މިލާން (ޖުލައި 31) - ހިލޭ ޓްރާންސްފާއެއްގައި އިނގިރޭސި ގައުމީ ފުޓްބޯޅަ ޓީމުގެ ޑިފެންޑަރު، ޖޯން ސްޓޯންސް، އިޓާލިއަން ލީގުގެ ޗެމްޕިއަން، އިންޓަ މިލާނަށް ސޮއިކޮށްފި އެވެ.
މެންޗެސްޓާ ސިޓީ އަށް 10 އަހަރު ކުޅެދިން ސްޓޯންސް، 32، އެ ކްލަބާ އެކު ހަދާފައި އޮތް ކޮންޓްރެކްޓް ހަމަވީ މިދިޔަ ޖޫން މަހުގެ ނިޔަލަށެވެ.
ސިޓީ ދޫކޮށްލުމާ ގުޅޭގޮތުން ސްޓޯންސް ބުނީ، އެ ކްލަބްގައި ހުރެ އޭނާ ދެކުނު ހުރިހާ ހުވަފެނެއް ހަގީގަތަކަށް ހެދުނު ކަމަށާއި ޕްރިމިއާ ލީގު ހަ ފަހަރު، ޗެމްޕިއަންސް ލީގު، އެފްއޭ ކަޕް ދެ ފަހަރު، ލީގު ކަޕް ފަސް ފަހަރު، ތިން ކޮމިނިއުޓީ ޝީލްޑް، ކްލަބް ވޯލްޑް ކަޕް އަދި ޔުއެފާ ސުޕަ ކަޕް ހޯދުމަކީ ހުރިހާ ކަމެއް ހާސިލްވުން ކަމަށެވެ.
އެވަޓަން ދޫކޮށް، 55 މިލިއަން ޑޮލަރުގެ ޑީލެއްގައި ސިޓީއާ ގުޅުނު ސްޓޯންސް ވަނީ އެ ޓީމަށް 19 ލަނޑު ޖަހަައިދީފަ އެވެ.
ކުރިން ބާންސްލީ އަށް ވެސް ކުޅުނު ސްޓޯންސް، ސިޓީއާ އެކު ހަދާފައި އޮތް އެއްބަސްވުން އާ ނުކުރަން ނިންމުމުން، އޭނާ އަށް ގިނަ ކްލަބްތަކެއްގެ އޮފާ ވަނީ ލިބިފަ އެވެ. އޭގެ ތެރޭގައި، ޗެލްސީ އާއި ޔުވެންޓަސް ވެސް ހިމެނެ އެވެ. އެެހެން ނަމަވެސް، ސްޓޯންސް ނިންމީ އާ ޗެލެންޖެއް ނެގުމުގެ ގޮތުން، އިންޓަ އަށް ބަދަލުވުމަށެވެ.
އިންޓައާ އެކު، ސްޓޯންސް ސޮއިކުރީ ދެ އަހަރުގެ ކޮންޓްރެކްޓެއްގަ އެވެ. އިޓާލިއަން ލީގުގެ އާ ސީޒަން ފަށަނީ އަންނަ މަހުގެ 22 ވަނަ ދުވަހު އެވެ.
އެމެރިކާ، މެކްސިކޯ އަދި ކެނަޑާގައި ދާދި ފަހުން ނިމުނު ފީފާ ވޯލްޑް ކަޕްގެ ތިން ވަނަ ހޯދި ޓީމުގައި ސްޓޯންސް ހިމެނެ އެވެ. ސްޓޯންސް، އިންގްލެންޑް ޓީމަށް ޖުމްލަ އެކު މިހާތަނަށް 93 މެޗު ކުޅެދީފައިވާއިރު، އޭގެ ތެރޭގައި، ވޯލްޑް ކަޕްގެ ކުއާާޓާ ފައިނަލުގައި ނޯވޭ އަތުން މޮޅުވި މެޗާއި ސެމީ ފައިނަލްގައި އާޖެންޓީނާ އަތުން ބަަލިވި މެޗުގައި ފުރަތަމަ އެގާރައިގައި ހިމެނިގެން ކުޅުން ހިމެނެ އެެވެ.
