ރައްޔިތުންގެ މަޖިލީހުގެ ނިމިގެންދިޔަ ދައުރުގައި ފާސްކުރި ހަތް ބިލެއް ރައީސް މުހައްމަދު މުއިއްޒު މިއަދު ތަސްދީގުކުރައްވައިފި އެވެ.
މި ބިލުތައް މުއިއްޒު ތަސްދީގުކުރެއްވީ މިހާރު ރައީސް އޮފީހުގައި ކުރިއަށްދާ ރަސްމިއްޔާތެއްގަ އެވެ. އެ ރަސްމިއްޔާތުގައި ދައުލަތުގެ ވަޒީރުން ވެސް އަންނަނީ ބައިވެރިވަމުންނެވެ.
މުއިއްޒު ތަސްދީގުކުރެއްވި ބިލުތަކުގެ ތެރޭގައި ރިސޯޓުތަކަށް ލިބޭ ޑޮލަރުގެ 40 ޕަސެންޓު ރާއްޖޭގެ ބޭންކުތަކަށް މާރުކުރަން މަޖުބޫރުވާ ގޮތަށް ގެނައި ބަދަލާއި ރަސްމީ ރޭޓަށްވުރެ ބޮޑުކޮށް ޑޮލަރު ވިއްކާ ވާހަކަ ނުދެއްކޭ ގޮތަށް ގެނައި ބަދަލު ހިމެނެ އެވެ.
ހަމައެހެންމެ، ފަޅު ރަށްރަށް ކުއްޔަށް ދިނުމުގެ އެންމެހާ ބާރެއް ރައީސުލްޖުމްހޫރިއްޔާއަށް ލިބޭ ގޮތަށް އަލަށް އެކުލަވާލި ގާނޫނެއް ވެސް މުއިއްޒު ވަނީ ތަސްދީގުކުރައްވާފަ އެވެ.
މަސްވެރިކަމުގެ ގާނޫނަށް ދެވަނަ އިސްލާހު ގެނައުމުގެ ބިލާއި ޓެކްސްއާ ގުޅޭ ދެ ބިލެއް ވެސް މުއިއްޒު ތަސްދީގުކުރެއްވި އެވެ. އަދި، އެއްގަމު ދަތުރުފަތުރާ ގުޅޭ ބިލެއް ވެސް މުއިއްޒު ތަސްދީގުކުރެއްވި އެވެ.
ކައުންސިލްތަކުގެ ބިންތައް ސަރުކާރަށް އަތުލުވޭ ގޮތަށް ގާނޫނަށް ގެނައި ބަދަލު މިއަދު މުއިއްޒު ތަސްދީގުކުރައްވާފައެއް ނުވެ އެވެ.
