ޑޮލަރުގެ ތާށިކަން ކުރިމަތިވެ ކާރިސާއަކަށް ބަދަލުވެފައިވާއިރު، އާންމު ރައްޔިތުންނަށް ދަތިވާ ސިޔާސަތުތައް ސަރުކާރުން އެކުލަވައިލާތީ ރައީސުލްޖުމްހޫރިއްޔާ މުހައްމަދު މުއިއްޒުގެ އިސްތިއުފާއަށް ގޮވާ އަޑު ގަދަވާން ފަށައިފި އެވެ.
ސަރުކާރުން އަޅަމުންދާ ފިޔަވަޅުތަކާއެކު ވެސް ޑޮލަރުގެ ތާށިކަމާއި މުދަލުގެ އަގުބޮޑުވާ މައްސަލައަށް އެއްވެސް ލުޔެއް ނުލިބޭ މައްސައިގައި ސޯޝަލްމީޑިއާގައި ހިޔާލުފާޅުކުރި ގިނަ ބަޔަކު ދަނީ މުއިއްޒުގެ އިސްތިއުފާއަށް ގޮވައި ޕޯސްޓުތައް ކުރަމުންނެވެ.
އެގޮތުން ހިޔާލުފާޅުކުރި ބައެއް މީހުން ބުނެފައި ވަނީ މި ސަރުކާރުގެ ސިޔާސަތުތަކުގެ ސަބަބުން ލިބެމުންދާ ގެއްލުންތައް ވަރަށް ބޮޑުވެއްޖެ ކަމަށާއި މިހާރު ފުދިއްޖެ ކަމަށެވެ.
އެންމެ ބޮޑަށް ސަރުކާރަށް ފާޑުކިޔުން އަމާޒުވެފައި ވަނީ ރިސޯޓުތަކާއި ސަރުކާރު ހިއްސާވާ ބައެއް ކުންފުނިތަކުގައި މަސައްކަތްކުރާ މުވައްޒަފުންނަށް ޑޮލަރުން މުސާރަދިނުން ހުއްޓާލުމަށް ވިސްނަމުންދާ ކަމަށް ސަރުކާރުން ހާމަކުރުމުންނެވެ.
"ވެރިކަން ދިނީ ވެސް އަހަރުމެން، ވެރިކަމުން ބާލާނީވެސް އަހަރުމެން،" މުސާރަތަކާ ނުކުޅުމަށް ސަރުކާރަށް އިންޒާރުކޮށް ފޭސްބުކްގައި އާތިފް ނަމަކަށް ކިޔާ މީހަކު ލިޔެފައިވެ އެވެ.
އެކަމާ ގުޅިގެން ހިޔާލުފާޅުކުރި އެހެން މީހަކު ބުނެފައި ވަނީ ކޮންމެ ކަމެއްގައި ވެސް ދެކޮޅު އޮންނާން ޖެހޭނެ ކަމަށާއި ބޭރު ފައިސާއިން ލިބޭ އާމްދަނީ ރަސްމީ ރޭޓުގައި ބޭންކަށް މާރުކުރާނަމަ، އާންމު ރައްޔިތުން ބޭނުންވީމާ ރަސްމީ ރޭޓުގައި ޑޮލަރު ގަންނަން ވެސް ލިބެންޖެހޭނެ ކަމަށެވެ.
މިދިޔަ ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުނައްވަރު ވަނީ މާލީ މުއާމަލާތްތައް ދިވެހި ފައިސާއިން ކުރާ ގޮތަށް ބަދަލުތަކެއް ގެނައުމެއް ނިންމަވާފައިވާކަން ހާމަކުރައްވާފަ އެވެ. ރާއްޖޭގައި ޑޮލަރުން ބައިވަރު މާލީ މުއާމަލާތް ކުރާ ކަމަށް އެމްއެމްއޭއިން ބޭނުންވަނީ 2030 ވަނަ އަހަރާ ހަމައަށް މި ބަދަލުތައް ގެނައުން ކަމަށް މުނައްވަރު ވިދާޅުވި އެވެ.
"މުސާރަތައް ވެސް މިހާރު އެ ދެއްވަނީ، މިސާލަކަށް ޓީއެމްްއޭއިން ބެލިކަމުގައި ވިޔަސް، އެގޮތަށް ރިސޯޓުތަކަށް ބެލިކަމުގައިވިޔަސް ޑޮލަރުން އިނގޭތޯ، އެހެންވީމާ މި ޑޮލަރުން މުސާރަ ދިނުމުގެ ކަންތައްތަކަށް ވެސް ބަދަލުތަކެއް އަންނަން ޖެހޭނެ. އޭރުން ހަގީގަތުގައި ދިވެހި ރުފިޔާއަށް އޮންނަ ޑިމާންްޑު އިތުރުވެގެންދާނީ،" މުނައްވަރު ވިދާޅުވި އެވެ.
ސަރުކާރުން ވަނީ ބޭރު ފައިސާއިން މުސާރަ ލިބޭ އާންމު ރައްޔިތުން ވެސް ކަޅު ބާޒާރުގައި ޑޮލަރު ވިއްކައި މަނީ ލޯންޑާ ކުރާކަމަށް ބުނެ ރައްޔިތުން ބަދުނާމުކޮށްފަ އެވެ.
އެ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ހޯމް މިނިސްޓަރު، އަލީ އިހުސާން ވަނީ ހުއްދަ ނުނަގައި ޑޮލަރު އެކްސްޗޭންޖް ކުރާ ފަރާތްތަކުން އާމްދަނީ ހޯދުމާއި އެ އާމްދަނީން އެއްވެސް ބޭނުމެއް ކުރުމަކީ މަނީ ލޯންޑާ ކުރުން ކަމަށެވެ.
ރިސޯޓުތަކާއި ބޮޑެތި ވިޔަފާރިތަކަށް ބޭރު ފައިސާއިން ލިބޭ އާމްދަނީގެ 40 ޕަސެންޓު މާރުކުރަން މަޖުބޫރުކުރުމަށް ބޭރު ފައިސާއާ ބެހޭ ގާނޫނަށް ބަދަލު ގެންނަން ރައްޔިތުންގެ މަޖިލީހުން އިއްޔެ ވަނީ ފާސްކޮށްފަ އެވެ.
އޭގެ އިތުރުން، ކަޅު ބާޒާރުގައި ޑޮލަރު ވިއްކާ އަގު ރިޕޯޓު ކުރުމާއި އެ ވާހަކަދެއްކުމަކީ ވެސް ކުށެއްކަމަށް ކަނޑައަޅަން މަޖިލީހުން އިއްޔެ ވަނީ ފާސްކޮށްފަ އެވެ.
