މުމްބާއި، އިންޑިއާ (އޮގަސްޓް 17) - އިންޑިއާ އިން ކުރިއަށް އޮތް ފީފާ ބްރޭކުގެ ތެރޭގައި ބްރެޒިލާ ދެކޮޅަށް ކުޅޭ މެޗުގެ އިތުރުން، މި ފަހަރުގެ ފީފާ ވޯލްޑް ކަޕްގައި ވާދަކުރި ދެ ގައުމު ކަމަށްވާ އުރުގުއޭ އާއި ކޭޕް ވާޑްއާ ދެކޮޅަށް މެޗުތަކެއް ކުޅެވޭތޯ މަސައްކަަތް ކުރަމުން އަންނަ ކަމަށް އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް)ގެ އޮފިޝަލަކާ ހަވާލާދީ މީޑިއާތަކުން ރިޕޯޓްކޮށްފި އެވެ.
އޮކްޓޫބަރު މަހު ކުރީކޮޅުގައި ކަލްކަތާގަައި ބްރެޒިލާ ދެކޮޅަށް ކުޅެން އޮތް މެޗަށް ފޯކަސް ކުރުމަށްޓަކައި، އިންޑިއާ އިން އަންނަ މަހު ފަށާ ފީފާ އާސިއަން ކަޕުން ލިބިފައި އޮތް ފުރުސަތު ދޫކޮށްލައިފަ އެެވެ.
އިންޑިއާ އިން މި ފުރުސަތު ދޫކޮށްލުމުން ގިނަ ފާޑުކިޔުންތަކެއް ވަނީ އަމާޒުވެފަ އެވެ. އެއީ، ހަމައެކަނި އޮކްޓޫބަރު ތިން ވަނަ ދުވަހު، ބްރެޒިލާ ކުޅެން އޮތް މެޗަށް އާސިއާން ކަޕުން ލިބޭ ތިން މެޗާއި މުބާރާތުގެ ތަޖުރިބާގެ ފުރުސަތު ދޫކޮށްލުމުންނެވެ.
ބްރެޒިލް މެޗަށް ފޯކަސް ކުރަން އިންޑިއާ އިން އާސިއާން ކަޕުން ވަކިވެއްޖެ
އޮކްޓޫބަރު މަހު ބްރެޒިލާ ދެކޮޅަށް ކުޅޭ މެޗަށް ފޯކަސް ކުރުމުގެ ގޮތުން، އަންނަ މަހު ބާއްވާ ފީފާ އާސިއާން ކަޕުން ވަކިވާން އިންޑިއާ އިން ނިންމައިފި. އޯލް އިންޑިއާ ފުޓްބޯލް ފެޑެރޭޝަނުން މިގޮތަށް ނިންމީ އެއްފަހަރާ ގައުމީ ދެ ސްކޮޑެއް ގެންގުޅުމުގެ ބަދަލުގައި ބްރެޒިލް މެޗަށް އިސްކަންދިނުމަށް
އޯލް އިންޑިއާ ފުޓްބޯލް ފެޑެރޭޝަންގެ ޑެޕިއުޓީ ޖެނެރަލް ސެކްރެޓަރީ، ސަތުޔަނާރާޔަނަން ވިދާޅުވީ، އާސިއާން ކަޕްގައި ކުޅެވެން ނެތްކަން ފީފާ އަށް އަންގާފައިވާނެ ކަމަށެވެ. އެއީ، މި ވަގުތަށް ބަލާއިރު، ބްރެޒިލާ ދެކޮޅަށް ކުޅޭ މެޗަށާއި އާސިއާން ކަޕަށް އެއްކޮށް ފޯކަސް ކޮށްގެން ކުރިއަށްދެވޭނެ ގޮތެއް ނެތުމުން ކަމަށް ސަތުނާރާނަން ފާހަގަކުރެއްވި އެވެ.
ބްރެޒިލާއި އިންޑިއާ ބައްދަލުކުރާ މެޗު ކުޅެން ހުރިހާ ކަމެއް މިހާރު އޮތީ ހަމަޖައްސައިފަ އެވެ. ފީފާ އާސިއާން ކަޕް އޮތީ ސެޕްޓެމްބަރު 23 އިން އޮކްޓޫބަރު ތިން ވަނަ ދުވަހުގެ ނިޔަލަށެވެ. އޭއައިއެފްއެފް އިން މިހާރު މަސައްކަތްކުރަމުން އަންނަނީ ބްރެޒިލާ ދެކޮޅަށް ކުޅޭ މެޗުގެ ކުރިން، އިތުރު ދެ މެޗު ކުޅުމަށެވެ. އެ ގޮތުން، އެ ދެ މެޗު، އުރުގުއޭ އާއި ކޭޕް ވާޑްއާ ކުޅެން އިންޑިއާ އިން ވަނީ މަަސައްކަތް ފަށައިފަ އެވެ.
