ކުރިއަށް އޮތް ރިޔާސީ އިންތިހާބު ކާމިޔާބުކުރެވިއްޖެ ނަމަ، ގާއިމުކުރާނީ ހުރިހާ ރައްޔިތުންނަށް ހަމަހަމަ، ވިޔަފާރިތަކަށް ފުދުންތެރި އިންސާފުވެރި ދިވެހިރާއްޖެއެއް ކަމަށް އެމްޑީޕީގެ ކުރީގެ ރައީސް، އަބްދުﷲ ޝާހިދު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާނުކުރެއްވުމަށްފަހު، ވާހަކަދައްކަވަމުން ޝާހިދު ވިދާޅުވީ ދިވެހިރާއްޖެ މިހާރު އޮތީ ވަރަށް ނުބައި ފައްތަރެއްގައި ކަމަށެވެ. އެގޮތުން، ރާއްޖޭގެ ތަރައްގީގެ މަޝްރޫއުތައް ހުއްޓިފައިވާ ކަމަށާއި ރާއްޖޭގެ އިގުތިސާދު އެއްކޮށް އަޑިއަޅާލައިފައިވާކަން އޭނާ ފާހަގަކުރެއްވި އެވެ. އެކަންކަން އިސްލާހު ކުރެވޭނީ ކަމުގެ ތަޖުރިބާ ހުރި ބަޔަކަށް ކަމަށާއި އެ ބަޔަކީ އެމްޑީޕީ ކަމަށް އޭނާ ވިދާޅުވި އެވެ.
"[އަޅުގަނޑު ގާއިމުކޮށްދޭނީ] ހުރިހާ ރައްޔިތުން، ހަމަ ހުރިހާ ރައްޔިތުން ހަމަހަމަ، އިންކްލޫސިވް، ޓްރާންސްޕޭރެންޓު، ރައްޔިތުންގެ ދިރިއުޅުން ބަދަލުކޮށްދޭނެ ސިޔާސަތުތަކަކުން ރައްޔިތުންގެ ހިތަށް ތަސައްލީއެއް ލިބިދޭނެ ސަރުކާރެއް،" ޝާހިދު ވިދާޅުވި އެވެ.
ރިޔާސީ ޕްރައިމަރީގައި ވާޑަކުރައްވާނެކަން އިއުލާނުކުރައްވައި އެމްޑީޕީގެ ރައީސްކަމުން ޝާހިދު އިސްތިއުފާދެއްވައިފި
އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިޢުލާނުކުރައްވައި، އެ ޕާޓީގެ ރައީސްކަމުގެ މަގާމުން އަބްދުﷲ ޝާހިދު އިސްތިއުފާދެއްވައިފިއެވެ. ޝާހިދު މިކަން ހާމަކުރެއްވީ އައްޑޫ ސިޓީގައި މިރޭ ބޭއްވި ޚާއްޞަ ޖަލްސާއެއްގައެވެ.
އޭނާގެ ވެރިކަމެއް ވާނީ އިސްލާމްދީނުގެ މަތިވެރިވެގެންވާ އަސާސްތަކުގެ މަތީގައި ރައްޔިތުން ދިރިއުޅޭނެ އޯގާތެރި މުޖުތަމައުއެއް އޮތް ވެރިކަމަކަށް ކަމަށް ޝާހިދު ވިދާޅުވި އެވެ. އަދި، ބައިނަލްއަގުވާމީ ދުނިޔެއާ ރާއްޖޭގެ ގުޅުން އިހުނަށްވުރެ ރަނގަޅުކޮށް، ރާއްޖޭގެ ވިޔަފާރިތަކަށް ފަހި ދުވަސްތަކެއް އޭނާގެ ވެރިކަމެއްގައި ގެނެސްދެއްވާނެކަމަށް ޝާހިދު ވައުދުވެވަޑައިގެންނެވި އެވެ.
