ށ. ފޯކައިދޫ ފެނަކަ ބްރާންޗުގައި މަސައްކަތް ކުރަމުންދިޔަ 13 މުވައްޒަފަކު ވަޒީފާއިން ވަކިކުރުމާ ގުޅިގެން، އެ ރަށުގައި ރޭ އިހުތިޖާޖުކޮށް ރައީސް މުހައްމަދު މުއިއްޒުގެ އިސްތިއުފާއަށް ގޮވާލައިފި އެވެ.
ފޯކައިދޫ ބަނދަރުމަތިން ފެށިގެން ހިނގާފައި ގޮސް އެރަށު ފެނަކަ ބްރާންޗު ކުރިމަތީގައި ޒުވާނުންނާއި އާންމުން އެއްވެ ކުރިއަށްގެންދިޔަ އިހުތިޖާޖުގައި، ރައްޔިތުންނަށް އަނިޔާކުރުމާއި ރައްޔިތުން ބިކަކޮށްލުން ހުއްޓާލުމަށް ވަނީ ގޮވާލާފައެވެ.
"ވަޒީފާއިން ވަކިކުރެވިދާނެ، ނަމަވެސް ހިތްވަރެއް ބަލި ނުކުރެވޭނެ" ފަދަ ޝިއާރުތައް އުފިލި މި އެއްވުމުގައި އިސްކޮށް ހަރަކާތްތެރިވީ ފޯކައިދޫގެ އެމްޑީޕީގެ މެންބަރުންނެވެ. މިއީ ފޯކައިދޫން ދެކުނު އެންމެ އަނިޔާވެރި، އަދިރި ދުވަސްތައް ކަމަށް ސިފަކޮށް، މުޒާހަރާގެ ބައިވެރިން ވަނީ މި ވެރިކަން ބަދަލުކުރާނެ ކަމަށް ބުނެފަ އެވެ.
މި އިހުތިޖާޖުގެ ބައިވެރިން ވަނީ ވަކިކުރި މުވައްޒަފުންގެ ހައްގުތައް ހޯދައިދިނުމަށް ފެނަކައަށް ގޮވާލައި، ފޯކައިދޫ ފެނަކަ ބްރާންޗުގެ ވެރިންނާއި، ދާއިރާގެ މެންބަރުގެ އިސްތިއުފާއަށް އަދި އެރަށުގެ ޕީއެންސީ ސްޓެއަރިން ކޮމިޓީގެ މެންބަރުންގެ އިސްތިއުފާއަށް ވެސް ގޮވާލައިފަ އެވެ.
ފޯކައިދޫ ކައުންސިލުން އިއްޔެ ނެރުނު ބަޔާނެއްގައި ވަނީ، އެއްވެސް އިންޒާރަކާ ނުލައި ކުއްލި ގޮތަކަށް 13 މުވައްޒަފުން ވަޒީފާއިން ވަކިކޮށް، 13 އާއިލާ ބިކަކޮށްލި މައްސަލަ ހަރުކަށި އިބާރާތުން ކުށްވެރިކޮށްފަ އެވެ.
ކައުންސިލުގެ ބަޔާނުގައި ފާހަގަކޮށްފައިވާ ގޮތުގައި، ވަޒީފާގެ ކަށަވަރުކަން ދެއްވާނެ ކަމަށް ވިދާޅުވެ ރައީސް މުހައްމަދު މުއިއްޒު ވެވަޑައިގެންނެވި ރިޔާސީ ވައުދާ ހިލާފަށް، ކުންފުނި ރައިޓްސައިޒުކުރުމުގެ ނަމުގައި އިދިކޮޅު ސިޔާސީ ފިކުރުގެ މީހުން ބަލިކަށިކޮށްލުމަށް ވަކި ބަޔަކަށް އަމާޒުކޮށް ވަޒީފާއިން ވަކިކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫނެވެ.
"ކުންފުނިތައް ރައިޓްސައިޒުކުރުމުގެ ނަމުގައި އާދައިގެ މުވައްޒަފުން ވަޒީފާއިން ވަކިކޮށް ގިނަ އާއިލާތަކެއް ނިކަމެތިކޮށް ހާލުގައި ޖެއްސުމަށް ފަހު، ސިޔާސީ ބޮޑެތި މަގާމުތަކަށް ބޮޑެތި މުސާރަ ލިބޭ ގޮތަށް އިތުރު ވަޒީފާތައް އުފައްދަމުން ދިއުމަކީ ވެސް ވަކި ބަޔަކަށް ނާޖާއިޒު މަންފާ ހޯދައިދިނުމަށް ހިންގާ ނާތަހުޒީބު އަމަލެއް،" ކައުންސިލުގެ ބަޔާނުގައިވެއެވެ.
މިއީ ސިޔާސީ ގޮތުން ރައްޔިތުން ބަލިކަށިކޮށް އަޅުވެތިކުރުމަށްޓަކައި އަޅަމުންދާ އަނިޔާވެރި ފިޔަވަޅުތަކެއް ކަމަށް ދެކޭ ކަމަށާއި، ވަޒީފާއިން ވަކިކުރި މުވައްޒަފުންނަށް އިންސާފު ހޯދައިދިނުމަށް ކަމާބެހޭ އެންމެހައި މުއައްސަސާތަކަށް ފޯކައިދޫ ކައުންސިލުން ވަނީ ގޮވާލާފަ އެވެ.
