މެޑްރިޑް (އޮގަސްޓް 27) - ތަޖުރިބާކާރު ފޯވާޑް، އަލްވާރޯ މޮރާޓާ، ސްޕެއިނުގެ ދެ ވަނަ ޑިވިޝަނުގެ ކްލަބަކަށް ބަދަލުވުމަށް މަޝްވަރާ ކުރަމުން އަންނަ ކަމަށް ރިޕޯޓްތައް ބުނެފި އެވެ.
އުމުރުން 33 އަހަރުގެ މޮރާޓާ، މި ވަގުތު ކުޅެމުން އަންނަނީ ސެސްކް ފަބްރެގަސްގެ ކޯޗުކަމުގައި އިޓަލީގެ ކޯމޯ އަށެވެ. އެކަމަކު، ކުރިއަށް އޮތް ސީޒަނަށް ލޯން އެއްބަސްވުމެއްގެ ދަށުން އިޓަލީގެ ދެ ވަނަ ޑިވިޝަނުގެ ކްލަބް، ލެގާނޭސް އަށް ބަދަލުވާން މޮރާޓާ އަންނަނީ މަޝްވަރާ ކުރަމުންނެވެ.
މިދިޔަ ސީޒަނުގައި ލޯން އެއްބަސްވުމެއްގެ ދަށުން ކޯމޯ އަށް ކުޅުނު މޮރާޓާ، އެ ކްލަބާ އެކު ހަދާފައި އޮތް އެއްބަސްވުން ދާއިމީ ކުރި ނަމަވެސް އޭނާގެ ފޯމު ހުރި ގޮތުންނާއި ކްލަަބްގެ މާލީ ހާލަތަށް ބަލައި، އޭނާ މި ސީޒަނަށް ދޫކޮށްލަން ނިންމީ އެވެ. މިދިޔަ ސީޒަނުގައި ކޯމޯ އަށް ކުޅެދިން 30 މެޗުން މޮރާޓާ އަށް ޖެހުނީ އެންމެ ގޯލެކެވެ.
ސްޕެއިން ގައުމީ ޓީމަށް ކުރިން ކުޅުނު މޮރާޓާގެ ކެރިއަރަށް ބަލާއިރު، މަޝްހޫރު ގިނަ ޓީމުތަކަކަށް ވަނީ ކުޅެފަ އެވެ. އަދި، މޮރާޓާގެ ކެރިއަރުގައި އެކި ކްލަބްތަކުން އޭނާގެ ޓްރާންސްފާ އަށް ޖުމްލަ އެކު، 250 މިލިއަން ޑޮލަރަށް ވުރެން އިތުރަށް ދައްކާފައިވެ އެވެ.
މީގެ 16 އަހަރު ކުރިން، ރެއާލްގެ ބީ ޓީމުން ސީނިއާ ފުޓްބޯޅަ ކެރިއަރު ފެށި މޮރާޓާ ވަނީ ރެއާލްގެ ސީނިއާ ޓީމަށް ވެސް ކުޅެފަ އެވެ. އޭގެ ފަހުން، އޭނާ ކުޅެފަައިވާ ކްލަބްތަކަށް ބަލާއިރު، އިޓަލީގެ ޔުވެންޓަސް، އޭސީ މިލާން، އިންގްލެންޑްގެ ޗެލްސީ އާއި ސްޕެއިނުގެ އެތުލެޓިކޯ މެޑްރިޑް އަދި ތުރުކީގެ ގަލަތަސަރާއި ހިމެނެ އެވެ.
