ނިއު ދިއްލީ، އިންޑިއާ (އޮަގަސްޓް 26) - އަންނަ މަހުގެ ފީފާ އިންޓަނޭޝަަނަލް ބްރޭކުގައި ބްރެޒިލާ ދެކޮޅަށް ކުޅޭ މެޗުގެ ކުރިން އިންޑިއާ އިން ޕެނަމާއާ ދެކޮޅަށް އެކުވެރިކަމުގެ މެޗެއް ކުޅެން ނިންމާފަައިވާ ކަމަށް އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އިން އިއުލާނުކޮށްފި އެވެ.
ކަލްކަތާގަައި އޮކްޓޫބަރު މަހު ތިން ވަނަ ދުވަހު ބްރެޒިލާ ދެކޮޅަށް ކުޅެން އޮތް މެޗަށް ފޯކަސް ކުރުމަށްޓަކައި، އިންޑިއާ އިން ވަނީ އަންނަ މަހު ފަށާ ފީފާ އާސިއަން ކަޕުން ލިބިފައި އޮތް ފުރުސަތު ދޫކޮށްލައިފަ އެވެ. އަދި، އާސިއާން ކަޕްގައި ކުޅެން ލިބޭ މެޗުތަކަށް ވުރެން ރަނގަޅު މެޗުތަކެއް އިންޑިއާ އަށް ހަމަޖައްސައިދޭން އޭއައިއެފްއެފް އިން މަސައްކަތްކުރާ ކަމަށް ވަނީ އެ ފެޑެރޭޝަންގެ އޮފިޝަލަކު ބުނެފަ އެވެ.
އެ ގޮތުން، މިހާރު ހަމަޖައްސާފައިވަނީ، އަންނަ މަހުގެ 26 ވަނަ ދުވަހު ޕެނަމާއާ ދެކޮޅަށް މެޗެއް ކުޅުމަށެވެ. މިއީ، މި ދެ ގަައުމުގެ މެދުގައި ކުޅެވޭ ފުރަތަމަ މެޗެވެ. ޕެނަމާ ވެގެންދާނީ އިންޑިއާ އިން ކުޅޭ ކޮންކަކަފް ސަރަހައްދަށް ނިސްބަތްވާ ނުވަ ވަނަ ޓީމަަށެވެ. ފީފާގެ ރޭންކިންގެ 44 ވަނައިގައި އޮތް ޕެނަމާ އަކީ، މި ފަހަރު އެމެރިކާ، މެކްސިކޯ އަދި ކެނަޑާގައި ކުރިއަށްދިޔަ ފީފާ ވޯލްޑް ކަޕްގައި ވެސް ވާދަކުރި ޓީމެކެވެ.
ވޯލްޑް ކަޕްގައި ގާނާ އަތުން 1-0 އިން ބަލިވި ޕެނަމާ އިން ކްރޮއޭޝިއާ އަތުން ވެސް ބަލިވީ ހަމަ އެ ނަތީޖާ އިންނެވެ. އިންގްލެންޑުން ޕެނަމާ އަތުން މޮޅުވީ 2-0 އިންނެވެ.
އިންޑިއާ އިން އަންނަނީ، ކޭޕް ވާޑް އާއި އުުރުގުއޭއާ އެކު ވެސް މި އަހަރު މެޗުތަކެއް ކުޅެވޭތޯ މަަސައްކަތް ކުރަމުންނެވެ. އަދި، އެ ދެ ޓީމާ އެކު، މެޗު ކުޅޭ ގޮތަށް ރޭވިއްޖެނަމަ، މި އަހަރުގެ ބާކީ ބައިގައި އިންޑިއާ އިން ވޯލްޑް ކަޕްގައި ކުޅުނު ފަސް ޓީމަކާ ދެކޮޅަށް މެޗު ކުޅޭނެ އެވެ. އެއީ، ޕެނަމާ އާއި ބްރެޒިލްގެ އިތުރުން، ކޭޕް ވާޑް އާއި އުރުގުއޭ އަދި ނިއު ޒީލެންޑް އެވެ.
އޭއައިއެފްއެފް އިން އިއުލާނުކޮށްފައިވާ ގޮތުގައި، ނޮވެމްބަރު މަހު ފީފާ ބްރޭކްގެ ތެރޭގައި އިންޑިއާ އިން ނިއު ޒީލެންޑާ ދެކޮޅަށް ދެ މެޗެއް ކުޅޭނެ އެވެ. މި މެޗުތައް ތާވަލުކޮށްފައި އޮތީ ސާފް ޗެމްޕިއަންޝިޕް ކުޅޭ ޝެޑިއުލާ ދިމާވާ ގޮތަށެވެ.
އެ ގޮތުން، ނޮވެމްބަރު 12 ވަނަ ދުވަހު، އިންޑިއާ އިން ނިއު ޒީލެންޑުގެ އޯކްލޭންޑުގައި އެ ގައުމާ ދެކޮޅަށް ފުރަތަމަ މެޗު ކުޅޭނެ އެވެ. އަދި، އޭގެ ތިން ދުވަސް ފަހުން، ނޮވެމްބަރު 15 ވަނަ ދުވަހު، އިންޑިއާ އިން ނިއު ޒީލެންޑާ ދެކޮޅަށް ކުޅޭ ދެ ވަނަ މެޗު އޮންނާނީ ކްރައިސްޗާޗުގަ އެވެ. މިއީ، އިންޑިއާ ގައުމީ ޓީމުން ނިއު ޒީލެންޑުގައި ކުޅޭ ފުރަތަަމަ މެޗުތަކެވެ. މީގެ ކުރިން، އޯޝެނިއާ ސަރަހައްދުގައި އިންޑިއާ އިން ކުޅުނު ހަމައެކަނި މެޗަކީ، 2005 ވަނަ އަހަރު ފިޖީއާ ދެކޮޅަށް ކުޅުނު މެެޗެވެ.
