މިލާން (އޮގަސްޓް 23) - އިޓާލިއަން ލީގުގެ އާ ސީޒަނުގައި އެންމެ ފަހުގެ ޗެމްޕިއަން، އިންޓަ މިލާނުން ކުޅުނު ފުރަތަމަ މެޗުގައި 4-1 އިން މޮންޒާ ބަލިކޮށް ގަދަކޮށް ފެށިއިރު، ޖެނޯއާ އަތުން 2-0 އިން ނަޕޯލީ މޮޅުވެއްޖެ އެވެ.
މިދިޔަ ސީޒަނުގެ ޗެމްޕިއަން، އިންޓަ އިން އާ ސީޒަނުގެ ލީގުގެ ފުރަތަމަ މެޗު ފަށައިގެން ހަ މިނިޓް ތެރޭ ލީޑުނެގި އެވެ. މި ލަނޑު އެ ޓީމަށް ޖަހައިދިނީ ތުރުކީގެ މިޑްފީލްޑަރު، ހަކަން ޗަނޮނޯލޫ އެވެ. އޭރިއާ ކައިރިން ލިބުނު ފުރުސަތުގައި ޗަނަނޯލޫ ޖެހި ބޯޅަ އަމާޒުވީ ގޯލުގެ މަތީ ދާގަނޑަށެވެ. އިންޓަގެ ނިކޯލޯ ބަރޭލާ އަށް އެ ޓީމުގެ ލީޑުފުޅާކުރަން ލިބުނު ފުރުސަތުގެ ބޭނުމެއް ނުހިފުނެވެ.
މެޗުގެ 29 ވަނަ މިނިޓްގައި މޮންޒާ އިން ވަނީ ލަނޑެއް ޖަހައި އެއްވަރުކޮށްފަ އެވެ. އެ ޓީމަށް މި ލަނޑު ޖަހައިދިނީ އޭރިއާތެރެއިން ލިބުނު ފުރުސަތެއްގައި ގުސްޓާވޯ ވަރޭލާ އެވެ. އޭރިއާތެރެއިން ލިބުނު ބޯޅަ ވަރޭލާ ވަނީ ތިރިތިިރިން ގޯލުގެ ކަނަށް އަމާޒުކޮށްލައިފަ އެވެ.
އިންޓަ އިން މެޗު ކާމިޔާބުކުރީ ދެ ވަނަ ހާފުގައި އިތުރު ތިން ގޯލު ޖަހައިގެންނެވެ. އެ ގޮތުން، ދެވަނަ ހާފު ފަށައިގެން ތިން ވަަނަ މިނިޓްގައި، ޕޮލެންޑްގެ މިޑްފީލްޑަރު، ޕިއޮޓްރޭ ޒިއެލިންސްކީ ވަނީ ކޯނަރަކުން ތަނަވަސްވި ފުރުސަތެއްގައި ގޯލަށް ބޯޅަ ފޮނުވާލައިފަ އެވެ. ދެ ވަނަ ލަނޑު ޖެހިތާ މާ ލަސްތަކެއް ނުވެ، އިންޓަ އިން މި ފަހަރު ލީޑުފުޅާކުރި އެވެ. މިއީ، މެޗުގެ 55 ވަނަ މިނިޓްގައި، ޕިއޯ އެސްޕޮސީޓޯ ޖެހި ގޯލެކެވެ.
މެޗުގެ ތިން ޕޮއިންޓް އިންޓަ އިން ކަށަވަރުކުރި ލަނޑު ޖަހާފައިވަނީ، 63 ވަނަ މިނިޓްގަ އެވެ. މި ލަނޑު ކާމިޔާބުކުރީ ޔެން ބިސެކް އެވެ. މިއީ، އެސްޕޮސީޓޯ ތަނަވަސްކޮށްދިން ފުރުސަތަކުން، ގޯލުގެ މަތީ ކަނަށް ބޯޅަ ފޮނުވާލައިގެން، ބިސެކް ކާމިޔާބުކުރި ގޯލެކެވެ. އިންޓަ އަށް ފަސް ވަނަ ލަނޑެއް ޖަހައިދޭން މެނުއަލް އަކަންޖީ ބޮލުން ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ.
މެޗަށް ފަހު، އިންޓަގެ ކޯޗު ކްރިސްޓިއަން ކީވޫ ބުނީ، ފުރަތަމަ ހާފު ދިޔައީ ބޭނުންވި ގޮތަށް ނޫން ނަމަވެސް، ދެ ވަނަ ހާފުގައި ގިނަ ކަންކަން ރަނގަޅުކޮށްގެން މޮޅަކުން ސީޒަން ފެށުމަކީ ކޮންފިޑެންސަށް ރަނގަޅު ކަމެއް ކަމަށެވެ.
މިދިޔަ ސީޒަނުގައި ލީގުގެ ރަނަރަޕް، ނަޕޯލީން މި ސީޒަނުގައި ކުޅެމުން އަންނަނީ، މެސިމޯ އަލެގްރީގެ ކޯޗުކަމުގަ އެވެ. ފުރަތަމަ ހާފުގައި ނަޕޯލީ އަށް މާ އެދެވޭ ކުޅުމެއް ނުދެއްކުނުއިރު، ޖެނޯއާ އިން ބޯޅަ ހިފަހައްޓައިގެން ރަނގަޅަށް ކުޅެފައިވެ އެވެ. ނަޕޯލީން މެޗު ބަދަލުކޮށްލީ ދެ ވަނަ ހާފުގައި ގެނައި ބަދަލުތަކާ އެކު އެެވެ. އެ ގޮތުން، ކެވިން ޑި ބްރޭނާ، ވާގާރާ އަދި ނޯއާ ލޭންގް ކުޅެން ނުކުތެވެ.
ނަޕޯލީން ލީޑުނެގީ ޑި ބްރޭނާ ޖެހި ގޯލުންނެވެ. ދެ ވަނަ ލަނޑުގައި ވެސް ޑިބްރޭނާގެ ދައުރު އެބައޮތެވެ. އޭނާ ދިން ބޯޅައަކުން ވާގާރާ ފޮނުވާލި ޝޮޓް ގޯލަށް ވަނީ ޖެނޯއާގެ ޑިފެންޑަރު، ސަބެސްޓިއަން އޮޓޯއާ ފައިގައި ޖެހިފަ އެވެ.
