މެޑްރިޑް (އޭޕްރީލް 18) - އަނިޔާގެ މައްސަލަ އަކަށް ފަރުވާ ހޯދަމުން އަންނާތީވެ، މަޝްހޫރު ދެ ތަރިން ކަމަށްވާ، ކާލޯސް އަލްކަރާޒް އާއި ނޮވަކް ޖޮކޮވިޗް، އަންނަ ހަފްތާގައި ކުރިއަށްދާ މެޑްރިޑް އޯޕަން ޓެނިސް މުބާރާތުގައި ނުކުޅެން ނިންމައިފި އެވެ.
ދުނިޔޭގެ ދެ ވަނައިގައި އޮތް އަލްކަރާޒް، 22، ވަނީ މި ހަފްތާގައި އޮތް ބާސެލޯނާ އޯޕަން ޓެނިސް މުބާރާތުން ވެސް ނަން ނަގައިފަ އެވެ. އަލްކަރާޒްގެ އަތުގެ ކުޑަހުޅަށް ލިބިފައިވާ އަނިޔާއަކަށް ފަރުވާ ހޯދަމުން އަންނައިރު، އެއްކޮށް ފިޓްނުވަނިސް ކުޅެން ބޭނުންނުވާ ކަމަށް އޭނާގެ މެޑިކަލް ޓީމުން ވަނީ އަންގައިފަ އެވެ.
އަލްކަރާޒް ބުނީ، އަންނަ އަންގާރަ ދުވަހު ފަށާ މެޑްރިޑް އޯޕަން އަކީ މި އަހަރު ވަރަށް ބޮޑު އަމާޒެއް ކަނޑައެޅި މުބާރާތެއް ކަމަށާއި އެ މުބާރާތުގައި ބައިވެރިނުވެވުމަކީ ލިބުނު ދެރައެއްގެ އިތުރުން ހިތާމަ ކުރާނެ ކަމެއް ކަމަށެވެ.
"މެޑްރިޑަކީ އަހަރެންގެ ގެ. މުޅި ޓެނިސް ކަލަންޑަރަށް ބެލިޔަސް އަހަރެން އެންމެ ޝައުގުވެރިވާ އެއް މުބާރާތް. އެހެންވެ، އަހަންނަށް ލިބޭ ބޮޑު ހިތާމައެއް އެއީ ޖެހިޖެހިގެން ދެ އަހަރު މި މުބާރާތް ނުކުޅެ ހުންނަން ޖެހުމަކީ. ހާއްސަ ގޮތެއްގައި، އަހަރެންގެ އަމިއްލަ ސަޕޯޓަރުން ކުރިމަތީގައި ކުޅެލަން ފުރުސަތު ނުލިބި މި ގޮތަށް ވާތީ ވެސް ވަރަށް ދެރަވޭ،" ގްރޭންޑް ސްލޭމް ހަތް މުބާރާތް ކާމިޔާބުކޮށްފައިވާ އަލްކަރާޒް ބުންޏެވެ.
އަލްކަރާޒް މަސައްކަތް ކުރަމުން އަންނަނީ، އަންނަ މަހުގެ 18 އިން ޖޫން 7 އަށް ކުރިއަށްދާ ފްރެންޗް އޯޕަން އަށް ފިޓްވުމަށެވެ. މިދިޔަ ދެ ފަހަރު ވެސް އެ މުބާރާތުގެ ޗެމްޕިއަންކަން ހޯދީ އަލްކަރާޒް އެވެ.
މިދިޔަ މަހު، އިންޑިއަން ވެލްސްގެ ހަތަރު ވަނަ ބުރުގައި ޖޭކް ޑްރެޕާ އަތުން ބަލިވި ފަހުން ޖޮކޮވިޗް އަދި ރަސްމީ މެޗެއްގައި ކުޅެފައިނުވެ އެވެ. ގްރޭންޑް ސްލޭމް 24 މުބާރާތުގެ ތަށި ހޯދާފައިވާ އުމުރުން 38 އަހަރުގެ ޖޮކޮވިޗަށް އެންމެ ފަހުން ކުރިއަށްދިޔަ ޓެނިހުގެ މާސްޓާސް 1000 ގެ ދެ މުބާރާތް، މިއާމީ އާއި މޮންޓެކާލޯގައި ނުކުޅެވުނީ ކޮނޑަށް ލިބިފައިވާ އަނިޔާއަކާ ހެދި އެވެ.
ރޭންކިންގެ ހަތަރު ވަނައިގައި އޮތް ޖޮކޮވިޗް ބުނީ، އަންނަ ހަފްތާގައި އޮތް މެޑްރިޑް އޯޕަންގައި ވެސް ނުކުޅެވޭނެ ކަމަށާއި އަދިވެސް ކުރިއަށްދަނީ، އަނިޔާ އިން ރިކަވާވުމުގެ މަރުހަލާ ކަމަށެވެ. އަދި، އުންމީދަކީ އެއްކޮށް ފިޓްވެގެން އަނބުރާ ކުޅުމަށް ނުކުތުމަށް ކަމަށް ޖޮކޮވިޗް ވަނީ ބުނެފަ އެވެ.
