ޕެރިސް (މެއި 30) - ސާބިއާގެ ލެޖެންޑަރީ ތަރި، ނޮވަކް ޖޮކޮވިޗް ކަޓުވާލައި، 19 އަހަރުގެ ބްރެޒިލްގެ ކުޅުންތެރިޔާ، ޖޮއާއޯ ފޮންސޭކާ، މިހާރު ކުރިއަށްދާ ގްރޭންޑް ސްލޭމް ޓެނިސް މުބާރާތް، ފްރެންޗް އޯޕަންގެ ގަދަ 16 ބުރުން ޖާގަ ހޯދައިފި އެވެ.
މުބާރާތުގެ ކުރީގެ ޗެމްޕިއަން، ސްޕެއިނުގެ ކާލޯސް އަލްކަރާޒް، އަނިޔާގެ ސަބަބުން މި ފަހަރު ފްރެންޗް އޯޕަންގައި ނުކުޅޭއިރު، ދުނިޔޭގެ އެއް ވަނަ، އިޓަލީގެ ޖަނިކް ސިނާ ވަނީ ފްރެންޗް އޯޕަންގެ ދެ ވަނަ ބުރުން ކަޓައިފަ އެވެ.
އެހެންވެ، މުބާރާތުގެ ފޭވަރިޓެއް ކަމަށް ވެފައި އޮތީ، ތިން ފަހަރު ފްރެންޗް އޯޕަން ކާމިޔާބުކޮށްފައިވާ، 39 އަހަރުގެ ޖޮކޮވިޗް އެވެ. އެކަމަކު، ގާތްގަނޑަކަށް ފަސް ގަޑިއިރަށް ދިގު ދެމިގެންދިޔަ މެޗަކަށް ފަހު، ފޮންސޭކާ އަތުން ބަލިވެ، ޖޮކޮވިޗް މި ވަނީ މުބާރާތުން ކަޓައިފަ އެވެ.
ފޮންސޭކާ، މި މެޗުން މޮޅުވީ ފަހަތުން އަރަ އެވެ. އެއީ، ޖޮކޮވިޗް ފުރަތަމަ ދެ ސެޓު ގެންގޮސްފައި ވަނިކޮށެެވެ. ހަތަރު ގަޑިއިރާއި 53 މިނިޓް ވަންދެން ކުޅުނު މި މެޗުގައި ފަސް ސެޓު ކުޅުނުއިރު، ސެޓުތައް ދިޔައީ، 4-6 4-6 6-3 7-5 7-5 އިންނެވެ. މިއީ، މި ފަހަރުގެ ފްރެންޗް އޯޕަންގައި އެންމެ ދިގު މެޗެވެ. މެޗު ކުޅުނުއިރު، ހޫނުމިން ހުރީ 33 ޑިގްރީ ސެލްސިއަސްގަ އެވެ.
މެޗަށް ފަހު، ފޮންސޭކާ ބުނީ، ޔަގީނުން ވެސް މިއީ ކެރިއަރުގައި އޭނާ އަށް ލިބުނު އެންމެ ބޮޑު ކާމިޔާބު ކަމަށާއި މެޗުގައި އެއްވެސް ވަރަކަށް އޭނާ އަށް މޮޅުވެވޭނެ ކަަމަށް ގަބޫލު ނުކުރެވޭ ކަމަށެެވެ. އަދި، އެންމެ ހައިރާންވާ ކަަމަކީ އެހާ ދިގުކޮށް ދިޔަ މި މެޗަށް ފަހު، އޭނާ އަށް ވުރެން ބޮޑަށް ފިޓްކޮށް ފެންނަނީ ޖޮކޮވިޗް ކަމަށާއި އެހެންކަމުން، މި ކާމިޔާބީ ހޯދަން އޭނާ ކުރަން ޖެހުނު ތަޖުރިބާ ވަރަށް ރަނގަޅަށް އިހުސާސް ކުރެވޭ ކަމަށެވެ.
ފޮންސޭކާ އަކީ ދެ ސެޓު ފަހަތުން އަރައި، ޖޮކޮވިޗް އަތުން މޮޅުވި ދެ ވަަނަ ކުޅުންތެރިޔާ އެވެ. މީގެ ކުރިން، ޖޮކޮވިޗް މި ގޮތަށް ބަލިވީ މީގެ 16 އަހަރު ކުރިން، 2010 ވަނަ އަހަރުގެ ފްރެންޗް އޯޕަންގަ އެެވެ.
ޖޮކޮވިޗް ވަނީ މި މެޗުގައި ފޮންސޭކާގެ ފަރާތުން ފެނުނު ހިތްވަރާއި ދެއްކި ކުޅުމުގެ ސަބަބުން ޔަގީންވާ ކަމަކީ މިއީ، އޭނާ އަށް ކާމިޔާބުވުން ހައްގު މެޗެއް ކަމަށް ބުނެފަ އެވެ. އަދި، މިހާރު އުމުރު ހުރި ގޮތުން، އަންނަ އަހަރުގެ ފްރެންޗް އޯޕަން ކުޅެން އެނބުރި އާދެވޭނެ ކަމުގެ ސީދާ ޔަގީންކަމެއް ނުދެވޭނެ ކަމަށް ވެސް ޖޮކޮވިޗް ވަނީ ބުނެފަ އެވެ.
ސައުވީސް ގްރޭންޑް ސްލޭމް ޓެނިސް މުބާރާތުގެ ތަށި ހޯދާފައިވާ ޖޮކޮވިޗް ބުނީ، ކެރިއަރުގައި މަދު ފަހަަރަކު ނޫނީ ދެ ސެޓު ކުރީގައި އޮވެފައި މެޗަކުން ބަލިނުވާ ކަަމަށެވެ. އަދި، މިހާރު ކަންކަން ކުރިއަށްދާ ގޮތުން ކެރިއަރު ކުރިއަށްގެންދާއިރު، އިތުރު ޗެލެންޖުތަކާ ދިމާވާނެ ކަމަށާއި ފިޓްކޮށް ހުރެގެން ވެސް އިތުރަށް މަސައްކަތް ކުރަންޖެހޭކަން ޔަގީންވެފައިވާ ކަމަށް ޖޮކޮވިޗް ވަނީ ބުނެފަ އެވެ.
