މިލާން (އޮގަސްޓް 24) - މި ސީޒަނުގައި އޭސީ މިލާންގެ ކޯޗުކަމާ ހަވާލުވި ރުބެން އަމޮރިމްގެ އިރުޝާދުގެ ދަށުން އެ ޓީމުން ކުޅުނު ރަސްމީ ފުރަތަަމަ މެޗުން އިޓާލިއަން ލީގުގައި ރޭ ޓޮރީނޯ އަތުން 2-1 އިން މޮޅުވެއްޖެ އެވެ.
ރޭގެ މެޗުގައި މިލާނަށް ނަތީޖާ ނެރެދިނުމަށްޓަކައި އެންމެ ބޮޑު ދައުރެއް އަދާކުރީ ބެންޗުން އެރި ފްރާންސްގެ މިޑްފީލްޑަރު، އެޑްރިއަން ރަބިއޯ އެވެ. އެ ގޮތުން، އާޑޮން ޖަޝާރީގެ ބަދަލުގައި ކުޅެން އެރިތާ އަށް މިނިޓް ތެރޭ ރަބިއޯ ދިން ބޯޅައަކުން އަލްފަޑްްޖޯ ސީސޭ ވަނީ މިލާނަށް ލީޑުނަގައިދީފަ އެވެ.
މި މެޗުގެ ފުރަތަމަ ހާފުގައި ވެސް މިލާނަށް ލަނޑު ޖަހަން ފުރުސަތު ލިބި ދިޔައީ ބޭނުމެއް ނުކުރެވި އެވެ. އެހެން ނަމަވެސް ދެ ވަނަ ހާފުގައި ގޯލު ޖަހަން ލިބުުނު ފުރުސަތުތަކުގައި މިލާނުން ވަނީ ތަފާތު ދައްކައިފަ އެވެ. ސީސޭ އަށް ލަަނޑު ޖަހަން ފުރުސަތު ތަނަވަސްކޮށްދިންތާ ތިން މިނިޓަށް ފަހު، ރަބިއޯ ވަނީ މިލާނަށް ދެ ވަނަ ލަނޑެއް ޖަހައިދީ ލީޑުފުޅާކޮށްދީފަ އެވެ. މި ލަނޑު ޖަހަން ރަބިއޯ އަށް ފުރުސަތު ހޯދައިިދިނީ ސެމުއެލް ޗުކުވޭޒީ އެވެ.
އަމިއްލަ ދަނޑުގައި ކުޅުނު ޓޮރިނޯ އިން ހަމައެކަނި ލަނޑު ޖެހީ މެޗުގެ އިތުރު ވަގުތުގަ އެވެ. އިތުރު ވަގުތުގެ ތިން ވަނަ މިނިޓްގައި މި ލަނޑު ޖެހީ ޗޭ އެޑަމްސް އެވެ.
އަމޮރިމް އަކީ 2009 ވަނަ އަހަރުގެ ފަހުން މިލާންއާ ހަވާލުވި ކޯޗުންގެ ތެރެއިން، އިޓަލީ އަށް ނިސްބަތްނުވާ ކޯޗުންނަށް ބަލާއިރު، މިލާނާ އެކު ލީގުގެ ފެށުން މޮޅަކުން ފާހަގަކުރި ފުރަތަމަ ކޯޗެވެ. އެންމެ ފަހުން އެކަން ހާސިލްކުރީ 2009 ވަނަ އަހަރު މިލާންގެ ކޯޗަކަށް ހުރި ލިއޮނާޑޯ އެވެ. އެ ފަހަރު މިލާން ވަނީ 2-1 އިން ސިއޭނާ ބަލިކޮށްފަ އެވެ.
ލީގުގައި ރޭ ޔުވެންޓަސް އިން ކުޅުނު މެޗުން ވަނީ ޖެލްސަން ބްރެއިމާގެ ހަމައެކަނި ގޯލުން 1-0 އިން ފްރޮސިނޯނޭ ބަލިކޮށްފަ އެވެ. އެޓަލަންޓާ އިން އަމިއްލަ ދަނޑުގައި ކުޅުނު މެޗުން ވަނީ 2-1 އިން ސަސުއޯލޯ އަތުން ކުރިހޯދައިފަ އެވެ.
