ނޭޕްލްސް، އިޓަލީ (އޮގަސްޓް 31) - އިޓާލިއަން ލީގުގެ އެންމެ ފަހުގެ ޗެމްޕިއަން، އިންޓަ މިލާނުން ރޭ ކަލިއަރީ އަތުން 1-0 އިން މޮޅުވެ، މި ފަހަރުގެ ސީޒަނުގައި ލީގުގެ ދެ ވަނަ މެޗުން ވެސް މޮޅުވިއިރު، ކޯމޯ އިން 2-1 އިން ނަޕޯލީ ބަލިކޮށްފި އެވެ.
ކަލިއަރީ އަތުން އިންޓަ އިން މި ވަނީ އިޓާލިއަން ލީގުގައި އެންމެ ފަހުން ކުޅުނު ހަތް މެޗުން ވެސް މޮޅުވެފަ އެވެ. ރޭގެ މެޗުގައި ކަލިއަރީ ދަނޑުގައި އިންޓަ އަށް މޮޅެއް ހޯދުނީ ޖުމްލަކޮށް ބަލާއިރު މުޅި މެޗުގައި ވެސް ވަރަށް ވިސްނުންތެރިކަމާ އެކު މަސައްކަތް ކޮށްގެންނެވެ.
ރޭގެ މެޗުގައި އިންޓަ އިން ޖެހި ހަމައެކަނި ލަނޑު މެޗުގެ ނުވަ ވަނަ މިނިޓްގައި ޖެހީ ތުރުކީގެ މިޑްފީލްޑަރު، ހަކަން ޗަނޮނޯލޫ އެވެ. މިއީ، ނިކޯލޯ ބަރޭލާ ދިން ބޯޅައަކުން، އޭރިއާބޭރުން ގޯލުގެ ތިރީ ކަނަށް ފޮނުވާލައިގެން ޗަނޮނޯލޫ ޖެހި ގޯލެކެވެ. ލީގުގައި އިންޓަ އިން ކުޅުނު ފުރަތަަމަ މެޗުގައި މޮންޒާ ކޮޅަށް ވެސް އިންޓަ އަށް ލީޑުނަގައިދިނީ ޗަނޮނޯލޫ އެވެ.
މެޗުގެ 28 ވަނަ މިނިޓްގައި އިންޓަ އަށް ލީޑުފުޅާކޮށްދޭން އޭރިއާތެރޭގައި ހުސްކޮށް ހުރެފައި، ފެޑެރީކޯ ޑި މާކޯ ފޮނުވާލި ބޯޅަ ކަލިއަރީގެ ކީޕަރު، އެލިއާ ކަޕީލޭ ވަނީ މަތަކޮށްފަ އެވެ. އޭގެ ހަތަރު މިނިޓް ފަހުން، ބަރޭލާ ޖެހި ބޯޅަ ކަލިއަރީ ޑިފެންޑަރު، ރޮޑްރިގޭޒް ވަނީ ސަލާމަތްކޮށްފަ އެވެ. މި މެޗުގައި އިންޓަގެ ފޯވާޑް، ޕިއޯ އެސްޕޮސީޓޯ ފޮނުވާލި ގިނަ ހަމަލާތަކެއް ކީޕަރު ކަޕީލޭ ވަނީ މަތަކޮށްފަ އެވެ. އަދި، އިންޓަގެ ލައުޓާރޯ މާޓިނޭޒް ފޮނުވާލި ބޯޅަ ދިޔައީ ބޭރުންނެވެ.
ރޭގެ މެޗަށް ނުކުތްއިރު، ކޯމޯ ވަނީ މި ފަހަރު ލީގުގައި ފުރަތަމަ މެޗުން އެއްވަރުވެފަ އެވެ. އަނެއްކޮޅުން، މަސިމޯ އަލެގްރީ ކޯޗުކަމުގައި މި ފަހަރު ކުޅޭ ނަޕޯލީން ފުރަތަމަ މެޗުން މޮޅުވި އެވެ. ރޭގެ މެޗަކީ ނަޕޯލީ ދަނޑުގައި އަލެގްރީގެ ފުރަތަމަ މެޗު ނަމަވެސް، އޭނާ އަތުން، ސެސްކް ފަބްރެގަސް ކޯޗުކޮށްދޭ ކޯމޯ އިން މޮޅުވެ، މި ފަހަރުގެ ލީގުގައި އެ ޓީމުގެ ފުރަތަމަ މޮޅު ހޯދި އެވެ.
ނޭޕްލްސްގެ ޑިއޭގޯ އަރްމާންޑޯ މަރަޑޯނާ ސްޓޭޑިއަމްގައި ކުޅުނު މެޗުގެ 17 ވަނަ މިނިޓްގައި ކޯމޯ އިން ލީޑުނެގީ އޭރިއާތެެރެއިން ކްރޮއޭޝިއާގެ މިޑްފީލްޑަރު، މާޓިން ބަޓުރީނާ ޖެހި ގޯލުންނެވެ. ބަޓުރީނާ ވަނީ ބޯޅަ ކޮންޓްރޯލް ކުރުމަށް ފަހު ތިރީ ކަަނަށް ފޮނުވާލައިފަ އެވެ.
ނަޕޯލީ އަށް އެއްވަރުކޮށްދޭން ނޯވޭގެ ނޯއާ ލާންގް އަށް ލިބުނު ފުރުސަތުގައި ބޮލުން ޖެހި ބޯޅަ ހުރަސްދަނޑިމަތިން ދިޔައިރު، އެ ޓީމުގެ ޑެންމާކް ފޯވާޑް، ރަސްމުސް ހޮއިލަންޑަށް ލިބުނު ބޯޅަ ވަނީ ގޯލުގެ ތިރީ ކަނަށް އަމާޒުކޮށްލައިފަ އެވެ. ނަޕޯލީން އެއްވަރުކުރިތާ މާ ލަސްތަކެއް ނުވެ، ކޯމޯ އިން އަނެއްކާ ލަނޑު ޖަހައި ލީޑުނެގި އެވެ، މިއީ، ނަޕޯލީގެ ފަހަތުން ހެދި ގޯހެއްގެ ފައިދާނަގައި، ބަޓުރީނާ ދިން ބޯޅައަކުން އަނަސްޓަސިއޯސް ޑުވީކާސް ޖެހި ގޯލެކެވެ.
އިޓާލިއަން ލީގުގެ އާ ސީޒަނުގައި، މިހާތަނަށް، އިންޓަ، އޭސީ މިލާން، ޔުވެންޓަސް އަދި ލާޒިއޯ އިން ވަނީ ފުރަތަމަ ކުޅުނު ދެ މެޗުން ވެސް މޮޅުވެފަ އެވެ.
