މިހާރު ކުރިއަށްދާ ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަނުގައި ކުޅުނު ދެ ވަނަ މެޗުން ކްލަބް އެޗްޑީސީން ލަަޔަންސް ރެކްރިއޭޝަން ކްލަބް ބަލިކޮށް މުބާރާތުގެ ސެމީ ފައިނަލުގެ ފުރުސަތު ބޮޑުކޮށްފި އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު މެޗަށް ނުކުތްއިރު، ގްރޫޕް އޭގައި އެޗްޑީސީ އާއި ލަޔަންސް އިން ކުޅުނު ފުރަތަމަ މެޗުތަކުން ވަނީ މޮޅުވެފަ އެވެ. އެންމެ ފަހުން ބޭއްވި ވީއޭއެމް ކަޕްގެ ރަނަރަޕް އެޗްޑީސީން ލަޔަންސްގެ މައްޗަށް ކުރިހޯދީ 3-2 ސެޓުންނެވެ.
ގްރޫޕްގެ ތާވަލަށް ބަލާއިރު، އެޗްޑީސީ އޮތީ ދެ މެޗުން ފަސް ޕޮއިންޓާ އެކު އެއް ވަނައިގަ އެވެ. ދެ ވަނައިގައި އޮތް ލަޔަންސް އަށް ދެ މެޗުން ހަތަރު ޕޮއިންޓް ލިބިފައިވާއިރު، ތިން ވަނައިގައި ޕޮލިސް ކްލަބް އޮތީ އިއްޔެ ހަވީރު ޔުނައިޓެޑް ހެންވޭރިއަންސް ބަލިކޮށް ހޯދި ތިން ޕޮއިންޓާ އެކު އެވެ. ފުލުގައި އޮތް ޔުނައިޓެޑް ހެންވޭރިއަންސް އަށް ދެ މެޗު ކުޅުނުއިރު، ޕޮއިންޓެއް ލިބިފައި ނުވެ އެވެ.
އެޗްޑީސީ އަށް ބާކީ އޮތް މެޗަކީ ދެ މެޗުން ވެސް ބަލިވެފައި އޮތް ޔުނައިޓެޑް ހެންވޭރިއަންސްއާ ކުޅޭ މެޗެވެ. އެ މެޗުގެ ކުރިން ޕޮލިހާއި ލަޔަންސް ކުޅޭ މެޗުގެ ނަތީޖާ ނުކުންނަ ގޮތަކުން، އެޗްޑީސީ ދެން އޮތް މެޗު ކުޅުމުގެ ކުރިން ވެސް ސެމީ ފައިނަލަށް ދިއުމުގެ ފުރުސަތު އެބައޮތެވެ.
އަލީ ހުޒާމް (ހުޒަންޓެ)ގެ ކެޕްޓަންކަމުގައި ކުޅޭ ލަޔަންސް އިން ރޭ ފުރަތަމަ ދެ ސެޓު ގެންދިޔައީ، 20-25، 22-25 އިންނެވެ. އެކަމަކު، ވަރުގަދަ ސްކޮޑަކާ އެކު، މި ފަހަރު ނުކުތް އެޗްޑީސީން މޮޅުވީ ފަހަތުން އަރަ އެވެ. އިސްމާއިލް ސާޖިދު (ކުޑަކާއްޓެ)، ޝަމާއިލް ހުސެއިންގެ އިތުރުން ދާދި ފަހުން ނިމުނު ރާއްޖެ ސުޕަ ލީގުގެ މޮޅު ކުޅުންތެރިޔާ، ހަސަން ނިލާމް (ޕާޓޭ) ވެސް ކުޅޭ އެޗްޑީސީ ވަނީ ފުރަތަމަ ދެ ސެޓު ގެއްލުމުން، ދެން ކުޅުނު ތިން ސެޓު ނަގައި، މެޗުން މޮޅުވެފަ އެވެ. ސެޓުތައް ގެންދިޔައީ، 25-17، 25-17 އަދި 15-7 އިންނެވެ.
މި ގްރޫޕްގައި އިއްޔެ ހަވީރު، ޔުނައިޓެޑް ހެންވޭރިއަންސް އަތުން ޕޮލިސް މޮޅުވިިއިރު، ސެޓުތައް ގެންދިޔައީ، 25-16، 25-16 އަދި 25-21 އިންނެވެ.
މުބާރާތުގައި މިއަދު އޮތީ ގްރޫޕް ބީގެ މެޗުތަކެވެ. ހަވީރު ކުޅޭނީ ދަޑިމަގު ސްޕޯޓްސް އެންޑް ރެކްރިއޭޝަން އާއި ކްލަބް އެމްޓީސީސީ އެވެ. އަދި، މިރޭ ކުޅޭ މެޗުގައި އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބުން ކުޅޭނީ ސަން ސްޕޯޓްސް ކްލަބާ އެވެ. ސިފައިން ފުރަތަމަ މެޗުން ފަސް ސެޓަށް ގޮސްގެން ދަޑިމަގު ބަލިކުރިއިރު، އެމްޓީސީސީން ވަނީ ސަން ސްޕޯޓްސްގެ މައްޗަށް ކުރިހޯދައިފަ އެވެ.
ސޯޝަލް ސެންޓަރުގައި ކުރިއަށްދާ މި ފަހަރުގެ މުބާރާތުގެ މެޗުތައް ބަލަން ސަޕޯޓަރުން ޓިކެޓް ގަންނަން ޖެހެ އެވެ. ވޮލީބޯލް އެސޯސިއޭޝަނުން ހަަމަަޖައްސާފައިވާ ޓިކެޓްގެ އަގަކީ، 30 ރުފިޔާ އެވެ.
