލާއެއް ވެސް ފޮނުވާލެވިފައިނުވެ އެވެ. މިއީ، މި ފަދަ ރެކޯޑަކާ އެކު، މިދިޔަ 10 އަހަރު ތެރޭ ވިލާ އިން ނިންމާލި ފުރަތަމަ މެޗެވެ. އެ ޓީމަށް އެންމެ ފަހުން އަމިއްލަ ދަނޑުގައި ގޯލާ ސީދާކޮށް ހަމަލާއެއް ފޮނުވާލެވިފައިނުވަނީ، 2016 ވަނަ އަހަރުގެ މެއި މަހު ނިއުކާސަލް ޔުނައިޓެޑާ ކުޅުނު މެޗުގަ އެވެ. މި ފަަހަރުގެ ލީގުަގައި އެސްޓަން ވިލާ ކުޅުނު ދެ މެޗުން ބަލިވިއިރު، ގޯލެއް ވެސް ނުޖެހެ އެވެ.
