ދިވެހިން ނިކަމެތިކަމުގައި އުޅެންޖެހުމުގެ ޒިންމާ ނަގަންޖެހޭނީ ފަތުރުވެރިކަމުގެ ވިޔަފާރި ކުރާ ރިސޯޓުތަކުގެ ވެރިން ކަމަށް ދޭހަވާ ފަދަ މޭރުމަކުން ރައީސް މުހައްމަދު މުއިއްޒު މިއަދު ވާހަކަ ދައްކަވައިފި އެވެ.
ރިސޯޓުތަކަށް ލިބޭ ބޭރު ފައިސާގެ އާމްދަނީގެ 40 ޕަސެންޓް މާރުކުރަންޖެހޭ ގޮތަށް ފާސް ކުރި ބިލު ތަސްދީގު ކުރެއްވުމަށްފަހު ވާހަކަ ދައްކަވަމުން މުއިއްޒު ވަނީ، ފަތުރުވެރިކަމުގެ ވިޔަފާރި ކުރާ ބޭފުޅުންނަށް ވަރަށް ބޮޑަށް ފާޑުވިދާޅުވެފަ އެވެ.
މިއަދުގެ ބައްދަލުވުމުގައި ވާހަކަ ދައްކަވަމުން، ވަރަށް ނުރުހުމާއެކު މުއިއްޒު ވިދާޅުވީ، ރިސޯޓުތަކުގެ އޯނަރުން މުއްސަނދިވެފައި އެހެން އެންމެން ނިކަމެތިކަމުގައި އުޅެން ނުޖެހޭނެ ކަމަށެވެ.
"ކީއްވެތޯ ވަކި ބަޔަކު މުއްސަނދިވެފައި އެހެން ހުރިހާ އެންމެން ސަފާކުރަން [ނިކަމެތިކަމުގައި އުޅެން] ޖެހެނީ. ނުޖެހޭނެ އެކަން ކުރާކަށް، އަޅުގަނޑު މިކަމާ އުޅެން ފެށީމާ ބައެއް ބޭފުޅުން ވިދާޅުވި ރާއްޖޭގެ ބަޖެޓު ކުޑަކުރާށޭ، ރައްޔިތުންނަށް ވެފައި ހުރި ވައުދުތައް ހުއްޓާލާށޭ،" ރައީސް ވިދާޅުވި އެވެ.
މުއިއްޒު ވިދާޅުވީ، ރިސޯޓުތަކުން 40 ޕަސެންޓު މާރު ކުރަން މަޖުބޫރު ކުރުމުގެ ބަދަލުގައި ހަރަދާއި އިސްރާފު މަޑުޖައްސާލަން އެމަނިކުފާނަށް ބައެއް ބޭފުޅުން ނަސޭހަތްދެއްވި ކަމަށެވެ.
"އަޅުގަނޑު ވީ ވައުދުތައްތޯ ހުއްޓާލަންވީ ނޫނިއްޔާ ތިމަންނަމެން ރިސޯޓު ހިންގައިގެން ލިބޭ ޑޮލަރުން ރައްޔިތުންނަށް ހައްގު މިންވަރު ދޭންވީތޯ، މިއީ ކުރަންވީ ސުވާލަކީ ތި ބޭފުޅުން ނޫސްވެރިން ވެސް. ކާކަށްތޯ އޮޅުވާލަނީ، އަމިއްލަ ނަފްސަށް އޮޅުވާލަނީ ކީއްކުރަންތޯ،" އެމަނިކުފާނު ވިދާޅުވި އެވެ.
ރިސޯޓުތަކަކީ ދައުލަތުގެ އެއްޗެހި ކަމަށް ވިދާޅުވެ، މުއިއްޒު މިއަދު ވަނީ ރިސޯޓު އޯނަރުންނަށް އިންޒާރެއް ވެސް ދެއްވައިފަ އެވެ.
"ރައްޔިތުންގެ ހައްގު އެބައޮތޭ، ރާއްޖޭގައޭ މި ހިންގަނީ މި ރިސޯޓުތައް. މިއީ ދައުލަތުގެ އެއްޗެއްސޭ. ދައުލަތުގެ އެއްޗެހި މިއީ. އެހެންވީމާ އަޅުގަނޑުމެން ކަންކަން ކުރަނީ ޒިންމާދާރުކަމާއެކީގައި،" މުއިއްޒު ވިދާޅުވި އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރަންޖެހޭ ގޮތަށް ހަމަޖެއްސިއިރު، ރިސޯޓުތަކުން މުވައްޒަފުންގެ މުސާރަ އާއި ސާވިސް ޗާޖާއި ރިސޯޓު ސަޕްލައި އާއި ތެޔޮ ބިލާއި ޓީޖީއެސްޓީ އާއި އިންކަމް ޓެކްސް އާއި ވިތުހޯލްޑިން ޓެކްސް އާއި އާއި ރަށު ކުއްޔާއި ލޯނުތައް މިހާރު ވެސް ދައްކަނީ ޑޮލަރުންނެވެ.
