ނިއު ދިއްލީ، އިންޑިއާ (އޮގަސްޓް 9) - ކުރިއަށް އޮތް ފީފާ އިންޓަނޭޝަނަލް ބްރޭކުގެ ތެރޭގައި، އާސިއާން ކަޕާއި ބްރެޒިލާ ދެކޮޅަށް ކުޅޭ އެކުވެރިކަމުގެ މެޗުގައި، އިންޑިއާގެ ތަފާތު ދެ ސްކޮޑެއް ބޭނުންކުރުމަށް، އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އިން ފީފާގެ ހުއްދަ ހޯދައިފި އެވެ.
އަންނަ އޮކްޓޫބަރު ތިން ވަނަ ދުވަހު ބްރެޒިލާއި އިންޑިއާ ބައްދަލުކުރާ މެޗު ކުޅެން ހުރިހާ ކަމެއް މިހާރު އޮތީ ހަމަޖައްސައިފަ އެވެ. އަދި، ފީފާ އާސިއާން ކަޕް އޮތީ ސެޕްޓެމްބަރު 23 އިން އޮކްޓޫބަރު ތިން ވަނަ ދުވަހުގެ ނިޔަލަށެވެ. އެ މުބާރާތުގައި އިންޑިއާ ހިމެނުނީ، ޕްްރިމިއާ ޑިވިޝަނުގަ އެވެ. ޗެމްޕިއަނުންނަށް އެއް މިލިއަން ޑޮލަރު ދޭ މި ޑިވިޝަނުގައި އިންޑިއާ ހިމެނެނީ، ގްރޫޕް އޭގަ އެވެ. އިންޑިއާގެ އިތުރުން އެ ގްރޫޕްގައި އޮތީ އިންޑޮނޭޝިއާ، މެލޭޝިއާ އަދި ސިންގަޕޫރު އެވެ.
ފީފާގެ އެއް ބްރޭކުގެ ތެރޭގައި، ގައުމީ ޓީމު ތަމްސީލްކުރަން ދެ ޓީމެއް ބޭނުންކުރުމުގައި ހުރަސްތަކެއް ހުރުމުން، އިންޑިއާ އިން އާސިއާން ކަޕުން ނަން ނަގަން އުޅޭ ކަމަށް މީޑިއާގައި އަޑުފެތުރުނެވެ.
އެކަމަކު، އެއާ ދެކޮޅަށް އިންޑިއާގެ ގިނަ ފުޓްބޯޅަ ލެޖެންޑުން ވަނީ ތެދުވެފަ އެވެ. އެ ގޮތުން، އިންޑިއާގެ ކުރީގެ ކެޕްޓަން، ބައިޗުން ބުޓިއާ ބުނެފައިވަނީ، އާސިއާން ކަޕްގައި މުބާރާތެއްގެ ސިފައިގައި ޔަގީނުން ވެސް ތިން މެޗެެއް ކުޅެން ލިބޭއިރު، އެ ފުރުސަތު ދޫކޮށްލުމަކީ ބަލައިގަނެވޭނެ ކަމެއް ނޫން ކަމަށެވެ. އަދި، އާސިއާން ކަޕްގައި ބައިވެރިވާއިރު ވެސް ފީއެއް ދޭން ނިންމާފައިވާއިރު، މިއީ، މާ ބޮޑު ހަރަދެއް ނުކޮށް، އޭއައިއެފްއެފް އަށް ރަނގަޅު މެޗުތަކެއް ލިބޭ ފުރުސަތެއް ކަމަށްވާތީވެ، އޭގެ ބޭނުން ހިފުން ކޮންމެ ހެން ވެސް މުހިންމުކަން ބުޓިއާ ފާހަގަކުރި އެވެ.
ފީފާ އާސިއާން ކަޕްގައި ކުޅޭ ކޮންމެ ގައުމަކަށް، 125،000 ޑޮލަރުގެ ބޯނަހެއް ދޭން ވެސް ވަނީ ނިންމައިފަ އެވެ.
ރިޕޯޓްތައް ބުނާގޮޮތުގައި، ނޮވެމްބަރު މަހުގެ ތެރޭގައި އޮތް ފީފާ ބްރޭކުގެ ތެރޭގައި، ދެކުނު އޭޝިއާގެ ފުޓްބޯޅަ މުބާރާތް، ސާފް ޗެމްޕިއަންޝިޕް ތާވަލުކޮށްފައިވާއިރު، އެ މުބާރާތަށް އިންޑިއާގެ ޒުވާން ޓީމެއް ފޮނުވުމުގެ ފުުރުސަތު އެބައޮތެވެ.
ނޮވެމްބަރު 4-17 އަށް ބަންގްލަދޭޝްގެ ވެރި ރަށް ޑާކާގައި ކުރިއަށްގެންދަން ނިންމާފައިވާ، 15 ވަނަ ސާފް ޗެމްޕިއަންޝިޕް ފުޓްބޯޅަ މުބާރާތަށް އިންޑިއާ އިން ޒުވާން ޓީމެއް ފޮނުވުމުގެ ފުރުސަތު ބޮޑުވީ، އިންޑިއާ އާއި ނިއު ޒީލެންޑްގެ ދެމެދުގައި ކުޅިވަރުގެ ރޮނގުން ގުޅުން ބަދަހިކުރިތާ 100 އަހަރު ފުރުން ފާހަަގަކުރުމަށްޓަކައި ނޮވެމްބަރު މަހުގެ ތެރޭގައި ގިނަ ހަރަކާތްތަކެއް ރާވާފައިވާތީ އެވެ.
އިންޑިއާގެ ފުޓްބޯޅަ ފެޑެރޭޝަން، އޭއައިއެފްއެފް އިން އިއުލާނުކޮށްފައިވާ ގޮތުގައި، ނޮވެމްބަރު މަހު ފީފާ ބްރޭކްގެ ތެރޭގައި އިންޑިއާ އިން ނިއު ޒީލެންޑާ ދެކޮޅަށް ދެ މެޗެއް ކުޅޭނެ އެވެ. މި މެޗުތައް ތާވަލުކޮށްފައި އޮތީ ސާފް ޗެމްޕިއަންޝިޕް ކުޅޭ ޝެޑިއުލާ ދިމާވާ ގޮތަށެވެ. އެ ގޮތުން، ނޮވެމްބަރު 12 ވަނަ ދުވަހު، އިންޑިއާ އިން ނިއު ޒީލެންޑުގެ އޯކްލޭންޑުގައި އެ ގައުމާ ދެކޮޅަށް ފުރަތަމަ މެޗު ކުޅޭނެ އެވެ. އަދި، އޭގެ ތިން ދުވަސް ފަހުން، ނޮވެމްބަރު 15 ވަނަ ދުވަހު، އިންޑިއާ އިން ނިއު ޒީލެންޑާ ދެކޮޅަށް ކުޅޭ ދެ ވަނަ މެޗު އޮންނާނީ ކްރައިސްޗާޗުގަ އެވެ.
