މިލާން (އޮގަސްޓް 20) - އެތުލެޓިކޯ މެޑްރިޑަށް ކުޅޭ އާޖެންޓީނާގެ ފޯވާޑް، ޖޫލިއަން އަލްވަރޭޒްގެ ސޮއި ހޯދަން ބާސެލޯނާ އިން ކުރާ މަސައްކަތް ކާމިޔާބުވާގޮތެއް ނުވާތީވެ، އެ ކްލަބުން އިންޓަ މިލާންގެ އާޖެންޓީނާ ފޯވާޑް، ލަައުޓާރޯ މާޓީނޭޒް ގެނެވޭތޯ މަސައްކަތް ފަށާފައިވާ ކަމަށް ރިޕޯޓްތައް ބުނެފި އެވެ.
އެތުލެޓިކޯގެ މެނޭޖްމަންޓުން ވަނީ އެއްވެސް އަަގަކަށް މި ފަހަރުގެ ޓްރާންސްފާ މާކެޓްގައި އަލްވަރޭޒް ނުވިއްކާނެ ކަމަށް ތަކުރާރުކޮށް ބުނެފަ އެވެެ. ރޮބަޓް ލެވަންޑޯސްކީ އާއި ފެރަން ޓޮރޭސް، ބާސެލޯނާ އިން ގޮސްފައިވާއިރު، އެ ޓީމުގެ ކޯޗު، ހަންސީ ފްލިކް ވަނީ ކްލަބްގެ މެނޭޖްމަންޓުގައި ފޯވާޑެއް ގެންނަން އެދިފަ އެވެ.
އިންޓަގެ ކެޕްޓަން، މާޓީނޭޒް އަކީ އެ ޓީމުން މިދިޔަ ސީޒަނުގައި އިޓާލިއަން ލީގާއި ކަޕްގެ ޗެމްޕިއަންކަން ހޯދިއިރު ޓީމުގެ އެންމެ މުހިންމު އެއް ކުޅުންތެރިޔާ އެވެ. މިހާތަނަށް މާޓީނޭޒް އަށް އެއްވެސް ބިޑެއް ބާސެލޯނާ އިން ކޮށްފައިނުވެ އެވެ. ރިޕޯޓްތައް ބުނާގޮތުން، ބާސެލޯނާ އިން މި ވަގުތު ދެނެގަންނަން މަސައްކަތް ކުރަނީ، އެ ކްލަބަށް ބަދަލުވާން މާޓީނޭޒްގެ ޝައުގުވެރިކަން ހުރި މިންވަރެވެ. އަދި، މާޓީނޭޒް، ބާސެލޯނާގެ އޮފާ ގަބޫލުކުރަން ތައްޔާރުނަމަ، ރަސްމީކޮށް އިންޓައާ އެކު މަޝްވަރާގެ މޭޒަށް ދިއުމަށް ބާސެލޯނާގެ ލީޑަޝިޕުން ނިންމާނެ އެވެ.
އެކަމަކު، އިޓަލީގެ މީޑިއާ ރިޕޯޓްތައް ބުނާގޮތުން، އިންޓަގެ ވިސްނުމަކީ އެއްވެސް އަގަކަށް މި ފަހަރުގެ ޓްރާންސްފާ މާކެޓްގައި މާޓީނޭޒް ދޫކޮށް ނުލުމެވެ. އަދި، އިންޓަގެ ކޯޗު، ކްރިސްޓިއަން ކީވޫ ވެސް ވަނީ މާޓީނޭޒަކީ ކުރިއަށް އޮތް ސީޒަނަށް އޭނާގެ ޕްލޭނުގައި މުހިންމު ކުޅުންތެރިއެއް ކަމަށް ބުނެފަ އެވެ.
އާޖެންޓީނާގެ ރޭސިން ކްލަބްގެ ޔޫތު ޓީމުން ފަށައި ފަހުން އެ ކްލަބްގެ ސީނިއާ ޓީމަށް ތިން އަހަރު ކުޅުމަށް ފަހު މާޓީނޭޒް އިންޓަ އަށް ބަދަލުވީ 2018 ވަނަ އަހަރު 27 މިލިއަން ޑޮލަރުގެ ފީ އަކަށެވެ. ބާސެލޯނާ އިން މީގެ ދެ އަހަރު ކުރިން ވެސް މާޓީނޭޒްގެ ސޮއި ހޯދަން މަސައްކަތްކުރި އެވެ. އެކަމަކު، އެ ފަހަރު ވެސް ކާމިޔާބުވާ ގޮތެއްނުވި އެވެ.
އިންޓައާ އެކު، މާޓީނޭޒް މި ވަގުތު ހަދާފައިވާ ކޮންޓްރެކްޓް ހަމަވާނީ، 2029 ވަނަ އަހަރުގެ ޖޫން މަހުގެ ނިޔަލަށެވެ. މާޓީނޭޒް ވަނީ އިންޓަ އަށް މިހާތަނަށް ކުޅެދިން، 376 މެޗުން 175 ލަނޑު ޖަހައި، 56 ލަނޑު ޖަހަން ފުރުސަތު ތަނަވަސްކޮށްދީފަ އެވެ. މާޓީނޭޒް ވަނީ އިންޓައާ އެކު، އިޓާލިއަން ލީގާއި އިޓާލިއަން ކަޕް، ކޮންމެ މުބާރާތެއް ތިން ފަހަރު ކާމިޔާބުކުރުމުގެ އިތުރުން، އިޓާލިއަން ސުޕަ ކަޕް ޗެމްޕިއަންކަން ދެ ފަހަރު ހޯދައިފަ އެވެ. ޗެމްޕިއަންސް ލީގުގެ ފައިނަލަށް ދެ ފަހަރު އަދި ޔޫރޮޕާ ލީގުގެ ފައިނަލަށް އެއް ފަހަރު ދަތުރުުކުރިއިރު، ކާމިޔާބު ލިބޭ ގޮތެއްނުވި އެވެ.