"ފުނޑި މުރަނަވަމުންދާ ދިވެހި އިގުތިސާދު އިތުރަށް ހީނަރުވިޔަ ނުދީ ކޮޅަށްޖަހައި ބައިނަލްއަގުވާމީ މާލީ އިދާރާތަކާއި ފޮރިން އިންވެސްޓްމެންޓުތަކާއި އަވައްޓެރި ގައުމުތަކާއި އަޅުގަނޑުމެންނާ ރަހުމަތްތެރިކަން އޮތް އެތައް، އެތައް ސަތޭކަ ގައުމަކާ އެކުގައި ކުރެވޭ މަސައްކަތްތަކާއި، ވަކީން ހާއްސަކޮށް ވިޔަފާރިތަކަށް، ވަކީން ހާއްސަކޮށް އަމިއްލަ ވިޔަފާރިތަކަށް ފަހި މާހައުލެއް އަޅުގަނޑު ގާއިމުކޮށްދޭނަން،" ޝާހިދު ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާނުކުރެއްވުމަށްފަހު، ޝާހިދު މިރޭ ވަނީ އެ ޕާޓީގެ ރައީސްކަމުން އިސްތިއުފާދެއްވައިފަ އެވެ. އެ މަގާމުން އިސްތިއުފާދެއްވަމުން ޝާހިދު ވިދާޅުވީ، ޕާޓީގެ އިސް މަގާމެއްގައި ހުންނަވައިގެން ވާދަވެރި އެތެރޭގެ އިންތިހާބުތަކުގައި ވާދަކުރުމާއި ކެންޑިޑޭޓުންނަށް ތާއީދުކުރުމަކީ އޭނާ ގަބޫލުކުރައްވާ ހަމައެއް ނޫން ކަމަށެވެ.
ޝާހިދުގެ އިތުރުން، ކުރީގެ ނައިބުރައީސް، ފައިސަލް ނަސީމު އާއި ކުރީގެ އިކޮނޮމިކް މިނިސްޓަރު، ފައްޔާޒް އިސްމާއިލްގެ އިތުރުން ކުރީގެ ރައީސް، އިބްރާހިމް މުހައްމަދު ސޯލިހު ވެސް ވަނީ އެމްޑީޕީގެ ޕްރައިމަރީގައި ވާދަކުރައްވާނެކަން އިއުލާނުކުރައްވައިފަ އެވެ.
އެމްޑީޕީގެ ޕްރައިމަރީގައި ވާދަކުރައްވާނެކަން އިއުލާނުކުރެއްވުމަށްފަހު، ޝާހިދު ވިދާޅުވީ އޭނާގެ ވެރިކަމެއްގައި އެމްޑީޕީގެ އެއްވެސް މެންބަރަކު ބާކީ ނުކުރައްވާނެ ކަމަށެވެ.
"ﷲ ގެ އިރާދަފުޅާއި ރަހުމަތްފުޅުން ރަންރީނދޫ ދޯދިތަކުން އަލުން މި ރާއްޖެ ޖަރީވެގެންދާނެ، އަލުން މި ރާއްޖެ ދިއްލިގެންދާނެ، މި ރާއްޖެ އަލުން އަނބުރާ ރައްޔިތުންގެ އަތްމައްޗަށް ލިބިގެންދާނެ، ރަންރީނދޫ ކުލައިން މި ރާއްޖެ ފަވާލެވިގެންދާނެ،" ޝާހިދު ވިދާޅުވި އެވެ.
މިރޭގެ ޖަލްސާގައި އެމްޑީޕީގެ ޕީޖީ ލީޑަރު، އިބްރާހިމް ނާޒިލް އާއި މަރަދޫ ދާޢިރާގެ މެންބަރު، އަހުމަދު ދީދީގެ އިތުރުން، އައްޑޫ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސް، ފާތިމަތު ހިޖްރާ އަދި، އެމްޑީޕީގެ ކުރީގެ ޗެއާޕާސަން މޫސާ މަނިކު (ރީކޯ) އާއި މަޖިލީހުގެ ކުރީގެ ބައެއް މެންބަރުން ބައިވެރިވެވަޑައިގެންނެވި އެވެ.
