މިއާމީ، ޔުނައިޓެޑް ސްޓޭޓްސް (އޮގަސްޓް 11) - ކެރިއަރުގެ ބޮޑުބައި ހޭދަކުރި ބާސެލޯނާ ދޫކޮށްލުމަށް ފަހު، ޕީއެސްޖީ އަށް ކުޅުނު ދެ އަހަރަކީ އުފާވެރިކޮށް ދިޔަ ދުވަސްތަކެއް ނޫން ކަމަށް އާޖެންޓީނާގެ ކެޕްޓަން، ލިއޮނަލް މެސީ ބުނެފި އެވެ.
އުމުރުން 39 އަހަރުގެ މެސީ ވަނީ، 2021 އިން 2023 އަށް ޕީއެސްޖީ އަށް ކުޅެފަ އެވެ. އެ މުއްދަތުގައި އޭނާއާ އެއް ޓީމަށް ޕީއެސްޖީގައި ކުޅުނު ކުޅުންތެރިންނަށް ބަލާއިރު، ބްރެޒިލްގެ ނޭމާ، ފްރާންސްގެ ކީލިއަން އެމްބާޕޭ އަދި ސްޕެއިނުގެ ސާޖިއޯ ރާމޯސް ހިމެނެ އެވެ.
ދެ ސީޒަން ޕީއެސްޖީ އަށް ކުޅުމަށް ފަހު، 2023 ވަނަ އަހަރުގެ ޖޫން މަހު، މެސީ ވަނީ އެމެރިކާ ލީގު، މޭޖަ ލީގު ސޮކާގެ އިންޓަ މިއާމީ އަށް ބަދަލުވެފަ އެވެ. ބާސެލޯނާގައި 22 އަހަރު ހޭދަކުރި މެސީ، އިންޓަ މިއާމީ އަށް ބަދަލުވުމަށް ފަަހު، ކެރިއަރުގެ ކުރީކޮޅާއި އެންމެ ރަނގަޅު އަހަރުތަކާ ބެހޭގޮތުން ވަނީ އެކި ފަހަރު މަތިން ވާހަކަ ދައްކައިފަ އެވެ. އެ ގޮތުން، ޕީއެސްޖީގައި ހޭދަކުރި ދެ ސީޒަނުގެ ވާހަކަތައް ހިއްސާކުރާ ކޮންމެ ފަހަރަކު، ނުތަނަވަސްކަން ފެނެ އެވެ.
"ބާސެލޯނާ ދޫކޮށްލަން ޖެހުނީ ވެސް ދެރަކޮށް، ދެން، އަހަރެން ޕެރިހުގައި ދެ އަހަރު ހޭދަކުރީ. އަހަރެން އެހާ ބޮޑަށް ގަޔާވި ނޫނީ އުފާކުރި ކަމެއް ވެސް ނޫން އެއީ. ދުވަހުން ދުވަހަށް ބަަލާނަމަ އަހަރެން ހުރީ އުފަލަކުންނެއް ވެސް ނޫން. މެޗުތައް ވެސް، ޓްރެއިނިން ވެސް ވީ ވަރަށް އުނދަގޫ ކަމަކަށް އަހަރެން އެ މާހައުލަށް ހޭނެން،" މެސީ ބުންޏެވެ.
މަޝްހޫރު ތަރި، ޑޭވިޑް ބެކަމްގެ ހިއްސާ އޮންނަ އިންޓަ މިއާމީގެ ކެޕްޓަންކަން މިހާރު ކުރަމުން އަންނަ މެސީ، ޕީއެސްޖީގައި ހޭދަކުރި ދެ އަހަރު ވަނީ، 75 މެޗުން 32 ލަނޑު ޖަހައި، 35 ލަނޑު ޖަހަން ފުރުސަތު ތަނަވަސްކޮށްދީފަ އެވެ. އަދި، ފްރެންޗް ލީގުގެ ޗެމްޕިއަންކަން ދެ ސީޒަނުގައި ވެސް ހޯދި މެސީ ވަނީ ފްރެންޗް ސުޕަ ކަޕް ތަށި ވެސް އުފުލާލައިފަ އެވެ.
އާޖެންޓީނާއާ އެކު، 2022 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށް، މި ފަހަރުގެ ވޯލްޑް ކަޕްގެ ފައިނަލުގައި ވެސް ކުޅުނު މެސީ މި ވަގުތު ކުޅުމާ ދުރުގައި ހުރީ، އާއިލާ އަށް ވަގުތު ދިނުމުގެ ގޮތުންނެެވެ. ދާދި ފަހުން މެސީގެ ބައްޕަ، ޖޯޖް މެސީ ވަނީ އުމުރުން 68 އަހަރުގައި މަރުވެފަ އެވެ. އެއީ، ގިނަ ދުވަސްތަކެއް ވަންދެން ބަލިވެ އުޅުމަށް ފަަހު އެވެ.
