ނިއު ދިއްލީ، އިންޑިއާ (އޮގަސްޓް 13) - އޮކްޓޫބަރު މަހު ކުރީކޮޅުގައި ކަލްކަތާގަައި ބްރެޒިލާ ދެކޮޅަށް ކުޅެން އޮތް މެޗަށް ފޯކަސް ކުރުމަށްޓަކައި، އިންޑިއާ އިން އަންނަ މަހު ފަށާ ފީފާ އާސިއަން ކަޕުން ލިބިފައި އޮތް ފުރުސަތު ދޫކޮށްލައިފި އެވެ.
އާސިއާން ކަޕާއި ބްރެޒިލާ ދެކޮޅަށް ކުޅޭ އެކުވެރިކަމުގެ މެޗުގައި، އިންޑިއާގެ ތަފާތު ދެ ސްކޮޑެއް ބޭނުންކުރުމަށް، އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އިން ފީފާގެ ހުއްދަ ވެސް ހޯދި އެވެ. އެކަމަކު، ފަހުން ނިންމާފައިވަނީ އެއް ފަހަރާ ގައުމީ ދެ ސްކޮޑެއް ގެންގުޅުމަށް ވުރެން މި ވަގުތު، އޮކްޓޫބަރު ތިން ވަނަ ދުވަހު ބްރެޒިލާ ދެކޮޅަށް ކުޅޭ މެޗަށް ފޯކަސް ކުރުމަށެވެ.
އޯލް އިންޑިއާ ފުޓްބޯލް ފެޑެރޭޝަންގެ ޑެޕިއުޓީ ޖެނެރަލް ސެކްރެޓަރީ، ސަތުޔަނާރާޔަނަން ވިދާޅުވީ، އާސިއާން ކަޕްގައި ކުޅެވެން ނެތްކަން ފީފާ އަށް އަންގާފައިވާނެ ކަމަށެވެ. އެއީ، މި ވަގުތަށް ބަލާއިރު، ބްރެޒިލާ ދެކޮޅަށް ކުޅޭ މެޗަށާއި އާސިއާން ކަޕަށް އެއްކޮށް ފޯކަސް ކޮށްގެން ކުރިއަށްދެވޭނެ ގޮތެއް ނެތުމުން ކަމަށް ސަތުނާރާނަން ފާހަގަކުރެއްވި އެވެ.
ބްރެޒިލާއި އިންޑިއާ ބައްދަލުކުރާ މެޗު ކުޅެން ހުރިހާ ކަމެއް މިހާރު އޮތީ ހަމަޖައްސައިފަ އެވެ.
ފީފާ އާސިއާން ކަޕް އޮތީ ސެޕްޓެމްބަރު 23 އިން އޮކްޓޫބަރު ތިން ވަނަ ދުވަހުގެ ނިޔަލަށެވެ. އެ މުބާރާތުގައި އިންޑިއާ ހިމެނުނީ، ޕްްރިމިއާ ޑިވިޝަނުގަ އެވެ. ޗެމްޕިއަނުންނަށް އެއް މިލިއަން ޑޮލަރު ދޭ މި ޑިވިޝަނުގައި އިންޑިއާ ހިމެނެނީ، ގްރޫޕް އޭގަ އެވެ. އިންޑިއާގެ އިތުރުން އެ ގްރޫޕްގައި އޮތީ އިންޑޮނޭޝިއާ، މެލޭޝިއާ އަދި ސިންގަޕޫރު އެވެ. އިންޑިއާ ވަކިވުމުން، ފީފާ އިން އަންނަނީ އާސިއާން ކަޕަށް މި ފަހަރުގެ ފީފާ ވޯލްޑް ކަޕްގައި ކުޅުނު ޓީމެއް ގެންނަން މަޝްވަރާ ކުރަމުންނެވެ.
ފީފާ އާސިއާން ކަޕްގައި ކުޅޭ ކޮންމެ ގައުމަކަށް، 125،000 ޑޮލަރުގެ ބޯނަހެއް ދޭން ވެސް ވަނީ ނިންމައިފަ އެވެ.
ރިޕޯޓްތައް ބުނާގޮޮތުގައި، ނޮވެމްބަރު މަހުގެ ތެރޭގައި އޮތް ފީފާ ބްރޭކުގެ ތެރޭގައި، ދެކުނު އޭޝިއާގެ ފުޓްބޯޅަ މުބާރާތް، ސާފް ޗެމްޕިއަންޝިޕް ތާވަލުކޮށްފައިވާއިރު، އެ މުބާރާތަށް އިންޑިއާގެ ޒުވާން ޓީމެއް ފޮނުވުމުގެ ފުުރުސަތު އެބައޮތެވެ.
ނޮވެމްބަރު 4-17 އަށް ބަންގްލަދޭޝްގެ ވެރި ރަށް ޑާކާގައި ކުރިއަށްގެންދަން ނިންމާފައިވާ، 15 ވަނަ ސާފް ޗެމްޕިއަންޝިޕް ފުޓްބޯޅަ މުބާރާތަށް އިންޑިއާ އިން ޒުވާން ޓީމެއް ފޮނުވުމުގެ ފުރުސަތު ބޮޑުވީ، އިންޑިއާ އާއި ނިއު ޒީލެންޑްގެ ދެމެދުގައި ކުޅިވަރުގެ ރޮނގުން ގުޅުން ބަދަހިކުރިތާ 100 އަހަރު ފުރުން ފާހަަގަކުރުމަށްޓަކައި ނޮވެމްބަރު މަހުގެ ތެރޭގައި ގިނަ ހަރަކާތްތަކެއް ރާވާފައިވާތީ އެވެ.
އިންޑިއާގެ ފުޓްބޯޅަ ފެޑެރޭޝަން، އޭއައިއެފްއެފް އިން އިއުލާނުކޮށްފައިވާ ގޮތުގައި، ނޮވެމްބަރު މަހު ފީފާ ބްރޭކްގެ ތެރޭގައި އިންޑިއާ އިން ނިއު ޒީލެންޑާ ދެކޮޅަށް ދެ މެޗެއް ކުޅޭނެ އެވެ. މި މެޗުތައް ތާވަލުކޮށްފައި އޮތީ ސާފް ޗެމްޕިއަންޝިޕް ކުޅޭ ޝެޑިއުލާ ދިމާވާ ގޮތަށެވެ. އެ ގޮތުން، ނޮވެމްބަރު 12 ވަނަ ދުވަހު، އިންޑިއާ އިން ނިއު ޒީލެންޑުގެ އޯކްލޭންޑުގައި އެ ގައުމާ ދެކޮޅަށް ފުރަތަމަ މެޗު ކުޅޭނެ އެވެ. އަދި، އޭގެ ތިން ދުވަސް ފަހުން، ނޮވެމްބަރު 15 ވަނަ ދުވަހު، އިންޑިއާ އިން ނިއު ޒީލެންޑާ ދެކޮޅަށް ކުޅޭ ދެ ވަނަ މެޗު އޮންނާނީ ކްރައިސްޗާޗުގަ އެވެ.
