ލަންޑަން (އޮގަސްޓް 25) - އިނގިރޭސި. ޕްރިމިއާ ލީގުގައި މިރޭ ފުލަމް 3-2 އިން ބަލިކޮށް ޗެލްސީން މޮޅަކުން ލީގު ސީޒަން ފަށައިފި އެވެ.
މި މެޗަކީ މި ސީޒަނުގައި ޗެލްސީއާ ހަވާލުވި ކޯޗު، ޒަބީ އަލޮންސޯ އާއި ފުލަމްގެ ކޯޗަކަށް ގެނައި އަލްވާރޯ އާބެލޯގެ ފުރަތަމަ މެޗެވެ. އަލޮންސޯ އާއި އާބެލޯއާ އަކީ މިދިޔަ ސީޒަނުގައި ރެއާލް މެޑްރިޑްގެ ކޯޗުންނެވެ. ރެއާލުން ސީޒަން ފެށީ އަލޮންސޯއާ އެކު އެވެ. އެހެން ނަމަވެސް އޭނާ ވަކިކޮށް، ޓީމު ހަވާލުކުރީ އާބެލޯއާއާ އެވެ.
ފުލަމްގެ ދަނޑު ކްރޭވަން ކޮޓޭޖްގައި ކުޅުނު މެޗު ފަށައިގެން، 31 ސިކުންތު ތެރޭގައި ޗެލްސީން ލީޑުނެގި އެވެ. މިއީ، ޗެލްސީގެ ކޯލް ޕާމާ. ދިން ބޯޅައަކުން ޖޮއާއޯ ޕެޑްރޯ ޖެހި ގޯލެކެވެ. އޭނާ ވަނީ ހަމަޖެހިލައިފައި ފުލަމް ކީޕަރު، ބާން ލޭނޯ ގައިމަތިން ގޯލަށް ބޯޅަ ވައްދާލައިފަ އެވެ. މިއީ، މިހާތަނަށް ޕްރިމިއާ ލީގުގެ ތާރީހުގައި ވެސް އާ ސީޒަނެއް ފަށައިގެން ޓީމަކުން ޖެހި އެންމެ އަވަސް ގޯލެވެ.
މަޑުމަޑުން ކުޅުން ރަނގަޅުކޮށް މެޗުގެ ތެރެއަށް އައި ފުލަމް އިން ވަނީ، 23 ވަނަ މިނިޓްގައި ގޯލެއް ޖަހައި ނަތީޖާ ހަމަހަމަކޮށްފަ އެވެ. މިއީ އޭރިއާތެރެއިން، ތިރިތިރިން ގޯލަށް ބޯޅަ ފޮނުވާލަައިގެން، ޖޯޝް ކިންގް ޖެހި ގޯލެކެވެ. އެ ބޯޅަ ގޯލަށް ވަނީ ޗެލްސީގެ ކީޕަރު ރޮބާޓް ސަންޗޭޒް އަތްދަށުންނެވެ. އޭގެ ފަހުން، ފުލަމް އަށް ލީޑުނަގައިދޭން ސްޕެއިނުގެ ފޯވާޑް، ގޮންޒާލޯ ގާސިއާ އަށް ލިބުނު ފުރުސަތުގެ ބޭނުން ނުކުރެވުނެވެ.
ޗެލްސީން ވަނީ ފުރަތަމަ ހާފު ނިމުމުގެ ކުރިން ލަނޑެއް ޖަހައި އަލުން ލީޑުނަަގައިފަ އެވެ. މި ގޯލުގައި ފެނިގެންދިޔައީ، މި ފަހަރުގެ ޓްރާންސްފާގައި ޗެލްސީން ގެނައި ދެ ކުޅުންތެރިންގެ ކޮމްބިނޭޝަނެކެެވެ. އެ ގޮތުން، ކްރިސްޓަލް ޕެލަސް އިން ގެނައި ފްރާންސްގެ ޑިފެންޑަރު، މެކްސެންސް ލަކްރޮއާ ދިން ބޯޅައަކުން މި ލަނޑު ޖެހީ އެސްޓަން ވިލާ އަށް ރެކޯޑް އަގެއް ދީފައި ސޮއިކުރި އިނގިރޭސި މިޑްފީލްޑަރު، މޯގަން ރޮޖާސް އެވެ.
ދެ ވަނަ ހާފު ފަށައިގެން މާ ލަސްތަކެއް ނުވެ، ޗެލްސީން ތިން ވަނަ ލަނޑެއް ޖަހައި، ލީޑުފުޅާކުރި އެވެ. މެޗުގެ 49 ވަނަ މިނިޓްގައި، ޖޮއާއޯ ޕެޑްރޯ ދިން ބޯޅައަކުން އޭރިއާތެރެއިން ޕާމާ ވަނީ ގޯލަށް ބޯޅަ ފޮނުވާލައިގެން ޗެލްސީގެ ލީޑުފުޅާކޮށްދީފަ އެވެ. މި ލަނޑު ޖެހުމުގެ ކުރިން، ޕާމާ ފޮނުވާލި ހަމަލާއެއް ދިޔައީ ދަނޑިކައިރިން ބޭރުންނެވެ.
ޗެލްސީން ދެ ގޯލުގެ ލީޑެއް ނެގިތާ މާ ލަސްތަކެއް ނުވެ، ފުލަމް އިން ލަނޑު ޖަހައި ފަރަގު ކުޑަކުރި އެވެ. އެ ގޮތުން، 54 ވަނަ މިނިޓްގައި ފުލަމްގެ ފުލްބެކް، ޓިމޮތީ ކަސްޓާންޏާ ޖެހި ޝޮޓެއް ކީޕަރު ސަންޗޭޒް އަތުގައި ޖެހިފައި ރީބައުންސް ނުކުތް ވަގުތު ގާސިއާ ވަނީ ބޮލުން ގޯލަށް ބޯޅަ ފޮނުވާލައިފަ އެވެ.
ފުލަމް އަށް އެއްވަރުކޮށްދޭން މެޗުގެ 76 ވަނަ މިނިޓްގައި އެ ޓީމުގެ ފުލްބެކް، އެންޓޮނީ ރޮބިންސަން އަށް ލިބުނު ފުރުސަތުން ޖެހި ބޯޅަ ބޭރަށް ދިޔައިރު، ބަދަލަކަށް އެރި ރަޔާން ސެސެންޔޯން ޖެހި ޝޮޓެއް ކީޕަރު ސަންޗޭޒް ވަނީ މަތަކޮށްފަ އެވެ.
މެޗުގެ 90 ވަނަ މިނިޓްގައި ޗެލްސީގެ ޖޮއާއޯ ޕެޑްރޯ ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ.