ފެންވަރު ސާބިތުކޮށްދޭން އުރުގުއޭގެ ކޯޗުކަން ފޯލާން އަށް
އުރުގުއޭގެ ގައުމީ ފުޓްބޯޅަ ޓީމު ވޯލްޑް ކަޕްގެ ގްރޫޕް ސްޓޭޖުން ކެޓުމާ ގުޅިގެން، އެ ޓީމުގެ ކޯޗުކަން ކުރީގެ މަޝްހޫރު ފޯވާޑް ޑިއޭގޯ ފޯލާންއާ ހަވާލުކުރަން އެ ގައުމުގެ ފެޑެރޭޝަނުން ނިންމައިފި. އަންނަ އަހަރުގެ މާޗް މަހުގެ ނިޔަލަށް ހަވާލުކުރި މި މަގާމުގައި ފޯލާން ރަނގަޅު ނަތީޖާއެއް ދައްކައިފިނަމަ، އޭނާއަށް ދިގު މުއްދަތުގެ ކޮންޓްރެކްޓެއް ދޭނެ
އިންޑިއާ އިން މި ކަމުގައި އެންމެ ބޮޑު އެހީތެރިކަމެއް ހޯދަމުން އަންނަނީ، ދާދި ފަހުން، އުރުގުއޭގެ ކޯޗުކަމާ ހަވާލުވި ކުރީގެ އެއް ވަނަ ފޯވާޑް، ޑިއޭގޯ ފޯލާންގެ ފަރާތުން ކަމަށް ރިޕޯޓްތައް ބުނެ އެވެ. މެންޗެސްޓާ ޔުނައިޓެޑާއި އެތުލެޓިކޯ މެޑްރިޑް އަދި ވިޔަރެއާލަށް ވެސް ކުޅުނު ފޯލާން ވަނީ ކެރިއަރުގެ ފަހުކޮޅުގައި އިންޑިއާ ސުޕަ ލީގުގައި ކުޅެފަ އެވެ. އެއީ، 2016 ވަނަ އަހަރު މުމްބާއި ސިޓީ އަށެެވެ.
އުރުގުއޭ އާއި ކޭޕް ވާޑް، މި ފަހަރުގެ ވޯލްްޑް ކަޕްގައި ކުޅެފައިވަނީ، މުބާރާތުގެ ޗެމްޕިއަންކަން ހޯދި ސްޕެއިނާ އެއް ގްރޫޕްގަ އެވެ. މުޅިން އަލަށް ވޯލްޑް ކަޕްގައި ކުޅުނު ކޭޕް ވާޑުން ފުރަތަމަ މެޗުގައި ސްޕެއިނާ ލަނޑެއް ނުޖެހި އެއްވަރުވިއިރު، ދެން ކުޅުނު ދެ މެޗުގައި ވެސް ވަނީ އެއްވަރުވެފަ އެވެ. އެއީ، އުރުގުއޭ އާއި 2-2 އިން އަދި ސައުދީ އަރަބިއްޔާއާ ދެކޮޅަށް 0-0 އިންނެވެ. ކޭޕް ވާޑް ކެޓީ، ވޯލްޑް ކަޕްގެ ފައިނަލުން ނާކާމިޔާބުވި އާޖެންޓީނާއާ ދެކޮޅަށް ކުޅުނު މެޗުން ބަލިވުމުންނެވެ. އާޖެންޓީނާ އިން 120 މިނިޓް ކުޅެެގެން، ކޭޕް ވާޑް ބަލިކުރީ 3-2 އިންނެވެ.
މި ފަހަރުގެ ވޯލްޑް ކަޕްގެ ގްރޫޕް ސްޓޭޖުން ކެޓި އުރުގުއޭ އަށް ލިބުނީ ދެ ޕޮއިންޓެވެ. މިއީ، އުރުގުއޭ ފުޓްބޯޅަ އަށް ބޮޑު ވެއްޓުމެކެވެ. ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގެ ކުއާޓާ ފައިނަލުގައި ކުޅުނު އުރުގުއޭ މި ވަނީ ޖެހިޖެހިގެން ދެ ވޯލްޑް ކަޕްެގެ ގްރޫޕް ސްޓޭޖުން ކަޓައިފަ އެވެ.
