ބޭރު ފައިސާއިން ލިބޭ އާމްދަނީގެ 40 ޕަސެންޓު ދިވެހި ރުފިޔާއަށް މާރު ކުރުމަކީ އެއްވެސް ރިސޯޓަކަށް ދަތިވާނެ ކަމެއް ނޫން ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ބޭރު ފައިސާއާ ބެހޭ ގާނޫނަށް ގެނައި ބަދަލު ތަސްދީގު ކުރެއްވުމަށްފަހު ވާހަކަ ދައްކަވަމުން މުއިއްޒު ވިދާޅުވީ ބޭރުގެ ފައިސާގެ އާމްދަނީ އިން 40 ޕަސެންޓު މާރުކުރަން ރިސޯޓުތަކަށް "އެއްވެސް ދަތިކަމެއް ނޯންނާނެކަން" ޔަގީންކަމާއެކު އެނގިވަޑައިގަންނަވާ ކަމަށެވެ.
"އަޅުގަނޑު ހަމަ ވަރަށް އަދަބުވެރިކަމާއެކީގައި ދަންނަވާލަން ބޭނުން ރިސޯޓުތަކުން 40 އިންސައްތަ މާރުކުރުމަކަށް އެއްވެސް ދަތިކަމެއް ނޯންނާނެ ކަމަށް އަޅުގަނޑުމެންނަށް ޔަގީންކަމާއެކީގައި އެނގޭ. ރިސޯޓުތައް ހަދަން ނަގާފައިވާ ލޯނުތައް ދެއްކުމަށް ނޫނީއްޔާ މުވައްޒަފުންނަށް މުސާރަ ދިނުމަށް ނޫނިއްޔާ އޮޕަރޭޝަނަލް އެކްސްޕެންސޭސްތަކަކަށް އެއްވެސް ދައްޗެއް ނުވާނެ 40 އިންސައްތަ މާރުކޮށްގެންނެއް. އެއީ ޔަގީންކަމެއް،" ރައީސް ވިދާޅުވި އެވެ.
މުއިއްޒު ވިދާޅުވީ، ބައެއް ރިސޯޓުތަކުން ޑޮލަރު ގިނަވެގެން ކަޅު ބާޒާރުގައި އަގުބޮޑުކޮށް މާރު ކުރަމުންދާ ކަމަށެވެ. އެގޮތަށް ކަޅު ބާޒާރަށް ޑޮލަރު ވިއްކާނީ މާރު ކުރެވޭ ވަރަށް އަތުގައި ޑޮލަރު ހުރުމުން ކަމަށް ވެސް ރައީސް ވިދާޅުވި އެވެ.
"މިހާރު ވެސް އެބަ ފެނޭ، ނޫސްތަކުން ވެސް އެބަ ފެނޭ އަދި އެހެން ގޮތްގޮތުން ވެސް އެނަ އެނގޭ ކަޅު ބާޒާރުގައި ބޮޑު އަގުގައި ހަމަ ބައެއް ފަރާތްތަކުން މާރުކުރަމުން އެބަދޭ. ޔަގީނުން ވެސް ފައިސާ އެކްސެސްކޮށް ހުރީމަ އެކަން ކުރާނީ. ދެން އެހެން ނޫނަސް ހިސާބުކިތާބުތަކުން ވަރަށް ސާފުކޮށް ފެންނަން އެބަ އޮތް 40 އިންސައްތަ މާރުކުރުމަކީ އެއްވެސް ރިސޯޓަކަށް ދަތިވާނެ ކަމެއް ނޫންކަން،" އެމަނިކުފާނު ވިދާޅުވި އެވެ.
އެ ހަފުލާގައި ވާހަކަ ދައްކަވަމުން މުއިއްޒު ވިދާޅުވީ، ޑޮލަރު މާރު ކުރަންޖެހޭ މިންވަރު އިތުރު ކުރުމުގެ ސީދާ ފައިދާ ރައްޔިތުންނަށް ލިބޭނެ ކަމަށެވެ.
"ސީދާ ރައްޔިތުންނަށް މީގެން ފައިދާވެގެންދާ ގޮތަކީ، މި އިތުރުވެގެންދާ އިންސައްތައިގެ ސަބަބުން، 20 އިންސައްތައިން 40 އިންސައްތައަށް މާރުކުރުން އިތުރުވެގެންދިޔުމުން އެ ލިބޭ ފައިސާ ބޭނުން ކުރުމަށް އަޅުގަނޑުމެން ގަސްދު ކުރަނީ ރާއްޖެއަށް އިމްޕޯޓް ކުރާ މުދަލަށް ފައިސާ ދެއްކުމާއި ޓީވީ ހެދުމާއި އަސާސީ މުދަލަށް ހާއްސަކޮށް،" ރައީސް ވިދާޅުވި އެވެ.
