ރައީސުލްޖުމްހޫރިއްޔާގެ މަގާމުން މުހައްމަދު މުއިއްޒު އިސްތިއުފާ ދެއްވުމާ ހަމައަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ސިލްސިލާ ސީދާ ހަރަކާތް ހިންގުމަށް އެ ޕާޓީގެ ގައުމީ މަޖިލީހަށް ކުރީގެ ރައީސް މުހައްމަދު ނަޝީދު މިރޭ ގަރާރެއް ހުށަހަޅުއްވަން އުޅޭކަން އެނގިއްޖެ އެވެ.
އަދަދު އަށް އެނގިފައިވާ ގޮތުގައި އެމްޑީޕީގެ ގައުމީ މަޖިލީހަށް އެ ޕާޓީގެ ޗެއާޕާސަން ނަޝީދު ހުށަހަޅުއްވާ ގަރާރުގައި އޮތީ މުއިއްޒު އަޅުއްވަމުން ގެންދަވާ ޒިންމާދާރުކަން ކުޑަ ފިޔަވަޅުތައް އެޅުން ހުއްޓާލެއްވުމަށާއި، އެމްޑީޕީއާއެކު އެއް މޭޒަކަށް ވަޑައިގެން ރާއްޖޭގެ އިގްތިސާދީ އަދި މާލީ މައްސަލަތައް ހައްލުކުރަން މަސައްކަތް ނުކުރެވޭނަމަ އެ ޕާޓީން ސިލްސިލާ ސީދާ ހަރަކާތް ހިންގާ ގޮތަށެވެ.
"ދިވެހި ރައްޔިތުންގެ ޑިމޮކްރެޓިކް ޕާޓީއިން އަނެއްކާވެސް ރައީސް ޑރ. މުހައްމަދު މުއިއްޒް އަށް ގޮވާލަނީ، ދިވެހިރާއްޖޭގެ އިގްތިސާދު މިހައި ހީނަރުވެފައި އޮތް ވަގުތެއްގައި ސަރުކާރުން އަޅަމުންދާ އެފަދަ ޒިންމާދާރުކަން ކުޑަ ފިޔަވޅުތައް އެޅުން ހުއްޓާލުމަށާއި، މި ޕާޓީ އާއި އެކު އެއް މޭޒެއްގެ ދޮށަށް ވަޑައިގެން ރާއްޖޭގެ އިގްތިސާދީ އަދި މާލީ މައްސަލަތައް ހައްލުކުރުމަށް،" ގަރާރުގައި ބުންޏެވެ.
"އަދި މި މަގުން ކަންކަން ހައްލު ކުރެއްވުމަށް އުޒުވެރިވާނަމަ، ރައީސް ޑރ. މުހައްމަދު މުއިއްޒު މަގާމުން އިސްތިއުފާ ދެއްވުމަށްދާންދެން މި ޕާޓީގެ އެކިއެކި ސީދާ ހަރަކާތްތައް ކުރިއަށް ގެންދިޔުމަށް."
މީގެއިތުރުން އެމްޑީޕީން ކުރިއަށްގެންދާ މި ސިލްސިލާ ސީދާ ހަރަކާތަށް މާލީ ގޮތުންނާއި އެހެނިހެން ގޮތްގޮތުންވެސް ވިޔަފާރިތަކުން އެހީތެރިވުމަށް ގަރާރުގައި ގޮވާލައިފައިވެ އެވެ.
އެމްޑީޕީގެ ގައުމީ މަޖިލިސް މެންބަރުން ތިއްބަވާ ވަޓްސްއަޕް ގްރޫޕަށް ނަޝީދު ފޮނުއްވި މެސެޖެއްގައި ވިދާޅުވީ އެމަނިކުފާނު ހުށަހަޅުއްވާ މި ގަރާރަށް ވީހާވެސް ގިނަ މެންބަރުން ތައީދުކޮށްދެއްވުމަށް އެދިވަޑައިގަންނަވާ ކަމަށެވެ.
އެ ގަރާރުގައި ބުނެފައިވަނީ މުއިއްޒު ތަންފީޒުކުރަން ފައްޓަވާފައިވާ ދޯހަޅި އިގްތިސާދީ އަދި މާލީ ސިޔާސަތުތަކުގެ ސަބަބުން ނުކުންނާނެ ނޭދެވޭ އެތައް ގެއްލުމެއް ހުރިކަން އެމްޑީޕީއަށް ތަސައްވަރު ކުރެވޭ ކަމަށެވެ. އެގޮތުން ރިސޯޓޫތަކަށް ލިބޭ ބޭރު ފައިސާގެ އާމްދަނީގެ 40 ޕަސަންޓު ދިވެހި ރުފިޔާއަށް މާރުކުރުމަށް ލާޒިމު ކުރުމުން ނުކުމެދާނެ ނޭދެވޭ އެތައް ނަތީޖާއެއްވެސް ހުރި ކަމަށް ގަރާރުގައި ބުނެފައިވެ އެވެ.
"ދިވެހިރާއްޖެއަށް ވަންނަ ޑޮލަރު އިތުރުކުރުމަށް އަޅަން ޖެހޭ އެންމެ މުހިންމު ފިޔަވަޅަކީ ވިޔަފާރިވެރިން ސަރުކާރުގެ މާލީ އަދި އިގްތިސާދީ ސިޔާސަތަށް ކުރާ އިތުބާރު ބޮޑުކުރުން ކަމަށްވެފައި، ވިަޔފާރިވެރިންގެ ފައިސާ ރާއްޖޭގައި ބެހެއްޓުމުން އެމީހުންނަށް ގެއްލުން ނުވާނެ ކަމުގެ ފުރިހަމަ ޔަގީންކަން އެމީހުންނަށް ލިބުމަކީ އިންތިހާއަށް މުހިންމު ކަމެއް،" ނަޝީދު ހުށަހަޅުއްވާ ގަރާރުގައި ބުންޏެވެ.
މީގެއިތުރުން ޑޮލަރުގެ އަގު ތިރިނުވެ ތަކެތީގެ އަގުތައްވެސް ތިރިކުރުމަށް އަޅަން އެންމެ އެކަށީގެންވާ އަދި މުހިންމު ފިޔަވަޅުތަކަކީ ރާއްޖެއިން ބޭރަށް ދައްކަންޖެހޭ ޑޮލަރުގެ މިންވަރު ކުޑަކުރުން ކަމަށްވާއިރު، އެކަންވެސް ނުކުރެވޭ ކަމަށް ގަރާރުގައި ފާހަގަކޮށްފައިވެ އެވެ.
